Шэпхъэ лъагэхэм адиштэрэ агъэкощырэ кабинетхэр зыхэт Iэмэ-псымакIэу Адыгэ республикэ клиническэ онкологическэ диспансерым иIэм ишIуагъэкIэ цIыфхэм япсауныгъэ ауплъэкIу.
Агъэкощырэ кабинетым хэтых маммографыр, гинекологыр ыкIи УЗИ-кабинетхэр. Ахэм яшIуагъэкIэ республикэм ирайонхэм ащыпсэурэ цIыфхэм пэшIорыгъэшъ уплъэкIунхэр афашIынхэ, онкологием епхыгъэу уз яIэмэ къыхагъэщын алъэкIы.
Адыгэ Республикэм псауныгъэр къэухъумэгъэнымкIэ и Министерствэ иIофышIэхэм къызэраIуагъэмкIэ, мыщ фэдэ дэкIыгъохэм мэхьанэшхо яIэу щыт. Агъэкощырэ кабинетхэр къызыфагъэфедэхэзэ районхэм ащыпсэухэрэм пэшIорыгъэшъ хэушъхьафыкIыгъэ уплъэкIунхэр афашIыхэмэ, игъом ыкIи охътэ кIэкIым къыкIоцI адэбз уз зиIэхэр къыхагъэщынхэ алъэкIыщт. Ахэр нахьыжьэу къыхэбгъэщыхэ къэс узэряIэзэщтыри нахь IэшIэх хъущт.
Мыщ фэдэ дэкIыгъохэр къуаджэхэу Тэхъутэмыкъуае, Фэдз, селоу Натырбовым ыкIи поселкэу Дружбэм ащызэхащагъэх. Врач-онкологхэм зэкIэмкIи уплъэкIуни 196-рэ рагъэкIокIыгъ, нэбгырэ 334-рэ ауплъэкIугъ, ахэм ащыщэу 296-р бзылъфыгъэх, 38-р хъулъфыгъэх. Нэбгырэ 11-мэ адэбз уз яIэу агъэунэфыгъ, нэбгырэ 44-мэ а узым ифэмэ-бжьымэхэр къафыхагъэщыгъэх, адрэ нэбгыри 117-мэ нэмыкI узхэр яIэхэу уплъэкIунхэм къагъэлъэгъуагъэх. Мыхэр икIэрыкIэу ауплъэкIужьынхэу ыкIи къяIэзэнхэу специалистхэм адэжь агъэкIуагъэх.
2015-рэ илъэсым мобильнэ бригадэу «Онкостраж» зыфиIорэм испециалистхэм дэкIыгъо 25-рэ республикэм щызэхащагъ. А уахътэм къыкIоцI уплъэкIун 352-рэ рагъэкIокIыгъ ыкIи нэбгырэ мини 2-м кIахьэу япсауныгъэ изытет ауплъэкIугъ.
2015-рэ илъэсым адэбз уз яIэу диспансерым иучет нэбгырэ 11861-рэ хагъэуцуагъ. Тиреспубликэ щыпсэурэ цIыфхэм япчъагъэ егъэпшагъэмэ, ар проценти 2,5-м кIахьэ. ЦIыфым ыпкъынэ-лынэхэу тхьабылым, жьырыкIуапIэм, кIэтIыим, нэгъум адэбз узыр нахьыбэу къащыхагъэщых.
Специалистхэм зэралъытэрэмкIэ, адэбз узыр нахьыбэрэмкIэ къызэуалIэхэрэр тэрэзэу мышхэхэрэр, тутын ешъохэрэр ары. Джащ фэдэу тыгъэм лъэшэу зебгъэсты, гъомылъэпхъэ краскэ зыхэлъхэр пшхыхэ зэрэмыхъущтыр специалистхэм къыхагъэщых.
КIарэ фатим.