Дзэ къулыкъу дэщыным фэгъэхьыгъэ хэбзэгъэуцугъэхэм илъэс къэс зэхъокIыныгъэхэр афэхъух. Джыдэдэм щыIэ шапхъэхэм ыкIи къихьащт илъэсым зэрифэшъуашэм елъытыгъэу зидэщыгъо пIалъэ лъагъэкIотэщтхэм афэгъэхьыгъэ зэхъокIыныгъэхэм нэIуасэ шъуафэтшIын.
НыбжьыкIэхэу зыныбжь илъэс 18 хъугъэхэм дзэм къулыкъу щахьынэу атефэ. Ау мы уахътэм ехъулIэу цIыфым гурыт еджапIэр джыри къымыухыгъэмэ, дзэм зэращэщт пIалъэр фызэкIахьанэу щыт. Ащ имызакъоу, ушэтынхэр зитышъухэкIэ, а илъэсым чъэпыогъум и 1-м нэс къулыкъум ащэщтэп. Гъэсэныгъэм иучреждение чIэхьашъунымкIэ мыщ амал раты.
Зыныбжь икъугъэ кIэлэеджакIоу зэ зипIалъэ лъагъэкIотагъэр мафэрэ еджэнэу апшъэрэ еджапIэм зычIахьэкIэ, етIани ар къеухыфэ ищыкIэгъэ уахътэр къыраты. Ау ар гурыт гъэсэныгъэ зыщызэрагъэгъотырэ еджапIэм зычIахьэкIэ, ятIонэрэу ащ фэдэ фэгъэкIотэныгъэ къытефэрэп.
Колледжхэм ыкIи техникумхэм ачIэсхэр къулыкъум мыкIонхэмкIэ пIалъэр афызэкIахьаным икъиныгъо нахь зэхашIэ. ЕджакIом ащ фэдэ амал зыратырэр я 9-рэ класс ужым (я 11-рэ классым ымыужэу) чIэхьагъэмэ ары. Илъэс 20 охъуфэкIэ пIалъэр лъагъэкIуатэ. А ныбжьым зэрэнэсыгъэм тетэу, заджэрэр къыухынкIэ мэ-
фэ заулэ нахь къэмынагъэми, дащынэу тефэ.
Я 11-рэ классым ыуж гурыт гъэсэныгъэ зэзыгъэгъотырэм ыныбжь зыщикъурэ илъэсыр аужырэ курсым исэу зытефэкIэ, дзэм зэращэщт пIалъэр фызэкIахьэ.
ЕджакIохэр дзэ къулыкъум мыкIонхэмкIэ пIалъэр афызэкIахьанымкIэ къыдыхэлъытэгъэн фаехэр:
— зэреджэхэрэ программэм къэралыгъо аккредитацие иIэн фае;
— егъэджэн Iофыр мафэрэ регъэкIокIыгъэныр;
— егъэджэн программэм изэгъэшIэн тефэрэ уахътэм мынахьыбэу пIалъэр зэрэфызэкIахьэрэр.
Гъэсэныгъэм иучреждение пстэуми ащеджэхэрэр мы шапхъэхэм къахеубытэх.
Техникумым е колледжым щеджэзэ мы амалыр къызфэзыгъэфедэгъэ ныбжьыкIэр апшъэрэ еджапIэм зычIахьэкIэ, фэгъэкIотэныгъэ иIэжьырэп.
Законэу «О воинской обязанности и военной службе» зыфиIорэм зэхъокIыныгъэу фашIыгъэхэм 2017-рэ илъэсым иапэрэ мафэ къыщыублагъэу кIуачIэ яIэ мэхъу. Ахэм къызэрэдалъытэрэмкIэ, колледжхэм ыкIи техникумхэм ачIэсхэм (я 9-рэ ыкIи я 11-рэ класс ужэу зэрэчIэхьагъэхэм емылъытыгъэу) еджэныр къамыухэу къулыкъум ащэщтхэп.
Апшъэрэ еджапIэм чIэсэу мафэрэ еджэрэ студентым къеухыфэ дзэ къулыкъум ащэщтэп. Гурыт еджапIэм чIэсызэ а пIалъэр фылъагъэкIотагъэу щытыгъэми, апшъэрэ еджапIэр къеухыфэ зи раIощтэп.
ЯтIонэрэу апшъэрэ гъэсэныгъэ зэзыгъэгъотыхэрэм ащ фэдэ амал аратырэп. Ау еджэныр магистратурэм лъыпызыдзэжьыщтхэм дзэ дэщыгъо пIалъэр афызэкIахьэ.
Мэфэ еджэн шIыкIэм тетэу аспирантурэм, ординатурэм е интернатурэм ачIэсхэм ыпэкIэ пIалъэр афылъагъэкIотагъэу щытми, заджэхэрэр къаухыфэ дзэ къулыкъум ащэщтхэп.
Гъэтхэ дзэ дэщыгъор макIо
Мэлылъфэгъум и 1-м гъэтхэ дзэ дэщыгъор Адыгеим щырагъэжьагъ. Ар бэдзэогъум и 15-м нэс кIощт. Мы уахътэм къыкIоцI Урысые Федерацием и УIэшыгъэ КIуачIэхэм ясатырэ хэхьащт ныбжьыкIэ 520-рэ Адыгеим икIыщт.
Адыгэ Республикэм идзэ комиссариат къызэритыгъэмкIэ, игъорыгъозэ купхэр дащых. Ащ фэдэу гъэтхэ дзэ дэщыгъом къыхиубытэрэ нэбгыри 150-рэ фэдизмэ къулыкъур рагъэжьэгъах.
Ахэр джыри дамыщыхэзэ, пэшIорыгъэшъ ухьазырынхэр арагъэкIугъэх, шъуашэхэмкIэ зэтырагъэпсыхьагъэх ыкIи нэбгырэ пэпчъ банковскэ картэхэу мазэ къэс сомэ мини 2 къызэрыхьащтхэр аратыгъэх.
Гъэтхэ дзэ дэщыгъор тапэкIи зэрэкIощтым джыри шъущыдгъэгъозэщт.
Iэшъынэ Сусан.