ПенсиехэмкIэ фондым и ГъэIорышIапIэу Теуцожь районым щыIэм иIофышIэхэр Лъэустэнхьаблэ ичIыпIэ администрацие иIофышIэхэм джырэблагъэ аIукIэгъагъэх.
Къэзэрэугъоигъэхэм адэгущыIагъ ГъэIорышIапIэм пенсиехэр къэлъытэжьыгъэнхэмкIэ ыкIи ятыгъэнхэмкIэ иотдел испециалист-эксперт шъхьаIэу Хъот Гощнагъо. Ащ къафиIотагъ 2016-рэ илъэсым страховой пенсиехэр индексацие зэрашIыгъэхэм нэшанэу иIагъэхэр, пенсиехэр зэрафагъэуцухэрэ ыкIи къазэрафалъытэжьхэрэ шIыкIэр, пенсием иягъэгъэуцун зэкIэпхьаныр нахь федэу зыкIыщытыр, ныбжьыр къэсыфэкIэ уемыжьэу пенсием ехьылIэгъэ тхылъхэр нахь пасэу бгъэхьазырынхэ зыкIыфаер ыкIи нэмыкIхэр. ПенсиехэмкIэ фондым испециалист анахьэу анаIэ зытыраригъэдзагъэхэм ащыщ электроннэ сервисэу «ЦIыфым иунэе кабинет» зыфиIорэм амалэу къытыхэрэр агурыгъэIогъэнхэр. А сервисыр ыгъэфедэзэ цIыфым пенсием зэрэкIощтым ехьылIэгъэ лъэIу тхылъыр алъигъэIэсын ылъэкIыщт. Арышъ, ащ пае ПенсиехэмкIэ фондым ичIыпIэ къулыкъу укIонэу ищыкIагъэп. Сервисым къытырэ амалхэм пIэлъэ благъэм джыри ахэхъонэу щыт. Электроннэ шIыкIэр къызыфигъэфедэзэ федеральнэ фэгъэкIотэныгъэ зиIэ цIыфым мазэ къэс аратырэ ахъщэ тыныр ягъэгъэуцугъэным ехьылIэгъэ лъэIу тхылъыр аритын ылъэкIыщт, джащ фэдэу ны мылъкум ехьылIэгъэ къэралыгъо сертификат къаIыхыгъэным ыкIи а мылъкур гъэфедэгъэным яхьылIэгъэ лъэIу тхылъыр хэт щыщи аритын ылъэкIыщт.