ГумэкIыгъор щагъэзыягъ

Зэпахырэ узхэм зыщяIэзэхэрэ сымэджэщэу Мые­къуапэ дэтым пэмычыжьэу щыт IэрышI псыубы­тыпIэм идамбэ игъэцэкIэжьын къэлэ къулыкъухэр мэкъуогъум и 4-м ичэщ чанэу дэлэжьагъэх.

Ащ игъунэгъоу щыт псэу­пIэ­хэм псыр къакIэмыоным ищынагъо ашъхьарахыгъ.

Мыекъопэ къэлэ админист­рацием ипресс-къулыкъу къы­зэритыгъэмкIэ, зэпымыурэ ощхы­шхохэм апкъ къикIыкIэ мэкъуогъум и 4-м гидротехни­ческэ псэолъэшIыгъэм изытет лъэшэу зэщыкъоу ыублагъ: дам­быр къачэмэ, чIыр етIысэхэу. МетритIу зилъэгэгъэ нэпкъым метрэ 50-м фэдиз икIыхьагъэу ычIэ еохыгъ.

Чэщым сыхьатыр 12-м ошIэ-дэмышIэ IофхэмкIэ ГъэIоры­шIапIэм икъэлэ подразделениехэр къаIэтыгъэх. Мы чIыпIэм Мыекъуапэ имэрэу Александр Наролиныр къыIухьагъ. Сыхьа­тиблым къыкIоцI аварийнэ IофшIэнэу зэрахьагъэхэм ар ышъхьэкIэ алъыплъагъ. Карье­рым къыращыгъэ мыжъо ыкIи етIэ зэхэлъ тонн 500-м ехъу дамбым игъэпытэжьын пэIу­хьагъ. Пчэдыжь нэфшъагъом ехъу­лIэу ар зыпкъ рагъэуцожьыгъ.