Хэукъоныгъищ пшIыгъэмэ — ТРАНСПОРТ ЗЕФЭНЫМКIЭ фитыныгъэ уиIэжьэп

Тигъогухэм тхьамыкIагъоу атехъухьэхэрэм япчъа­гъэ лъэшэу зэрэхахъорэм, ахэм цIыфыбэ зэрахэ­кIуа­­дэрэм къэралыгъо пащэхэри, об­ществэри егъэ­гумэкIых, хэкIыпIэ зэфэ­шъхьаф­хэм яусэх. Шапхъэу зекIохэрэри зэпымыоу агъэлъэшых, тазырхэр къаIэтых, ау узы­гъэрэзэн кIэуххэр тлъэгъухэрэп.

gbo-gibdd-gai

Тиуахътэ водительхэу гъогу­рыкIоным ишапхъэхэр икIэ­ры­кIэу зыукъохэрэм арагъэхьыщт пшъэдэкIыжьыр зэрагъэлъэ­шы­рэм фэгъэхьыгъэ законо­проек­тыкIэр Къэралыгъо Думэм къы­халъхьагъ. Ащ къызэ­рэ­ди­лъы­тэрэмкIэ, хэукъоны­гъищ во­ди­телым зишIыкIэ, ­илъэс-илъэс­рэ ныкъорэкIэ зефэнымкIэ фи­тыныгъэр Iахыщт. Мы гъэтэ­рэзыжьыныр административнэ хэбзэукъоныгъэхэм я Кодекс истатьяу 12.38-м хагъэхьан гу­хэлъ яI.

Гъэлъэшыгъэ пшъэдэкIыжьыр шэпхъэ пстэуми афэгъэхьыгъэп. ЗефэнымкIэ фитыны­гъэр зыуи­мыIэжьын ылъэкIыщтыр я 3-рэу скоростыр 40-м ебгъэ­хъу­гъэу укъызагъэуцукIэ ары. Джащ фэдэу, мэшIоку гъогур зызэпыпчыкIэ е ­нэфрыгъозэ плъыжьэу къэнэфырэм уцо­гъуищрэ уземыжэкIэ, фитыны­гъэр уиIэжьыщтэп. Гъогузэ­пы­рыкIыпIэм зикIогъур ыкIи хэ­ушъхьафыкIыгъэ мэкъэгъэIухэр зыхэгъэнэгъэ автомобильхэр щы­блэзымыгъэкIырэм, «зебрэм» къытехьэгъэ лъэсрыкIом емыжагъэм (уцогъуи 3-рэ а ­хэукъоныгъэр зишIыкIэ) а пшъэдэкIыжьыр къежэ. Зефэ­нымкIэ фитыныгъэр зыIахыщт­хэм ащыщых гъогум рыщэгъэ гъэтхъыгъэ занкIэм я 3-рэу техьэу зыкъызэпырызгъэзэ­жьырэ е ыпэкIэ къикIырэ автомобилым илъэныкъо техьэрэ водительхэр.

Зэхэубытагъэхэу мы хэукъо­ныгъэхэм пшъэдэкIыжь арыпхьын плъэкIыщт. Ащ къикIырэр къыжъугурыдгъэIон. Нэфры­гъозэ плъыжьыр къыхэнагъэу водителыр гъогум рычъагъ. Ащ пае тазыр тыралъхьагъ. АщкIэ административнэ пшъэдэ­кIы­жьым ипIалъэр зы илъэс. Тазырыр зитыжьыгъэ нэужым а илъэсым къыкIоцI ыпшъэкIэ зигугъу къэтшIыгъэ шапхъэхэм ащыщ зиукъокIэ, иIоф хьыкумым щызэхафыщт. Ау щыIэх фитыныгъэ ямыIэу машинэр зезыфэрэ цIыфхэр. Ахэм алъэ­ныкъокIэ тазырэу сомэ мини 10 — 30-р статьям къыщыдэ­лъытагъ.

КъэIогъэн фае, зэпымыоу Iоф зышIэрэ фотовидеофиксациехэм къыхагъэщыгъэ хэукъо­ныгъэхэр мыщ къыхиубытэхэрэп. Арышъ, почтэкIэ тазырхэр къызыфагъэхьыхэрэр мы­гумэкIынхэ алъэкIыщт. Псын­кIэзефэныр зикIэсэ водитель-
хэр лъэшэу егъэгумэкIых икIэ­рыкIэ хэукъоныгъэм итехыжьын пIалъэу пылъым.

