Урысые Федерацием и Къэралыгъо Думэ идепутатхэм яхэдзынхэм афэ-гъэхьыгъэ кампаниеу 2016-рэ илъэ-сым Iоныгъом и 18-м щыIэщтым къыдыхэлъытагъэу, Урысыем иполитическэ партиеу «Единэ Россием» жъоныгъуакIэм и 22-м праймериз зэхищагъ. Къэралыгъом ишъолъырхэр зэкIэ ащ хэлэжьагъэх.
Партием и Генеральнэ совет и Секретарэу Сергей Неверовым къызэриIуагъэмкIэ, пэшIорыгъэшъ хэдзынхэм нэбгырэ миллиони 9-м нахьыбэ ахэлэжьагъ.
— Хэдзынхэм ахэлэжьэнхэу фитыныгъэ зиIэхэм япроценти 8 фэдиз праймеризым къекIолIагъ, зыдырагъэштэрэ кандидатхэм амакъэ афатыгъ. Мы пчъагъэм къегъэлъагъо пэшIорыгъэшъ хэдзынхэм цIыфхэм мэхьанэшхо зэраратыгъэр. УФ-м и Къэралыгъо Думэ идепутатхэм яхэдзынхэу 2011-рэ илъэсым щыIагъэхэм язэфэхьысыжьхэм къафэбгъэзэжьымэ, хэдзэкIо миллион 32-мэ «Единэ Россием» амакъэ фатыгъагъ. Мы мафэхэм щыIэгъэ праймеризым къызэригъэлъэгъуагъэмкIэ, 2011-рэ илъэсым партием дезыгъэштэгъагъэхэм япроцент 25-рэ джыри хэдзыпIэ участкэхэм къякIолIагъэх, ар къэгъэлъэгъон дэгъоу плъытэн фае, — къыIуагъ С. Неверовым.
ПэшIорыгъэшъ хэдзынхэм язэфэхьысыжьхэр апэ зыщашIэщтхэр КIокIыпIэ Чыжьэмрэ Сыбыррэ. ЖъоныгъуакIэм и 25-м текIуагъэхэр зэкIэ къэнэфэщтых.
Адыгэ Республикэр пштэмэ, пэшIорыгъэшъ хэдзынхэм нэбгырэ мин 34-рэ фэдиз къякIолIагъ. УФ-м и Къэралыгъо Думэ идепутатхэм адакIоу, АР-м и Къэралыгъо Совет — Хасэм идепутатхэри Iоныгъом и 18-м республикэм щыхадзыщтых. Праймеризым изэфэхьысыжьхэм къагъэлъэгъощт цIыфхэм нахь зыдырагъэштэгъэ кандидатхэр.
Адыгеим щыпсэухэу хэдзынхэм ахэлэжьэнхэмкIэ фитыныгъэ зиIэхэм япроценти 10-р пэшIорыгъэшъ хэдзынхэм ахэлэжьагъ. ХэдзыпIэхэм нахьыбэу къякIолIагъэхэр Теуцожь районым исхэ ыкIи Адыгэкъалэ дэсхэ хэдзакIохэр арых. Мы муниципальнэ образованиитIум ащыпсэурэ ятфэнэрэ нэбгырэ пэпчъ праймеризым хэлэжьагъ.
— Хэдзынхэм язэфэхьысыжьхэм мэфэ заулэ аштэщт. Ау непэ пытагъэ хэлъэу къэпIон плъэкIыщтыр зы — пэшIорыгъэшъ хэдзыныр цIыфхэм ашIогъэшIэгъоныгъ, ащ мэхьанэшхо ратыгъ. ХэдзакIохэм ежь зыдырагъэштэрэ кандидатхэр гъэунэфыгъэнхэмкIэ партием ахэр упчIэжьэгъу зэришIыгъэхэр лъэбэкъу тэрэзыгъ, — еIо партием ишъолъыр къутамэу Адыгеим щыIэм иполитсовет и Секретарэу Iащэ Мухьамэд.
Праймеризым къыгъэлъэгъуагъ непэ хэдзакIохэм нахь зыдырагъэштэрэ, цыхьэ зыфашIырэ кандидатхэр. Зэфэхьысыжьхэм ялъытыгъэу УФ-м и Къэралыгъо Думэ идепутатхэм яхэдзынхэм ахэлэжьэщтхэм япартийнэ спискэхэр зэхагъэуцощтых.
— 2016-рэ илъэсыр мэхьанэшхо зиIэ унашъохэр зыщаштэщт илъэсэу щытыщт. А унашъохэр политикхэр, IэнатIэ зыIыгъ пащэхэр арэп зышIыщтхэр, Урысыем щыпсэурэ цIыф къызэрыкIохэр арых нахь, — къыIуагъ бэмышIэу партием ипащэу, УФ-м и Премьер-министрэу Дмитрий Медведевым. — Охътэ къиным къэралыгъор зыгъэзекIон, щыIэкIэ-псэукIэр нахьышIу зышIын, экономикэм зыпкъитыныгъэ иIэн, гумэкIыгъохэр зэхэзыфынхэ зылъэкIыщтхэр арых Iоныгъом щыIэщт хэдзынхэм цIыфхэм зыдырагъэштэщтхэр. Непэ чIыпIэ къин тызэритыр зэкIэми дэгъоу къыдгурэIо, ащ лъапсэу иIэри тэшIэ. Ащ фэдэ уахътэм партиер цIыфхэм зэраготыр, ахэм ягумэкIыгъохэр зэрэзэхишIэрэр, щыкIагъэхэр дигъэзыжьынхэм ынаIэ зэрэтетыр тиIофшIэнкIэ къэдгъэлъэгъон фае.
Адыгеим щыкIогъэ пэшIорыгъэшъ хэдзынхэм язэфэхьысыжьхэр, цIыфхэм нахь зыдырагъэштэгъэ кандидатхэр жъоныгъуакIэм и 25-м къэнэфэщтых.
ТХЬАРКЪОХЪО Адам.