УФ-м и Правительствэ и Тхьаматэу Дмитрий Медведевым унашъоу ышIыгъэм елъытыгъэу, республикэм ит аптекэхэм ащыщхэр Адыгеим и ЛIышъхьэу ТхьакIущынэ Аслъан тыгъуасэ къыкIухьагъэх.
Ахэм яIофшIэн зэрэзэхащэрэр, Iэзэгъу уцхэр къызэрэзыIэкIагъахьэхэрэр, ауасэ зыфэдизыр, щыкIагъэхэр щыIэхэмэ зэригъэшIагъ. Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем, АдыгеимкIэ Росздравнадзорым ипащэу Шымыгъэхъу Айтэч ТхьакIущынэ Аслъан игъусагъэх.
БэмышIэу Лениным иурам тет унэу N 34-м къыщызэIуахыгъэ уц щапIэр ары ТхьакIущынэ Аслъан апэ зэригъэлъэгъугъэр. Унэе предпринимателэу Апэзэо Аллэ къызэриIуагъэмкIэ, цIыфхэр къяолIэнхэм, ежьхэм ащэрэ Iэзэгъу уцхэр нахь ащащэфынхэм пае Iофтхьабзэхэр зэхащэх. Пенсионерхэм, ветеранхэм фэгъэкIотэн зэфэшъхьафхэр зэрафашIыхэрэм имызакъоу, нэмыкI аптекэхэм ягъэпшагъэмэ, ежьхэм ащэрэм ыуасэ нахь макI.
Джащ фэдэу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Вива Вита» зыфиIорэм АР-м и ЛIышъхьэ щыIагъ. Мыщ цIыфым ищыIэныгъэкIэ шIокI имыIэу ищыкIэгъэ Iэзэгъу уцхэр икъу фэдизэу чIэлъхэмэ, ахэм ауасэхэр шапхъэхэм адештэмэ ТхьакIущынэ Аслъан зэригъэшIагъ. Нэужым пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Санфарма» зыфиIорэм Адыгеим и ЛIышъхьэ кIуагъэ, ахэм яIофхэм язытети джащ фэдэу зыщигъэгъозагъ.
— Iэзэгъу уцхэм язэгъэгъотынкIэ Iофхэм язытет тылъэплъэ зэпыт. Анахьэу тынаIэ зытедгъэтырэр ахэм ауасэхэр ары, — къыIуагъ Адыгэ Республикэм и ЛIышъхьэу ТхьакIущынэ Аслъан. — Непэрэ уплъэкIунхэм къызэрагъэлъэгъуагъэмкIэ, шапхъэхэм адимыштэу, яIофшIэн тэрэзэу зэхэзымыщэрэ уц щапIэ дгъэунэфыгъэп. ЦIыфхэм ящыкIэгъэщт Iэзэгъу уцхэр ателъ. УплъэкIунхэм зэфэхьысыжьэу афэхъугъэхэм тагъэрэзагъ.
Адыгэ Республикэм псауныгъэр къэухъумэгъэнымкIэ иминистрэу Мэрэтыкъо Рустем къызэриIуагъэмкIэ, зэкIэмкIи Адыгеим аптекэ 238-рэ ит, ахэм ащыщэу 21-р къэралыгъом иех. Мы илъэсым пыкIыгъэ мэзиплIым Iэзэгъу уцхэм ауасэхэм процент 0,3-рэ къахэхъуагъ. Ахэр ащэхэ зыхъукIэ атырагъахъорэр Урысыем процент 23,4-м щынэсы, Адыгеим ар процент 19-м щышIокIырэп. Джащ фэдэу Мэрэтыкъо Рустем къыхигъэщыгъ министерствэм испециалистхэм мыгъэ уплъэкIун 32-рэ зэрашIыгъэр. Уасэхэр цIыфхэм ящыIэныгъэкIэ шIокI имыIэу ящыкIэгъэ Iэзэгъу уцхэр икъу фэдизэу ачIэлъхэмэ ахэм ауплъэкIугъэх, шапхъэхэм адимыштэрэ къыхагъэщыгъэп.
Ащ нэмыкIэу 2016-рэ илъэсым Росздравнадзорым уплъэкIун 83-рэ ышIыгъ. Адыгэкъалэ дэт зы уц щапIэ хэукъоныгъэхэр ащ къыщыхигъэщыгъэх.
АР-м и ЛIышъхьэу ТхьакIущынэ Аслъан игущыIэ къызэрэщыхигъэщыгъэмкIэ, аптекэхэр янэплъэгъу рагъэкIыщтхэп, Iэзэгъу уцхэр зэрифэшъуашэу зэрагъэгъотыным лъыплъэщтых.
Гъонэжьыкъо Сэтэнай.
Сурэтхэр А. Гусевым тырихыгъэх.