Публичнэ Iахьзэхэлъ обществэу «Кубаньэнерго» зыфиIорэм и Адыгэ электрическэ сетьхэм яIофышIэхэм цIыфхэм агъэстыгъэ электроэнергиер къэзылъытэу автоматикэ шIыкIэм тетэу Iоф зышIэрэ прибор миным ехъу Шэуджэн районым икъоджэ псэупIи 5-мэ адагъэуцуагъэх.
ШэпхъакIэхэмкIэ Iоф зышIэрэ приборхэу «Квант» зыфиIохэрэр къуаджэхэу Хьатыгъужъыкъуае, Пщычэу, Къэбыхьаблэ, къутырхэу Кировым, ХьапэкIае ащыпсэухэрэм ыкIи унэе псэупIэхэм афагъэуцугъэх. Мы приборыкIэхэр электроэнергиер нахь кIэугъоягъэ хъуным, хэбзэнчъэу ыпкIэ хэмылъэу амыгъэфедэным, агъэфедагъэр зыфэдизыр хэукъоныгъэ хэмытэу къэлъытэгъэным атегъэпсыхьагъэхэу щытых. Операторыр зыдэщысым зэрэщысэу унагъом ыгъэфедагъэр зыфэдизри, приборым изытети, зэхъокIыныгъэ горэ фэхъугъэми ылъэгъущт, ищыкIагъэмэ, къыпиупкIынышъ, бгъэфедэн умылъэкIынэуи къышIын амал иIэщт. ЫпэкIэ инспекторхэр, контролерхэр къызэрекIокIыщтыгъэхэм фэдэу джы унагъохэр къакIухьажьыщтхэп. Счетчикыр унэе псэупIэм е нэмыкI унэ горэм ращэлIэным пае электрорыкIуапIэу унэм екIуалIэрэр лъэхъаным къызыдихьыгъэ шIыкIакIэхэм атетэу шIыгъэ — жьыбгъи, оси, ощхи, щтыргъукIи яягъэ екIыщтэп, чъыгыр къытефагъэми, ыгъэфыкъонэу щытэп.
ШэпхъакIэхэм адиштэрэ счетчикхэр ыпкIэ хэмылъэу цIыфхэм афагъэуцух. Мы приборхэм чэщымрэ мафэмрэ зэтефыгъэу электричествэм ыуасэ къэзыгъэлъэгъощт тарификаторхэр ахэтых. Ащ ишIуагъэкIэ электроэнергиер кIэугъоягъэ мэхъу ыкIи унагъом нахь макIэу ащ ыуасэ ытынэу ары специалистхэм зэралъытэрэр.
КIарэ Фатим.