«Зэкъошныгъ» Мыекъуапэ — «Алания» Владикавказ — 0:3. ЖъоныгъуакIэм и 24-м Мыекъуапэ щызэIукIагъэх. Судья шъхьаIэр: В. Ермаков — Краснодар. Къэлапчъэм Iэгуаор дэзыдзагъэхэр: Базаев — 1, 13, Сикоев — 74.
ЯтIонэрэ къекIокIыгъом иешIакIэ хэзыгъэхъогъэ, текIоныгъэр нахьыбэрэ къыдэзыхырэ командэхэм «Аланиер» ащыщ. «Зэкъошныгъэм» итренер шъхьаIэу Чэгъэдыу Бибэрт ар къыдилъытэзэ, тифутболистхэр зэIукIэгъум фигъэхьазырыгъэх. «Аланиер» ауж къинэрэмэ зэращыщыр къыдэплъытэмэ, «Зэкъошныгъэм» ешIэгъур къыхьыщтэу тыгугъэщтыгъ, ау тикомандэ тигъэгушIуагъэп.
Апэрэ такъикъым хьакIэхэр апэкIэ псынкIэу къылъыкIотагъэх, метрэ 16 фэдизкIэ зыпэчыжьэ къэлапчъэм Базаевыр дауи, хъагъэм Iэгуаор ридзагъ. ТиухъумакIохэр зэрэзэгурымыIуагъэхэр Базаевым ятIонэрэу ыгъэфеди, «Зэкъошныгъэм» икъэлапчъэ Iэгуаор къыдидзагъ — 0:2.
Тифутболистхэм гуетыныгъэ къызыхамыгъэфагъэу тлъытэрэп, ау яешIакIэ тыкъыщытхъурэп. Мэщыкъор, Маренич, Делэкъор, Датхъужъыр, фэшъхьафхэри апэкIэ илъыщтыгъэх шъхьаем, къэлэпчъэIутымрэ ухъумакIохэмрэ бэрэ агъэгумэкIыгъэхэп. Пчъагъэр 0-3 зэхъум, «Зэкъошныгъэм» гугъэ фырямыIэу стадионым нэбгырабэ дэкIыжьыгъ.
Адыгэ Республикэм и ЛIышъхьэу ТхьакIущынэ Аслъан ешIэгъум еплъыгъ, спортымкIэ пащэхэм гущыIэгъу афэхъугъ.
Я 25-рэ ешIэгъухэр
«Мэщыкъу» — «Черноморец» — 1:1, «Терек-2» — «Спартак» — 0:3, МИТОС — «Афыпс» — 2:3, «Краснодар-2» — «Динамо» — 4:1, «Астрахань» — «Ангушт» — 0:3, «Биолог» — СКА — 2:0.
«Спартак» Налщык зэкIэми апэ ит. «Зэкъошныгъэр» ауж къинэхэрэм ащыщ. ЖъоныгъуакIэм и 30-м тикомандэ Новороссийскэ щешIэщт, илъэс зэнэкъокъур а мафэм купэу «Къыблэм» щаухыщт.