«2016-рэ илъэсым икIэлэегъэджэ анахь дэгъу» зыфиIорэ зэнэкъокъум хэлэжьагъэхэр, ащ текIоныгъэ ыкIи хагъэунэфыкIырэ чIыпIэхэр къыщыдэзыхыгъэхэр мы мафэхэм агъэшIуагъэх, яIофшIэнкIэ къалэжьыгъэ шIухьафтынхэр аратыжьыгъэх.
Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м иобщественнэ палатэ ипащэу Устэ Руслъан, народнэ гъэсэныгъэм ыкIи шIэныгъэм иIофышIэхэм яшъолъыр профсоюз организацие итхьаматэу Сергей Кошкиныр, АР-м гъэсэныгъэмрэ шIэныгъэмрэкIэ иминистрэу Хъуажъ Аминэт, нэмыкIхэри.
Мыгъэ ар я 21-у зэхащагъ. Зэнэкъокъум зыщызыушэтыгъэ кIэлэегъаджэхэм IэпэIэсэныгъэшхо зэрахэлъыр, яIофшIэн хэшIыкIышхо зэрэфыряIэр АР-м гъэсэныгъэмрэ шIэныгъэмрэкIэ иминистрэ къыхигъэщыгъ.
— КIэлэегъэджэ сэнэхьатым нахь шъхьаIэ щыIэп, сыда пIомэ хэтрэ цIыфи иеджэн гурыт еджапIэм щырегъажьэ. Шъуисэнэхьат шъуфэшъыпкъэу, гъэпсэф шъуимыIэу Iоф зэрэшъушIэрэм ишIуагъэкIэ гъэсэныгъэм исистемэ хэхъоныгъэхэр ешIых, ыпэкIэ лъэкIуатэ, ащкIэ лъэшэу тышъуфэраз. Непэ гумэкIыгъо гъэнэфагъэхэр, щыкIагъэхэр щыIэхэми, зищыIэныгъэ гъогу мы сэнэхьатым езыпхыгъэхэм япшъэрылъхэр щытхъу хэлъэу агъэцакIэх, — къыIуагъ Хъуажъ Аминэт.
Зэнэкъокъум хэлэжьагъэхэм гъэхъагъэу ашIыгъэхэм апае министрэр къафэгушIуагъ, псауныгъэ пытэ яIэу, цIыфхэм лъытэныгъэу къафашIырэм къыщымыкIэу, рагъаджэхэрэм агъэгушIохэу ыпэкIэ лъыкIотэнхэу къафэлъэIуагъ.
Республикэм ирайонхэм ыкIи икъалэхэм къарыкIыгъэ кIэлэегъэджэ 12 мыгъэ зэнэкъокъугъ. Тхьамафэм къыкIоцI ахэм заушэтыгъ, шIэныгъэу аIэкIэлъхэр къагъэлъэгъуагъэх. Зэфэхьысыжьэу ашIыгъэхэм-кIэ зэнэкъокъум лауреат щы-хъугъэ Мамхыгъэ гурыт еджапIэу N 4-м ублэпIэ классхэмкIэ икIэлэегъаджэу Хьакурынэ Сусанэ, Джэджэ районым игурыт еджапIэу N 4-м ублэпIэ классхэмкIэ икIэлэегъаджэу Светлана Дураченкэр, Мыекъопэ гурыт еджапIэу N 10-м географиер щязыгъэхьырэ Татьяна Сергеевар ыкIи Мыекъуапэ дэт гимназиеу N 22-м урысыбзэмрэ литературэмрэкIэ щезыгъэджэхэрэ Елена Ли дипломхэмрэ ахъщэ шIухьафтынэу сомэ мин 40 зырызрэ ахэм аратыжьы-гъэх.
Адыгеим икIэлэегъэджэ анахь дэгъу хъугъэр Адыгэ республикэ гимназием инджылызыбзэмкIэ щезыгъэджэхэрэ Денис Моловичкэр ары. ТекIоныгъэр къызэрэдихыгъэр къэзыушыхьатырэ Дипломыр, ахъщэ шIухьафтынэу сомэ мини 100-р ыкIи «Хрустальнэ пеликаныр» ащ къыфагъэшъошагъ.
Денис илъэсипшI хъугъэу кIэлэегъэджэ сэнэхьатым рэлажьэ. Иегъэджэн сыхьатхэр гъэшIэгъонхэу, зыми фэмыдэу зэрэзэхищэщтым пылъ. Инджылызыбзэр дэгъоу аIулъыным, ащкIэ гупшысэнхэм пае шIыкIэ-амал зэфэшъхьафхэр къызфегъэфедэх. Сэкъатныгъэ зиIэ кIэлэеджакIохэр яунэхэм арысхэу егъэджэгъэнымкIэ Гупчэм Iоф щешIэ. ЗипсауныгъэкIэ ялэгъухэм акIэмыхьэрэ ныбжьыкIэхэм инджылызыбзэр арегъашIэ.
Пстэумэ ауж 2016-рэ илъэсым икIэлэегъэджэ анахь дэгъу хъугъэм гущыIэр ыштагъ. Гъэсэныгъэм исистемэ хэхъоныгъэ егъэшIыгъэным лъэшэу ынаIэ зэрэтетыр ыкIи иIофшIэн зэрэлъигъэкIотэщтыр, кIэлэегъаджэхэм яIофшIагъэ мыщ фэдэу илъэс къэс къызэрэхагъэщырэр зэригуапэр къыIуагъ.
ПIатIыкъо Анет.