Илъэс къэс, мэлылъфэгъум и 25-м, адыгэ быракъым и Мафэ республикэм щыхагъэунэфыкIы. Къуаджэу Блащэпсынэ культурэм и Унэу дэтым ипащэу Отрэщ Симэ кIэщакIо фэхъуи, кIэлэцIыкIу IыгъыпIэхэр, гурыт еджапIэм икIэлэеджакIохэр, ныбжьыкIэхэр, къоджэдэсхэр къыхигъэлажьэхэзэ мэфэкI Iофтхьабзэм фэгъэхьыгъэ зэхэхьэшхо зэхищагъ.
Iофтхьабзэм хэлэжьагъэх Блащэпсынэ къоджэ псэупIэм ипащэу Шэуджэн Юрэ, Кощхьэблэ районымкIэ Адыгэ Хасэм ипащэу НэпшIэкъуй Аминэ, къуаджэм иветеранхэм я Совет итхьаматэу Щыщэ БетIал ыкIи советым хэтхэр, общественнэ организациехэм япащэхэр, нахьыжъэу чылэм дэсхэр. МэфэкI Iофтхьабзэр Адыгэ Республикэм игимнкIэ къызэIуахыгъ. Нэужым адыгэ лъэпкъым икомпозитор цIэрыIоу Тхьабысымэ Умарэ ыусыгъэ орэдэу «Бэрэчэт-босын» зыфиIорэр къырагъэIуагъ. Къоджэ гупчэр дахэу агъэкIэрэкIэгъагъ, кIэлэеджакIохэм лъэпкъ шъуашэхэр ащыгъхэу, адыгэ быракъыр аIыгъэу зэхахьэм хэлэжьагъэх. Блащэпсынэ дэт кIэлэцIыкIу IыгъыпIэу «Дэхэбын» зыфиIорэм икIэлэцIыкIухэм зэхахьэр къагъэдэхагъ, адыгэ шъуашэхэр ащыгъхэу адыгабзэкIэ усэхэр къаIуагъэх, къэшъуагъэх.
— Лъэшэу сигуапэу сирэзэныгъэ гущыIэхэр пэзгъохыхэ сшIоигъу шIушIэ общественнэ организациеу «Блащэпсын» зыфиIорэм хэтэу Болэкъо Аслъан. Адыгэ быракъ цIыкIухэу зэхахьэм щыдгъэфедагъэхэр къытфищагъэх, сыд фэдэрэ зэхахьэ тшIыми, ренэу ишIуагъэ къытегъэкIы, — къытиIуагъ Отрэщ Симэ.
Iофтхьабзэм хахьэу «Орэщхых егъашIэм сабыйхэр» зыфиIорэ къэгъэлъэгъоныр къоджэ гупчэм щырагъэкIокIыгъ. КIэлэцIыкIухэм ашIыгъэ сурэтхэр ащ къыщагъэлъэгъуагъэх. КIэлэпIухэу Болэкъо Заремэ, Вэрэкъо Джульеттэ, Шорэ Анжелэ ыкIи Щако Нурыет щытхъу хэлъэу мы Iофтхьабзэм къекIолIагъэх, кIэлэцIыкIухэм гушъхьэбаиныгъэ ахэлъэу, яхэгъэгу шIу алъэгъоу пIугъэнхэм мыхэр мыпшъыжьэу дэлажьэх. Ахэм ыкIи кIэлэцIыкIу IыгъыпIэм ипащэу Лафышъэ Мариет, методистэу Къунэ Сарэ зэрафэразэр къыхигъэщыгъ культурэм и Унэ ипащэ.
Адыгэ быракъым тарихъэу пылъыр, мэхьанэу иIэр къыраIотыкIхэзэ зэхахьэм къыщыгущыIагъэх Шэуджэн Юрэрэ НэпшIэкъуй Аминэрэ. Тибыракъ адыгэ лъэпкъым итарихъ куоу зэрепхыгъэр ыкIи ащ шъхьэкIэфэныгъэшхо фэтшIын зэрэфаер ахэм кIагъэтхъыгъ.
МэфэкI Iофтхьабзэр гъэшIэгъонэу рекIокIыным зиIахьышIу хэзышIыхьагъэхэм ащыщых кIэлэегъаджэхэу Къазнэкъо Аскэрбый, Къэщый Жаннэ, КIэдыкIое Оксанэ, Щыгъущэ Сусанэ. Адыгэ быракъым фэгъэхьыгъэ усэхэм IупкIэу къяджагъэх кIэлэеджакIохэу Бжьашъэ Миланэ, Вэрэкъо Рустем, Хьаткъо Бислъан ыкIи Дыбэгъо Мадинэ.
Симэ ирэзэныгъэ гущыIэхэр апегъохых поселкэу Майскэм икIэлэцIыкIу IыгъыпIэу N 7-м ипащэу Индрыс Рузанэрэ музыкальнэ пащэу Къушъхьэ Зоерэ. Ахэм ягъусэхэу къыздащэгъэ кIэлэцIыкIухэм «Къушъхьэмэ ясабыйхэр» зыцIэ къэшъо дахэр къашIыгъ ыкIи Iофтхьабзэр къагъэкIэрэкIагъ.
— Адыгэ лъэпкъыр ыпэ лъыкIотэнымкIэ, тикIэлэцIыкIухэм язэхашIэ къэгъэущыгъэнымкIэ мыщ фэдэ Iофтхьабзэхэм яшIогъэшхо къэкIо, — еIо Отрэщ Симэ. — Ахэм яшIуагъэкIэ Адыгеим изыпкъитыныгъэ нахь пытэ мэхъу ыкIи мамырныгъэмрэ зэгурыIоныгъэмрэ кIэлэцIыкIухэр зэфещэх.
Iофтхьабзэм икIэухым чылэм нахьыжъэу дэсхэм ащыщхэр къэгущыIагъэх, зэхэщакIохэм «Тхьашъуегъэпсэу» араIуагъ. ТапэкIи хэбзэшIу хъугъэ Iофтхьабзэр лъагъэкIотэнэу, ренэу тиадыгэ быракъ быбэтэнэу къафэлъэIуагъэх.
КIарэ Фатим.
Сурэтым итхэр: Блащэпсынэ щыщхэу адыгэ быракъым имэфэкI Iофтхьабзэ хэлэжьагъэхэр.