ЯшIэныгъэ пIуныгъэм дештэ

noname

Адыгэ Республикэм искусствэхэмкIэ иколледжэу У. Тхьабысымым ыцIэ зыхьырэм щыкIогъэ концертым кIэлэцIыкIу еджапIэхэм защызыгъасэхэу зэнэ­къокъухэм щытхъуцIэхэр къащыдэзыхыгъэхэр хэлэ­жьагъэх.

DSC_0358

Республикэм культурэмкIэ ими­нистрэ иапэрэ гуадзэу Нафиса Васильевам ипэублэ гущыIэ къы­щыхигъэщыгъ искусствэхэмкIэ кIэ­лэцIыкIу еджапIэхэм ачIэсхэр хэ­гъэгу, Дунэе фестивальхэм, зэ­нэкъокъухэм мыгъэ бэрэ зэ­ра­хэлэжьагъэхэр. ЩытхъуцIэхэр къы­дэзыхыгъэхэр арых кIэух концертым къырагъэблэгъагъэхэр.

Илъэсым къыкIоцI Адыгеим ис­кусствэхэмкIэ икIэлэцIыкIу еджа­пIэу К. Лъэцэрыкъом ыцIэ зыхьырэм методикэмкIэ икабинет, республикэм культурэмкIэ и Ми­нистерствэ, Адыгеим искусствэ­хэмкIэ иколледжэу У. Тхьабысы­мым ыцIэ зыхьырэр ­зэгъусэхэу республикэм зэнэкъокъуи 6, къэ­гъэлъэгъони 3, Темыр Кавказым икIэлэцIыкIухэм яшъолъыр зэIу­кIэгъу, нэмыкIхэри зэхащагъэх.

DSC_0355

Зэнэкъокъухэм кIэлэцIыкIу 500 фэдиз, искусствэхэмкIэ еджапIэ­хэм якуп 25-рэ ахэлэжьагъэх. Адыгеим икIэлэеджэкIуи 164-мэ, куп 17-мэ текIоныгъэр къыдахыгъ, шIухьафтынхэр афашIыгъэх.

Н. Васильевам къызэриIуагъэу, Мыекъуапэ, Адыгэкъалэ, Тэхъутэ­­мыкъуае якIэлэцIыкIу еджа­пIэ­хэм хэхъоныгъэхэр ашIыгъэх. Гъо­бэкъуае, Пэнэжьыкъуае, Шэу­джэн районым искусствэхэмкIэ яеджапIэхэм щыкIагъэхэр афэ­хъух. ЗэхъокIыныгъэхэм шIуагъэ къатыщтэу зэхэщакIохэр мэгу­гъэх.

DSC_0337Концертыр

Мыекъуапэ искусствэхэмкIэ икIэлэцIыкIу еджапIэу N 1-м ихор ипащэу Е. Поповам къыщытхъу­гъэх. КIалэхэмрэ ­пшъашъэхэмрэ зэхэтхэу произведениехэр къаIуа­гъэх. ФортепианэмкIэ, скрип­кэм­кIэ, шыкIэпщынэмкIэ, нэмыкI му­зыкальнэ Iэмэ-псымэхэмкIэ орэ­ды­шъохэр кIэлэеджакIохэм агъэ­жъынчыгъэх.

DSC_0372Шымыгъэхъу Даринэ зэнэкъо­къухэм ахэлажьэу бэрэ тэлъэ­гъу. Шъошэ фыжь дахэр щыгъэу пчэгум къихьи, скрипкэмкIэ тикомпозитормэ аусыгъэхэр къыри­гъэIуагъэх. А. Аулъэм иIэпэIэсэ­ныгъэ фортепианэмкIэ къыгъэ­лъэ­гъуагъ. ЦIыфыр дэхагъэм фэ­зыпIурэ музыкэм кIэлэеджакIохэр фэщагъэхэ зэрэхъухэрэм те­гъэгушIо.

Адыгэкъалэ искусствэхэмкIэ иеджапIэ зыщегъасэ пщынэо цIы­кIоу ХъокIо Муратэ, икIэлэегъа­джэр Хьэкомэ Сим. ­Шъэожъыем къыдежъыухэзэ лъэпкъ произве­дениехэр ыгъэIугъэх. Республикэм искусствэхэмкIэ икIэлэцIыкIу еджапIэу К. Лъэцэрыкъом ыцIэ зыхьырэм икIэлэегъаджэу ГъукIэ Замудин ыгъасэхэрэм яIэ­пэIэсэ­ныгъэ хагъахъо. Лъэпкъ орэды­шъоу зэхэтхыгъэхэр гум ре­хьых.

Адыгэ шъуашэм идэхагъи концертым кIэлэеджакIохэм къыща­гъэлъэгъуагъ, къэшъуагъэх, орэдхэр къаIуагъэх. Искусствэм кIэлэ­еджакIохэр зэрипIухэрэр зэхахьэм къыхэщыгъ.

Сурэтхэр зэхахьэм къыщытетхыгъэх.