Джыри зэ къыкIэтIоты­кIы­жьын, пшъэдэкIыжьэу тыралъхьагъэр гъэцэкIагъэ зыхъурэм ыуж илъэс зытешIэкIэ, ар тырахыжьы. ГущыIэм пае, скоростыр 40-м ебгъэхъугъэу инспекторым укъыгъэуцуи тазыр къыпфыритхыкIыгъ. Уфае­мэ, зэу банкым ар щыотыжьы е мэфищэ узежэкIэ базэм ар ихьанышъ, процент 50 фэгъэ­кIотэн уиIэу птыжьыщт. Уимыхьакъымэ, мэфи 10-м къыкIоцI укIэдэон уфит. Мэфэ 20 зыте­шIэкIэ фэгъэкIотэныгъэр пшIо­кIоды, мэфэ 60-м къыкIоцI шIокI имыIэу птыжьын фае. Джа тазырыр зыптыжьырэм къыщегъэжьагъэу постановлениер гъэцэкIагъэ мэхъу ыкIи илъэсыр алъытэнэу рагъажьэ. Джа илъэсыр екIыфэ хэукъоныгъэу пшIырэр ятIонэрэ мэхъу.

Ау уимылъэныкъобгъу утехьи, зефынымкIэ фитыныгъэр пIахыгъэмэ, пшъэдэкIы­жьэу къып­тыралъхьагъэр зыщыуухырэ мафэм (правэхэр къызыуатыжьыкIэ) къыщыубла­гъэу илъэсыр къалъытэнэу ра­гъажьэ.

Советскэ Союзыр зыщэIэми гъогурыкIоным ишапхъэхэр щэ­гъогогъо заукъорэм автомобиль зефэнымкIэ фитыныгъэр аIахыщтыгъэ ыкIи правэхэм гъуа­нэхэр афашIыщтыгъэх.

«Щынэгъо зефэным» фэгъэ­хьыгъэ унашъом Д. Медведевыр кIэтхагъ

ГъогурыкIоным ишапхъэхэм афашIыгъэ зэхъокIыныгъэу «щы­нэгъо зефэныр» зыфиIорэм фэгъэхьыгъэ унашъом УФ-м и Премьер-министрэу Дмитрий Медведевыр зэрэкIэтхагъэр игуа­дзэхэм адыриIэгъэ зэIукIэ­гъум къыщиIуагъ. ЦIыфэу ежь ­ищыIэныгъэ имызакъоу, къэзыуцухьэхэрэми ящыIэныгъэ щы­нагъо къыфэзыхьырэм пшъэ­дэкIыжь зэрэрагъэхьыщтым мыр фэIорышIэщт.

Мыщ къыхиубытэу алъыта­гъэхэр: транспорт амалхэу зэхэтхэу кIохэрэм ащыщ зэры­кIорэ лъэныкъор зэблихъуныр е зикIогъур блимыгъэкIыныр, уапэ ит автомобилым ыуж узэ­ритын фэе гъогууанэр (дистан­циер), имыщыкIагъэу тормо­зым утеIункIэныр, къыбдэхырэ транспортым пэрыохъу уфэ­хъуныр, нэмыкIхэри.

ПшъэдэкIыжьэу мы хэукъо­ныгъэхэмкIэ арагъэхьыщтыр джыри гъэнэфагъэгоп. Къэралыгъо автоинспекцием игъоу елъэгъу тазырыр сомэ мини 5-м къыщегъэжьагъэу зефэ­нымкIэ фитыныгъэр аIахыныр е уголовнэ пшъэдэкIыжь ара­гъэхьыныр.

ЫпшъэкIэ зигугъу къэтшIыгъэ законопроектым ыкIи хэ­бзэгъэуцугъакIэу «щынэгъо зе­фэным» афэгъэхьыгъэу еплъы­кIэхэр къедгъэIотэнхэу гъо­гу­рыкIоныр щынэгъончъэнымкIэ Къэралыгъо автоинспекцием и ГъэIорышIапIэу Адыгэ Республикэм щыIэм административнэ практикэмкIэ иотдел ипащэу Алексей Чмыревым зыфэд­гъэзагъ. Ащ къызэри­Iуа­гъэмкIэ, джэуап гъэнэфагъэхэр джыдэдэм щыIэхэп. Сыда пIомэ мы­хэр гъэцэкIагъэ зэрэ­хъущтхэм джыри федеральнэ гупчэм икъоу Iоф дишIагъэп. Зым кIуа­чIэ иIэ хъугъэ нахь мышIэми, агъэцэкIэным фэ­хьазырэп.

Хэутыгъэ зэфэшъхьафхэр къызфигъэфедэзэ
къэзыгъэхьазырыгъэр Iэшъынэ Сусан.