Хы ШIуцIэ Iушъом Константин Затулиныр дэгъоу щашIэ. Ар Къэралыгъо Думэм щэгъогогъо щыхадзыгъ, тапэкIэ Шъачэрэ ТIопсэ районымрэ яфедэхэр ащ къыщигъэлъэгъуагъэх. Джащ къыхэкIэу къуаджэхэм бэрэ адэхьан, цIыфхэм адэгущыIэн фаеу хъущтыгъэ. НэмыкIхэм ар зэрашIэрэр политологэу, СНГ-м хэхьэрэ хэгъэгухэм я Институт идиректорэу, телекъэтыныр зезыщэу ары. Къоджэдэсхэм Урысые Федерацием и Общественнэ палатэ хэт Константин Затулиным цыхьэшхо фашIы.
Шъачэ и ШэхэкIэй, и Лыгъотх (Къэлэжъ) къоджэ койхэр километрипшI пчъагъэкIэ зэпэIудзыгъэхэми, зэхьщыр Iофыгъохэр апашъхьэ итых. Партиеу «Единэ Россием» ыцIэкIэ Къэралыгъо Думэм хагъэхьанэу зикандидатурэ къагъэлъэгъогъэ Константин Затулиным IукIэнхэу къэкIуагъэхэм IофшIэнымкIэ ащ опытышхо зэриIэм, чIыпIэ Iофыгъохэм куоу зэращыгъуазэм, зэрэчаным, цIыфыгъэ, зэфагъэ зэрэхэлъхэм пае лъытэныгъэшхо фашIы. Сыдигъуи фэмыдэу непэ Къэралыгъо Думэм щылэжьэн фаехэр зиIоф хэшIыкIышхо фызиIэхэр, хэдзакIохэм яфедэхэр яшъыпкъэу къэзыгъэгъунэн зылъэкIыщтхэр, политикэ структурэ инхэм осэшхо ащызиIэхэр ары.
— Мызэу, мытIоу сэ мы чIыпIэхэм сащыIагъ. Непэ мыщ сыкъызыкIэкIуагъэр нахьышIум ылъэныкъокIэ зэхъокIыныгъэу шъуиIэхэм, джы къызнэсыгъэм Iофыгъоу зэшIошъумыхышъугъэхэм защызгъэгъозэнэу ары, — къыщиIуагъ Константин Затулиным ШэхэкIэишхом дэсхэм адыриIэгъэ зэIукIэгъум. — ЦIыфхэм ягумэкIыгъохэр зэбгъэшIэнхэм, къоджэдэсхэмкIэ зигъо дэдэ Iофыгъохэм язэшIохынкIэ анахь къекIурэ амалхэр къэгъотыгъэнхэм мэхьанэшхо яI.
Хэгъэгум экономикэмкIэ иIофхэм язытет зэIукIэм щытегущыIагъэх, къоджэдэсхэм апашъхьэ ит Iофыгъо шъхьаIэхэм щалъыIэсыгъэх. ЧIыгум игъэфедэн епхыгъэ Iофыгъор анахь шъхьаIэхэм ащыщ. Iахьзэхэлъ обществэхэм яIэрылъхьэ чъыгхатэхэмрэ щай къэгъэкIыпIэхэмрэ зэрэчIадзыжьхэрэм, цIыраужъ зэрэхъухэрэм къоджэдэсхэри, Адыгэ Хасэм хэтхэри лъэшэу егъэгумэкIых. Унэе, фермер хъызмэтшIапIэхэр зэхэзыщэ зышIоигъохэм охътэ кIыхьэм телъытагъэу чIыгур бэджэндэу къаIахын алъэкIырэп. ЧIыгум ехьылIэгъэ Iофыгъор зэшIуамыхэу хы ШIуцIэ Iушъом щыпсэурэ шапсыгъэхэм янэмыкI Iофыгъохэри зэшIуахынхэ алъэкIыщтэп.
Федеральнэ законэу «ЕгъашIэми Урысые Федерацием щыпсэурэ лъэпкъхэу зипчъагъэкIэ макIэ хъухэрэм яфитыныгъэхэмкIэ гарантиехэм яхьылIагъ» зыфиIорэм игъэцэкIэнкIэ, зекIоным зегъэушъомбгъугъэнымкIэ, хы ШIуцIэ Iушъом ичIыопс дахэ къызэтегъэнэжьыгъэнымкIэ Iофыгъоу зэуталIэхэрэм атегущыIагъэх. ГущыIэм пае, псыхъохэу Шахэрэ Iащэрэ якIэйхэм адэсхэр мыжъо-пшэхъо зэхэлъыр хэбзэнчъэу япсыхъохэм къадэзыщыхэрэм илъэс къэс апэуцужьынхэ фаеу мэхъух.
Сабыибэ зэрыс унагъохэм социальнэ IэпыIэгъу ягъэгъотыгъэн, кIэлэцIыкIу IыгъыпIакIэрэ стадионрэ ШэхэкIэишхом щыгъэпсыгъэнхэ зэрэфаем игугъуи къашIыгъ.
— Къоджэдэсхэр зыгъэгумэкIырэ Iофыгъохэм ащыщхэр чIыпIэхэм ащызэшIуахын алъэкIыщт, — къыщиIуагъ зэIукIэм Константин Затулиным. — Адрэ Iофыгъо анахь къинхэр къызыхэкIыхэрэр икъоу зэхэфыгъэнхэ ыкIи федеральнэ гупчэр тиIэпыIэгъоу ахэр зэшIохыгъэнхэ фае. Iоф зыдэтшIэн икъун щыI.
Ныбэ Анзор.