Аужырэ одыджыныр къафытеуагъ

ЕджапIэхэм мыгъэ къачIэкIырэ ныбжьыкIэхэм тыгъуасэ аужырэ одыджыныр къафытеуагъ.

DSC_9734

Зэрэхэгъэгу фэдэу тиреспублики ар мэфэкI шIыкIэм тетэу гъэсэныгъэм иучреждениехэм ащыкIуагъ. Пчэды­жьым къэлэ ыкIи къоджэ урамхэр къызэлъагъэдахэзэ ныбжьы­кIэхэр яеджапIэхэм якIугъэх, аужырэ одыджыныр къызыфытеохэрэм афэгушIуагъэх.

Тыгъуасэ нэс сабыеу алъы­тэщтыгъэ кIэлэеджакIохэм непэ аныбжь зэрикъугъэр къаушыхьатэу ежьхэм къыхахыгъэ гъогум техьащтых. Шъыпкъэ, ар къафэпсынкIэщтэп, чIыпIэ къинхэри, гушIогъо такъикъхэри къякIущтых, лъагъоу къыхахы­гъэм язакъоу рыкIощтых.

Мыгъэ республикэм иеджа­пIэхэм къачIэкIыщтым ипчъа­гъэ, гъэрекIорэм елъыты­гъэмэ, зэхапшIэу къыщыкIагъ. Адыгэ Республикэм гъэсэныгъэмрэ шIэныгъэмрэкIэ и Министерствэ къызэритырэмкIэ, мы илъэ­сым гурыт еджапIэр къэзыухыхэрэр нэбгырэ 200-кIэ нахь макI. Аужырэ одыджыныр я 11-рэ классыр къэзыухырэ нэ­бгырэ 1580-мэ, я 9-рэ классым къычIэкIырэ 3890-мэ къафытеощт. ЗэкI пIоми хъунэу ахэм ушэтынхэр атынхэу фитыныгъэ яI.

ЕджапIэр къэзыухыхэрэм къа­фэгушIуагъэх гъэцэкIэкIо хабзэм илIыкIоу къырагъэблэ­гъагъэхэр, еджапIэхэм япащэхэр, якIэлэегъаджэхэр, ягупсэ­хэр, а 1-рэ классхэм ащеджэ­рэ кIэлэцIыкIухэр. Ахэм нахьыжъхэм къэгъэгъэ Iэрам дахэхэр къаратыгъэх, усэхэр, орэдхэр къафаIуагъэх, къафэшъуагъэх.

Джы бэрэскэшхом я 11-рэ классыр къэзыухыхэрэм къэра­лыгъо ушэтынхэр рагъэ­жьэщтых. Нэбгырэ 1639-мэ заушэтынэу щыт. Географиемрэ литературэмрэ къыхэзыхыгъэхэм мы мазэм и 27-м атыщт, и 30-м урысыбзэмкIэ зэкIэми яшIэны­гъэхэр аушэтыщтых. НэмыкI ушэтынхэр ахэм къакIэлъыкIо­щтых, мэкъуогъум и 30-м нэс зыкI къэралыгъо ушэтынхэр кIощтых.

Мэфэкум я 9-рэ классыр къэзыухыхэрэм ушэтынхэр ра­гъэжьэщтых. Нэбгырэ 3955-мэ заушэтынэу щыт. Жъоныгъуа­кIэм и 26-м къыщегъэжьагъэу мэкъуогъум и 21-м нэс экзаменхэр кIощтых.

БлэкIыгъэ илъэсхэм афэдэу я 9-рэ ыкIи я 11-рэ классхэр къэзыухыхэрэм янахьыбэм обществознаниемкIэ заушэтынэу къыхахыгъ. Апшъэрэ ыкIи гурыт сэнэхьат зэбгъэгъоты­ным­кIэ мы предметыр зэрищыкIа­гъэр ары мыщ фэдэу бэмэ къызыкIыхахэу алъытэрэр.

ПIатIыкъо Анет.