Къыблэм дзюдомкIэ изэнэкъокъу Мыекъуапэ щыкIуагъ. БлэкIыгъэ шэмбэтым аубли, мэфитIум къыкIоцI хъулъфыгъэхэри, бзылъфыгъэхэри алырэгъум щызэбэныгъэх. ХагъэунэфыкIырэ чIыпIэхэр къыдэзыхыгъэхэр Урысыем икIэух зэIукIэгъухэу Iоныгъо мазэм и 9 — 13-м Хабаровскэ щызэхащэщтхэм ахэлэжьэщтых.
Урысыем спортымкIэ изаслуженнэ мастерхэр, спортымкIэ дунэе класс зиIэ мастерхэр, хэгъэгум дзюдомкIэ ихэшыпыкIыгъэ командэхэм ахэтхэр Адыгеим щызэIукIагъэх.
ТизэдэгущыIэгъухэр
Урысые Федерацием дзюдомкIэ ихэшыпыкIыгъэ командэ итренер шъхьаIэхэм ащыщэу Тао Хьэсанбый тиреспубликэ дэгъоу щашIэ. Адыгэ къэралыгъо университетым физкультурэмрэ дзюдомрэкIэ и Институт къыухыгъ. Олимпиадэ джэгунхэм джэрз медалыр къащыдихыгъ.
— Къэбэртэе-Бэлъкъарым сыкъыщыхъугъ, — къеIуатэ Тао Хьэсанбый. — Адыгэ Республикэм ныбджэгъубэ щысиI. ГущыIэгъу сызыфэхъугъэхэм упчIабэ къысаты. Тхьаегъэпсэух, тызэщыгъупшэрэп. Дзюдом пылъ ныбжьыкIэхэм яIэпэIэсэныгъэ хагъэхъоным фэшI мыщ фэдэ зэIукIэгъухэм спортсмен цIэрыIохэр зэрахэлажьэхэрэм мэхьэнэ ин етэты. Кобл Якъубэ лъапсэ зыфишIыгъэ Мыекъопэ бэнэпIэ еджапIэр дунаим шIукIэ щашIэ. Адыгеим щапIугъэ кIалэхэр Олимпиадэ джэгунхэм, дунаим, Европэм ячемпион зэрэхъугъэхэм, медальхэр къызэрахьыхэрэм гъогу тэрэз тызэрэтетыр къаушыхьаты.
Къыблэ шъолъырым дзюдомкIэ ифедерацие илIыкIоу, Олимпиадэ джэгунхэм джэрз медалыр къащызыхьыгъэ Емыж Арамбыйрэ Адыгэ къэралыгъо университетым дзюдомкIэ ыкIи физкультурэмкIэ и Институт ипащэу Бгъуашэ Айдэмыррэ тизэдэгущыIэгъу къыхэлэжьагъэх. ЩысэшIум цIыфыр, анахьэу ныбжьыкIэхэр, зэрипIухэрэм яеплъыкIэхэр къыраIолIагъэх.
— Сэнаущыгъэ зыхэлъ бэнакIохэм талъэплъэ, спортышхом щылъыкIотэнхэм фэшI IэпыIэгъу тафэхъу, — къытиIуагъ А. Бгъуашэм.
Спорт шъошэ фыжьыр Мудранэ Бислъан щыгъэу тыIукIагъ. Алырэгъум щыбани, текIоныгъэр дахэу къызэрэщыдихыгъэр тлъэгъугъэ, тыфэгушIуагъ. Адыгэ республикэ гимназием Бислъан щеджагъ, республикэм самбэмкIэ испорт еджапIэ зыщигъасэзэ, дзюдо бэнакIэми нахь хэщагъэ хъугъэ.
Б. Мудранэр Урысыем дзюдомкIэ ихэшыпыкIыгъэ командэ хэт, Олимпиадэ джэгунхэу Рио-де-Жанейро мыгъэ щыкIощтхэм ахэлэжьэнэу зегъэхьазыры.
— Аужырэ илъэсхэм Краснодар краим икомандэ сыфэбанэ, — къеIуатэ Б. Мудранэм. — Дзюдор спорт лъэпкъ дах, алырэгъум утет зыхъукIэ, псынкIэу узэрэгупшысэн фаем уфегъасэ. Спортым шIэныгъэу къыуитырэр щыIэныгъэм щыогъэфедэ.
