Сэнэхьатэу цIыфыр зэрылэжьэщтыр нахьыбэрэмкIэ ицIыкIугъом къыхехы. ЫгукIэ пэблэгъэ лъэныкъом зыфещэи, ащ ищыIэныгъэ гъогу рипхыным къыфэущы.
Непэ зигугъу къэтшIы тшIоигъо бзылъфыгъэм цIыфхэм ишIуагъэ зэраригъэкIын ылъэкIын сэнэхьат зэригъэгъотыгъ. Трэхъо Светланэ Тэхъутэмыкъое район сымэджэщым Iоф зыщишIэрэр илъэсыбэ хъугъэ. А уахътэм къыкIоцI иIофшIэн зэрэзэхищэрэм ыгъэрэзагъэр бэ, цIыфхэм дахэкIэ заригъэшIагъ.
— Сятэ врач хъунэу лъэшэу фэягъ, — къытфеIуатэ Светланэ. — Хэгъэгу зэошхом илъэхъан ащ илъэс 18 ыныбжьыгъ. Заом хэлэжьагъ, нэужым Барнаул дэт авиационнэ заводым илъэсыбэрэ Iоф щишIагъ. Сятэ ыгукIэ врач сэнэхьатыр пэблэгъагъ, ау щыIэныгъэм чIыпIэ къинэу зэригъэуцуагъэхэм апкъ къикIыкIэ еджэн ылъэкIыгъэп. IофшIэнэу зэрылэжьагъэм къыхэкIэу ар бэрэ сымаджэщтыгъ. Ахэр зэкIэ сицIыкIугъом къыщегъэжьагъэу слъэгъущтыгъэ ыкIи врач сэнэхьатыр къызIэкIэзгъэхьанэу теубытагъэ сшIыгъэ.
Светланэ Тэхъутэмыкъуае дэт гурыт еджапIэр къызеухым, Кубанскэ къэралыгъо медицинэ университетым чIахьи терапевт сэнэхьатыр щызэригъэгъотыгъ. Нэужым къуаджэм дэт сымэджэщым къыгъэзэжьыгъ ыкIи ащ IофшIэныр щыригъэжьагъ.
— Тиуахътэ аужырэ шапхъэхэм адиштэрэ Iэмэ-псымэхэр зэрэщыIэм фэдагъэп сиIофшIэн зесэгъажьэм, — къеIуатэ Светланэ. — Сымаджэм илажьэр ор-орэу бгъэунэфын, ащ узэреIэзэщт лъэныкъохэр къэбгъотынхэ фэягъэ. Къыхэгъэщыгъэн
фае сиIофшIэгъухэри зэрэныбжьыкIагъэхэр, опытышхо зыIэкIэлъ къытхэтыгъэп. Ащ къыхэкIэу чIыпIэ къинэу тызпхырыкIыгъэр макIэп.
Светланэ къызэриIотэжьырэмкIэ, отделением нэбгыри 3-у Iутыгъэх. Ахэр зэдеIэжьхэзэ яIофшIэн агъэцакIэщтыгъэ. Хэхъоныгъэу ашIыгъэхэмкIэ, шIэныгъэу зэрагъэгъотыгъэмкIэ зэдэгуащэщтыгъэх.
— ЦIыфхэм IэпыIэгъу тафэхъуныр, тишIуагъэ ядгъэкIыныр типшъэрылъыгъ. Тызэгъусэу, зы унагъом фэдэу тызэхэтэу ащ тыдэлажьэщтыгъэ, — къеIуатэ тигущыIэгъу. — Сыд фэдиз такъикъ къинхэм тарыфагъэми, мы сэнэхьатыр къызэрэхэтхыгъэмкIэ тыкIэгъожьэу къыхэкIыгъэп. ЫпэкIэ тылъыкIотэным, тишIуагъэ зэдгъэкIыхэрэм ахэдгъэхъоным тыпылъ зэпытыгъ.
1990-рэ илъэсым нэс Светланэ терапевтэу Iоф ышIагъ. Нэужым поликлиникэми илъэс заулэрэ щылэжьагъ. 1999-рэ илъэсым къыщыублагъэу джырэ мафэм нэс врач шъхьаIэм игуадзэу Iоф ешIэ.
— Сэнэхьатэу къыхэсхыгъэр е Iоф зыщысшIэрэ чIыпIэр зэблэсхъун гухэлъ сшIэу къыхэкIыгъэп, — къытфеIуатэ Светланэ. — Шъыпкъэ, щыIэныгъэм чIыпIэ къинэу сапэ къыригъэкIыгъэр макIэп, ау сицIыкIугъом къыщегъэжьагъэу сыгукIэ къыхэсхыгъэу зэрэщытым къыхэкIыкIэ ахэр псынкIэу зэсынэкIынхэ слъэкIыщтыгъэ. IэпыIэгъу сызфэхъугъэу, сэ сишIуагъэкIэ ипсауныгъэ изытет нахьышIу зэрэхъугъэр зыслъэгъукIэ, ащ нахь мылъку лъапIэ сэркIэ щыIэп.
Трэхъо Светланэ гухахъо зыхигъотэрэ сэнэхьат зэрэзэригъэгъотыгъэм дакIоу унэгъо
дахэ ышIагъ. Ишъхьэгъусэрэ ежьыррэ пшъэшъитIу зэдапIу. Ипшъашъэхэр ежь илъэуж темыхьагъэхэми, цIыфыгъэрэ шъхьэкIэфэныгъэрэ ахилъхьан ылъэкIыгъ. Адыгагъэр, гукIэгъуныгъэр ягъогогъоу пшъэшъитIур Светланэ ыгъэсагъ.
Уиунагъо зэгурыIоныгъэ илъэу, угукIэ къыхэпхыгъэ сэнэхьатым урылажьэу, уишIушIагъэ цIыфхэм зэхашIыкIэу, лъытэныгъэ къыппагъохы зыхъукIэ, унасыпышIоу зыплъэтыжьыми хъущт. ГущыIэгъу тызыфэхъугъэ бзылъфыгъэм ахэр ыгъотыгъэх.
(Тикорр.).
Сурэтым итыр: Трэхъо Светлан.