Зэтыгъоу атырэ ушэтынхэр рагъэжьэнхэкIэ мэфэ заул ныIэп къэнагъэр. Я 9-рэ классхэм ахэр жъоныгъуакIэм и 26-м, я 11-рэ классхэм и 27-м рагъэжьэщтых.
ИкIыгъэ тхьамафэм Рособрнадзорым республикэр ушэтынхэм зэрафэхьазырым ехьылIагъэу селекторнэ зэIукIэ зэхищэгъагъ.
Ащ хэлэжьагъэх ушэтынхэм зэкIэ язэхэщакIохэр. Селектор зэIукIэм ыуж АР-м иминистрэу Хъуажъ Аминэт къызэриIуагъэмкIэ, ушэтынхэм языфэгъэхьазырын ыкIэм фэкIуагъ, къэралыгъо кIэух аттестацием Адыгеир фэхьазыр.
Ушэтынхэм язэхэщакIохэу районхэм ыкIи къалэхэм къарыкIыгъэхэр зэIукIэм къыщыгущыIагъэх ыкIи Iофтхьабзэм зызэрэфагъэхьазырыгъэр къаIотагъ. ГъэрекIорэ ушэтынхэр нахь дэеу зытыгъэхэм Iоф зэрадашIагъэр ахэм къыхагъэщыгъ.
Мыгъэ къэралыгъо кIэух аттестацием я 9-рэ классхэм ушэтыни 4 щатыщт. Ахэм ащыщэу тIур шIокI имыIэу акIун фае, адритIумкIэ — ежьхэр зыфаехэр къыхахыщт.
Мыгъэ апэрэу адыгабзэмкIэ къэралыгъо ушэтынхэр зэхащэщтых. АдыгабзэмкIэ атынэу нэбгыри 148-мэ лъэIу тхылъхэр къатыгъэх. Мы предметымкIэ комиссиеу зэхащагъэм Iофышхо зэшIуихыгъ, охътэ кIэкIым къыкIоцI уплъэкIун-егъэпшэн материалхэр зэхагъэуцуагъэх.
ЗэIукIэм къыщаIуагъ ушэтынхэр зыщыкIощтхэ чIыпIэхэм (еджапIэхэм) япащэхэм пшъэдэкIыжьэу яIэр зэрэиныщтыр, ахэм яIофшIэн мэхьанэшхо зэриIэр.
— 2016-рэ илъэсым зэтыгъоу атыщт ушэтынхэр гъэрекIо фэдэу дэгъоу рекIокIынхэ фае. Тэ пшъэ-рылъэу тиIэр ахэр шъхьэихыгъэхэу ыкIи шъыпкъагъэ хэлъэу зэхэщэгъэнхэр ары, — къыIуагъ министрэу Хъуажъ Аминэт.
Сихъу Гощнагъу.