Культурэм и Унэу Джэджэхьаблэ дэтым иIофышIэхэм мы аужырэ уахътэм IофшIэнхэр нахь гъэшIэгъонэу щызэхащэхэу аублагъ. Ар зыхъугъэр клубым ипащэу Тыгъужъ Руслъанэ дэлэжьэнхэу Бэрзэдж Светланэрэ Тхьаркъохъо Мыхьамодэрэ зырагъэжьагъэхэм ыуж. Ащ фэшыхьат ТекIоныгъэр къызыдахыгъэр илъэс 71-рэ зэрэхъугъэм фэгъэхьыгъэ мэфэкIышхом зызэрэфагъэхьазырыгъагъэр, зэрэрагъэкIокIыгъэр.
Джэджэхьэблэ чIыпIэ коим итхьаматэу Хьэшхъуанэкъо Мыхьамэт къызэрэтиIуагъэмкIэ, апэ КIыкI Юсыф зипэщэ гурыт еджапIэм икIэлэеджакIохэм ятэжъхэу, акъош-Iахьылхэу заом хэлэжьагъэхэм, щыфэхыгъэхэм ясурэтхэр аIыгъхэу къоджэ гупчэм ит саугъэтым къекIолIагъэх. КIэлэкIэ дэдэхэу пый мэхъаджэм жэхахьэхэзэ зыпсэ зытыгъэхэм ацIэ-алъэкъуацIэхэр ахэм атетхагъэх.
Мыщ дэжьым щызэхащэгъэ шIэжь зэхахьэм хэлэжьагъэх зэо кIыбым щыIагъэхэри, IофшIэным иветеранхэри, гурыт еджапIэм, IофшIэпIэ зэфэшъхьафхэм ялIыкIохэри. Ащ къыщыгущыIагъэх Хьэшхъуанэкъо Мыхьамэт, БлэнэгъэпцIэ Хьамидэ, КIыкI Юсыф, Хъут Якъубэ, нэмыкIхэри. Фэхыгъэхэм афэшъыгъуагъэх, саугъэтым къэгъагъэхэр кIэралъхьагъэх.
Нэужым ТекIоныгъэр къызыдахыгъэр илъэс 71-рэ зэрэхъугъэм фэгъэхьыгъэ шIэжь зэхахьэм къекIолIагъэхэр культурэм и Унэ рагъэблэгъагъэх. МэфэкI зэхахьэр зэрищагъ Бэрзэдж Светланэ. Ащ ипэублэ псэлъэ кIэкI ыуж гущыIэр ритыгъ чIыпIэ псэупIэм иадминистрацие ипащэу Хьэшхъуанэкъо Мыхьамэт. Хэгъэгу зэошхоу тикъэралыгъо инэбгырэ миллион 30 фэдиз зыхэкIодагъэм итхьамыкIагъо зэхимышIагъэу тикъуаджэхэм зы унагъуи къызэрадэмыкIыгъэр ащ къыIуагъ. ТипсэупIэхэм адэсыгъэ кIэлакIэхэм къащегъэжьагъэу нахьыжъхэм анэсыжьэу зэуапIэм Iухьэгъагъэх. Чылэхэм къадэнэжьыгъагъэхэр бзылъфыгъэхэр, нэжъ-Iужъхэр, зыныбжь имыкъугъэхэр арыгъэх. Зэо кIыбым щыIагъэхэри тхъагъэхэп. Ахэм акIуачIэкIэ губгъо IофшIэнхэр агъэцэкIагъ, зэуапIэм щыIэхэм ящыкIагъэр къалэжьыгъ, пыир зэхэкъутэгъэным, ТекIоныгъэр къыдэхыгъэным цIыкIуи ини фэлэжьагъ.
Ащ пыдзагъэу, мэфэкIышхомкIэ къафэгушIозэ, культурэм и Унэ щылажьэхэрэм яIофшIэн нахь зэрагъэлъэшыгъэр къыIуагъ, ар къоджэдэсхэм зэрягопэшхор къыхигъэщыгъ. ТикъэшъокIо ансамблэ районым ипэрытхэм ахалъытэ хъугъэ. «Звездочки Адыгеи» зыфиIорэ зэнэкъокъоу районым щырекIокIыгъэм дэгъоу хэлэжьагъэхэу ХъокIон Аидэ, Мыгухэу Самирэрэ Изабеллэрэ, Бэрзэдж Анжелэ щытхъу тхылъхэр Тхьаркъохъо Мыхьамодэ аритыгъ.
МэфэкI концертыр къызэIуихыгъ Пэнэжьыкъуае къыкIыгъэ орэдыIо ансамблэу «Орэд» зыфиIорэм. Ансамблэу «Сэтэнай» зыцIэм «Катюшэр» къызыхедзэм, залым чIэсхэр дежъыугъэх. Бэрзэдж Анжелэ, Мыгу Изабеллэ, ХъокIон Аидэ, Мыгу Самирэ орэдхэр агъэжъынчыгъэх, бэрэ Iэгу афытеуагъэх.
Джащ фэдэу концертым хэлэжьагъэх Маргарита Егоровар, Джэндэрэ Азмэт, ЛIыбзыу Даринэ, Бэрзэдж Анжелэ.
МэфэкI зэхахьэм къекIолIагъэхэм лъэшэу агу рихьыгъ, дахэу пэгъокIыгъэх яныбжьыкIэхэр зыхэтхэ ансамблэу, зэхащэгъакIэу «Нарты» зыфиIорэм. Ахэм «Удж хъураер», «ЗэфакIор» дахэу къашIыгъэх, лъэшэуи Iэгу афытеуагъэх.
Концерт ужым IофшIэным иветеранхэр, зэо кIыбым щыIагъэхэр, хабзэ зэрэхъугъэу, ахьэкIагъэх.
Нэхэе Рэмэзан.