Юбилярым идышъэ медаль

ХыIушъо Шапсыгъэ щыщ ветеранхэм, къуа­джэу ШэхэкIэй къыщыхъугъэу ыкIи щы­псэ­угъэу, заом хэтыгъэхэм анахьыжъэу ТIэшъу КIэ­рандыкъо ыныбжь илъэси 100 хъугъэ.

Тешев5ЗэуитIумэ ахэтыгъэ зэолIыр пыим къыфызэкIакIоу къыхэ­кIы­гъэп. ЫгъэшIэгъэ илъэсхэми джащ фэдэу зыкъаригъэуфэрэп. Илъэсишъэ ыныбжь хъу­гъэу КIэрандыкъо ТекIо­ны­гъэм и Мафэ пэгъокIыгъ. Иб­гъэ­халъ­хьэхэр зэпэлыдхэу зы­хилъхьэ­хи, бэщ Iэрыфэгъур ыубыти, Те­кIоныгъэр зыфэда­гъэр ыгу къы­гъэкIыжьынэу цIыф­хэм ахэ­хьагъ.

Ветераным ыгъэшIэгъэ илъэс­хэр къэралыгъомкIэ мэхьанэшхо зиIэ хъугъэ-шIагъэхэм ате­фа­гъэх. Совет хабзэр къызэрэ­дахыгъэр, СССР-р, ­колхозхэр зэ­рэзэхащагъэхэр, белофинхэм зэрязэуагъэхэр, Хэгъэгу зэошхор зэрэкIуагъэр, къэра­лы­гъор гъэпытэгъэныр ахэм ащыщых.

Полковникэу КI. ТIэшъур илъэс 20-рэ дзэ къулыкъум хэ­тыгъ. Хэгъэгу зэошхом иорденэу а I-рэ степень зиIэр, Быракъ Плъыжьым ыкIи Жъо­гъо Плъыжьым яорденхэм афэдэхэу тIурытIу къыфагъэшъошагъ, «За Победу над Германией», «За боевые заслуги», «За освобождение Белоруссии», «За освобождение Варшавы», «За взятие Берлина» зыфиIорэ медальхэр, нэмыкIхэри къыратыгъэх.

Ыныбжь емылъытыгъэу КIэ­рандыкъо партийнэ ыкIи ветеранскэ организациехэу ТIуа­псэ ыкIи Тэхъутэмыкъое районым ащызэхэщагъэхэм яIоф­шIэн хэлажьэ, ныбжьыкIэхэм заIуегъакIэ, яхэгъэгу шIу алъэ­гъоу къэтэджынхэм дэлажьэ. Ар ыпхъу дэжь Яблоновскэм щэпсэуми, къызщыхъугъэ къуа­джэм къэкIо, заом хэкIода­гъэ­хэм ясаугъэт екIуалIэ. Ащ зылъэкъуацIэ тетхагъэхэр зэкIэ КIэрандыкъо дэгъоу къе­шIэжьых, шъхьащэ афишIызэ афэшъыгъо.

Шъыпкъагъэрэ зэфагъэрэ зыхэлъ цIыфэу, къумалыгъэмрэ пцIыусынымрэ зиджэгъо полковникым тилъэхъан тари­хъым зэрэдэзекIохэрэр ыгу рихьырэп ыкIи ыштэрэп. Ащ ытхыгъэу «Лже-историков нужно казнить, как фальшивомонетчиков» зыфиIорэр илъэс зау­лэкIэ узэкIэIэбэжьымэ гъэзетэу «Шапсугия» зыфиIорэм къыригъэхьэгъагъ. Ар цIыфхэм лъэ­шэу агу рихьыгъ. Гупшысэ шъхьаIэу КIэрандыкъо итхыгъэ щыпхырыщыгъагъэр ­адыгэ лъэпкъым къыщышIыгъэ шъыпкъэ хъугъэ-шIагъэхэм уялъэпэ­кIэоныр, ижъыкIэ къыщегъэ­жьа­гъэу Краснодар краим ишъо­лъыр исыгъэ цIыфхэм ятарихъ зэблэпхъузэ кIэптхыкIыжьыныр зэрэмытэрэзыр ары. Арэу­щтэу зэрэщытыр ежьым ышIэрэ ыкIи зыхэтыгъэ хъугъэ-шIагъэхэмкIэ къыгъэшъыпкъэжьыгъ.

ТIэшъу КIэрандыкъо ыныбжь лIэшIэгъу зэрэхъугъэр тIо хигъэ­унэфыкIыгъ, зэм — ТIуапсэ, зэм — ШэхэкIэй. БэгъашIэ хъугъэ шапсыгъэлIэу чIыпIабэмэ ащызэлъашIагъэм имэфэкI дыхагъэунэфыкIынэу цIыфыбэ къыфэкIогъагъ. Ахэр Адыгэ, Къэбэртэе-Бэлъкъар респуб­ликэхэм, къэлэ зэфэшъхьафхэм къарыкIыгъагъэх. Дунэе Адыгэ Хасэм, шапсыгъэ Адыгэ Хасэм, Георгиевскэ чIыпIэ администрацием, ветеран ыкIи партийнэ организациехэм ялIы­кIохэм, ныбджэгъухэм, Iахьыл­хэм ягуапэу ащ имэфэкI ды­хагъэунэфыкIыгъ, гущыIэ фабэхэр къыфаIуагъэх.

ШIуфэс хъохъухэр ТIопсэ рай­оным ипащэ, Дунэе ­Адыгэ Хасэм итхьаматэ къыфагъэ­хьыгъэх. Джащ фэдэу, ТIэшъу КIэрандыкъо Шъалихьэ ­ыкъом ДАХ-м ибгъэхэлъхьэ анахь лъа­пIэу «ДАХ-м и Дышъэ медаль» зыфиIорэр къыфагъэшъошагъ. Ар Налщык щыщ общественнэ IофышIэу Абрэдж ­Хьамедэ къыритыжьыгъ. ШъхьэкIэфэ­шхо зыфашIырэ КIэрандыкъо къо­джэдэсхэр, еджакIохэр къыфэ­гушIуагъэх, къэшъокIо цIыкIухэм къыфатыгъэ къэгъэлъэгъоным игуапэу еплъыгъ.

Ныбэ Анзор.