КIэухым къегъэлъагъо
Яонтэгъугъэхэм ялъытыгъэу бэнакIохэр зэнэкъокъугъэх. Килограмм 60-м нэс къэзыщэчырэмэ якуп нэбгырэ 20-м нахьыбэ щызэIукIагъ. Б. Мудранэм иIэпэIэсэныгъэ зэригъэфедэрэм тшIогъэшIэгъонэу тылъыплъэщтыгъ. Гум илъыр къэшIэгъуаеу тэлъытэми, Бислъан ибэнакIэ къыхэдгъэщыщтыгъэр бэнэгъур къыхьыным фэшI къыпэуцугъэ спортсменым гугъэ ин зэрэримытыщтыгъэр ары. Дэхъу Азэмат ебэнызэ, Бислъан псынкIэу зигъазэщтыгъ. Дзыгъохэр зишIыхэкIэ, бэнэпIэ алырэгъур афимыкъоу къэлъагъощтыгъ.
Апэрэ чIыпIэр Б. Мудранэм къыдихыгъ, Къэлэшъэо Заур ятIонэрэ, Дэхъу Азэмат ящэнэрэ хъугъэх.
ЯонтэгъугъэкIэ кг 66-рэ къэзыщэчыхэрэм якуп спортсмен 34-рэ щызэIукIагъ. ТекIоныгъэр Армен Авагян къыдихыгъ. Мудранэ Аслъан (Бислъан ар ыш) — ятIонэрэ, Тыкъо Дмитрий ящэнэрэ чIыпIэхэр къыдахыгъэх гъунэгъу краим фэбанэх.
Лафышъэ Ислъам, кг 73-рэ, Адыгеим ибэнакIу, дышъэ медалыр къыхьыгъ. Тиреспубликэ щыщхэу Нэгые Бислъанрэ Даур Анзоррэ джэрз медальхэр афагъэшъошагъэх. Купым нэбгырэ 28-рэ щызэIукIагъ.
ШъэоцIыкIу Айдэмыр, кг 87-рэ, апэрэ чIыпIэр фагъэшъошагъ, Тулпэрэ Айдэмыр финалым щыбэнагъ, ятIонэрэ чIыпIэр ыхьыгъ. БэнэкIо 24-рэ купым щызэIукIагъ.
Кг 90-рэ къэзыщэчыхэрэм якуп апэрэ чIыпIитфыр Краснодар краим щыщхэм ахьыгъ. Кг 100 къэзыщэчыхэрэр зызэбэнхэм, Ситимэ Азэмат чемпион хъугъэ, Шъхьэлэхъо Рустам ятIонэрэ чIыпIэр къыдихыгъ — тIури гъунэгъу краим фэбэнагъэх. Кг 100-м нахьыбэ къэзыщэчыхэрэм якуп Д. Мгоевыр чемпион щыхъугъ. ТибэнакIохэу Мэлыщэ Ахьмэдрэ Хьакурынэ Хьазрэтрэ джэрз медальхэр къыдахыгъэх.
Бзылъфыгъэхэм язэнэкъокъу Краснодар краим щыщхэр нахь чанэу хэлэжьагъэх. Адыгеим щыщэу Виктория Зайцевам тыжьын медалыр къыдихыгъ.
Зэфэхьысыжьхэр
Зэнэкъокъум исудья шъхьаIэу Олег Богдановым къызэрэтиIуагъэу, Урысыем икIэух зэIукIэгъухэу Хабаровскэ щыкIощтхэм ахэлэжьэнэу фаер макIэп, спортсменхэр яшъыпкъэу медальхэм афэбэнагъэх.
Андрей Заярныр, Рудольф Бабоян, Игорь Вержбицкэр, Хьажэкъо Мэдин, Иван Коротаскиныр, Мыхьамэт Бабаевыр, Хьэшхъуанэкъо Айвар судьяхэм якуп хэтыгъэх, зэIукIэгъухэр дэгъоу зэращагъэх. Адыгэ Республикэм дзюдомкIэ ихэшыпыкIыгъэ командэ итренер шъхьаIэу Бастэ Сэлым тызэрэщигъэгъозагъэу, Урысыем изэнэкъокъоу Хабаровскэ щыкIощтхэм ахэлэжьэщтхэр бэнэпIэ алырэгъум къыщыхахыгъэх. ХагъэунэфыкIырэ чIыпIэхэр Мыекъуапэ къыщыдэзыхыгъэхэм, нахьыпэкIэ Урысыем ичемпион хъугъэхэм хэгъэгум изэIукIэгъухэм зафагъэхьазырыщт.
Сурэтыр зэнэкъокъум къыщытетхыгъ.