Хабзэ зэрэхъугъэу, жъоныгъуакIэм и 20-м АР-м и Лъэпкъ тхылъеджапIэ республикэ зэнэкъокъоу «Илъэсым ибиблиотекарь анахь дэгъу» зыфиIорэр щыкIуагъ. Ар тхылъеджапIэхэм я Мафэ ыкIи АР-р зызэхащагъэр илъэс 25-рэ зэрэхъурэм афагъэшъошагъ.
Iофтхьабзэм гухэлъэу иIагъэр сэнэхьатымкIэ библиотекарьхэм аIэкIэлъ шIэныгъэхэр, амал-къулайхэр къыхэгъэщыгъэнхэр, IофшIэкIэшIум шIыкIакIэхэр яIэубытыпIэхэу фэпIугъэнхэр ары.
Зэнэкъокъур лъэныкъуитф къызэдиубытэу гъэпсыгъагъэ:
«Сэ — сыбиблиотекарь!» (Визитнэ карточкэр);
«Библиоразминкэр»;
«СэнэхьатымкIэ IэпэIэсагъэр»;
Адыгэ Республикэр зызэхащагъэр илъэс 25-рэ зэрэхъурэмкIэ хъугъэ-шIэгъэ шъхьаIэхэр ащкIэ зэкIэлъыкIоу къэгъэлъэгъогъэныр (унэмкIэ гъэцэкIэнэу яIагъ);
«Адыгеир ощ пае къызэIух!» зыфиIорэ лъэныкъори республикэр тиIэ зэрэхъугъэм фэгъэхьыгъагъ.
2016-рэ илъэсымкIэ республикэ зэнэкъокъум гупчэ, къоджэ ыкIи къэлэ тхылъеджапIэхэу Адыгэ Республикэм итхэм яспециалистхэр хэлэжьагъэх.
МэфэкIыр къызэIуихыгъ ыкIи дэгъоу зэрищагъ телеведущэу Ахэджэго Рузанэ.
Республикэ зэнэкъокъум хэлэжьэн мурад зиIагъэр ыкIи ащ фэхьазырыгъэр нэбгыри 9:
ЖэнэлI Мэлайчэт Аркадий ыпхъур — Адыгэкъалэ игупчэ кIэлэцIыкIу тхылъеджапIэ ибиблиограф;
Гришина Гощэгъэгъ Маджыр ыпхъур — Мыекъуапэ итхылъеджапIэу N 5-м икъутамэ ипащ;
Прохода Римма Николай ыпхъур — Джэджэ районымкIэ Айрюмовскэ къоджэ тхылъеджапIэм ипащ;
Хьамдэхъу Замрэт Нурбый ыпхъур — Кощхьэблэ районым игупчэ тхылъеджапIэ библиографиемкIэ иотдел иIэшъхьэтет;
Сухорукова Марина Михаил ыпхъур — Красногвардейскэ районымкIэ гупчэ тхылъеджапIэм ибиблиограф;
Гарегинян Рената Иван ыпхъур — Мыекъопэ районымкIэ Шаумян чIыпIэ тхылъеджапIэм иIофышI;
АкIэгъу Ларисэ Казбек ыпхъур — Тэхъутэмыкъое районымкIэ Яблоновскэ къэлэ тхылъеджапIэу N 3-м ипащ;
Крылова Елена Николай ыпхъур — Теуцожь районымкIэ Петровскэ чIыпIэ тхылъеджапIэм ибиблиотекарь;
Даур Ларисэ Налбый ыпхъур — Шэуджэн районымкIэ гупчэ тхылъеджапIэм ибиблиограф;
Сэнэхьатым хэшIыкI дэгъу фызиIэ жюрим зэнэкъокъум уасэ ритыгъ, ащ хэтыгъэх: Лъэпкъ тхылъеджапIэм ипащэ игуадзэу Пэнэшъу ФатIимэт, жюрим итхьамэтагъ, Демьянкова Еленэ — шIэныгъэ-методическэ отделым ипащ, Мыгу Сарэ — краеведениемкIэ отделым ибиблиограф шъхьаI, Адыгэ республикэ организациеу культурэм иIофышIэхэм япрофсоюз итхьаматэу Пузанкова Людмилэ.
2016-рэ илъэсымкIэ республикэ зэнэкъокъум анаIэ анахь зытырагъэтыгъэр библиотекарьхэм ыкIи ахэм япащэхэм сэнэхьатымкIэ ухьазырыныгъэу яIэр, аIэкIэлъ шIэныгъэхэр ыкIи шIыкIэ-амалыкIэхэр яIофшIэн зэрэщагъэфедэхэрэр ары.
Жюрим изэфэхьысыжьхэм къызэрагъэлъэгъуагъэу, «2016-рэ илъэсым ибиблиотекарь анахь дэгъу» зыфиIорэ зэнэкъокъум текIоныгъэр, пэрыт чыпIищыр къыщыдэзыхыгъэхэм ацIэ къыщыраIуагъ:
А I-рэ чIыпIэр — Сухорукова Марина Михаил ыпхъур, Красногвардейскэ районымкIэ гупчэ тхылъеджапIэм ибиблиограф.
Я II-рэ чIыпIэр — Даур Ларисэ Налбый ыпхъур, Шэуджэн районымкIэ гупчэ тхылъеджапIэм ибиблиограф;
Я III-рэ чIыпIэр — Прохода Римма, Джэджэ районымкIэ Айрюмовскэ чIыпIэ тхылъеджапIэм ипащ.
Мыхэм зэкIэми ыкIи хэлэжьэгъэ нэбгырибгъум АР-м культурэмкIэ и Министерствэ ищытхъу тхылъхэр, шIухьафтынхэр, апэрэ чIыпIищыр зыубытыгъэхэм дипломхэмрэ ахъщэ шIухьафтынхэмрэ аратыгъэх.
Республикэ зэнэкъокъум хэлэжьагъ ыкIи псэлъэ фабэ къыщишIыгъ АР-м культурэмкIэ иминистрэ игуадзэу ШъэуапцIэкъо Аминэт.
Зэнэкъокъур мэфэкI нэшанэр къебэкIэу, ясэнэхьат зэрялъапIэр ыкIи яшъыпкъэу яIоф зэрашIэрэр къыушыхьатэу, творческэ екIолIэкIэ-шIыкIэр къыхэщэу гъэпсыгъагъэ.
Тхылъыр шIэныгъэм иIункIыбзэу зэрэщытыр ыкIи къызэрэнэжьырэр ащкIэ икъоу къыраIотыкIыгъ.
Мамырыкъо Нуриет.
Сурэтым итыр: зэнэкъокъум апэрэ чIыпIэр къыщыдэзыхыгъэу М.М. Сухоруковар.
Сурэтыр Iэшъынэ Аслъан тырихыгъ.