ЖъоныгъуакIэм и 14-м лъыдэкIуаем пэшIуекIогъэным и Дунэе мафэ хагъэунэфыкIыгъ.
Псауныгъэм и Гупчэ иIофышIэхэм Мыекъопэ къэралыгъо технологическэ университетым иволонтерхэр ягъусэхэу мэлылъфэгъу мазэм «Сердце для жизни» зыфиIорэ Iофтхьабзэр зэхащагъ.
Ащ къыдыхэлъытагъэу мазэм къыкIоцI фэе пстэуми ялъыдэкIуае ауплъэкIугъ. Ар мытэрэзэу къызыхагъэщыгъэхэр нахь игъэкIотыгъэу щауплъэкIунхэу псауныгъэм и Гупчэ агъэкIуагъэх.
ЗэкIэмкIи Iофтхьабзэм нэбгырэ 295-рэ хэлэжьагъ. КIэлэеджакIохэр, Iоф зышIэхэрэр, нэмыкIхэри ащ къекIолIагъэх.
Зэфэхьысыжьхэм къызэрагъэлъэгъуагъэмкIэ, илъыдэкIуае шапхъэхэм анахь инэу нэбгырэ 77-рэ агъэунэфыгъ — бзылъфыгъэ 33-рэ ыкIи хъулъфыгъэ 44-рэ. Адыгэ Республикэм псауныгъэр къэухъумэгъэнымкIэ и Министерствэ къызэрэщаIуагъэмкIэ, мы Iофтхьабзэм къызэрэдыхэлъытагъэу, къэлэ поликлиникэхэм мы лъэныкъом лъэшэу анаIэ тырагъэтыщт, АР-м медицинэ профилактикэмкIэ и Гупчэ «Школа пациента» зыфиIорэ Iофтхьабзэр щыкIощт. ЖъоныгъуакIэм и 25-м «Сердце для жизни» зыцIэ Iофтхьабзэм хэлэжьэщтых Адыгеим и Къэралыгъо академическэ къэшъокIо ансамблэу «Налмэс» зыфиIорэм хэтхэр.
ЛъыдэкIуаем ыгъэгумэкIыхэрэм ахэхъо. Пчъагъэхэм къызэрагъэлъагъорэмкIэ, мыщ ыпкъ къикIыкIэ илъэс къэс нэбгырэ миллиони 7 фэдиз дунаим ехыжьы. Нэбгырэ миллион 15-м ехъу лъыдэкIуаем егъэгумэкIы. 2015-рэ илъэсым лъыдэкIуае иIэу нэбгырэ 15653-рэ агъэунэфыгъ. Мы узым ыпкъ къикIыкIэ блэкIыгъэ илъэсым нэбгыри 121-мэ ядунай ахъожьыгъ.
Специалистхэм къызэраIорэмкIэ, цIыфым ыныбжь емылъытыгъэу лъыдэкIуаер инын ылъэкIыщт. Зыныбжь хэкIотагъэхэм, ныбжьыкIэхэм ялъытыгъэмэ, мы узыр нахьыбэрэ къахагъэщы. Илъэс 20-м къыщегъэжьагъэу 30-м нэс зыныбжьхэм я 10-рэ пэпчъ илъыдэкIуае шапхъэхэм ашIокIэу агъэунэфыгъ. Илъэс 40-м къыщегъэжьагъэу 50-м нэс — я 5-рэ пэпчъ, илъэс 60-м ыкIи ащ нахьыжъхэм — нэбгырищ пэпчъ нэбгыритIумэ ялъыдэкIуае ины. Мы узыр къызежьэрэр бгъэунэфын плъэкIыщтэп, ащ къыхэкIэу цIыфым къымышIэу иягъэ къекIы. Арышъ, лъыдэкIуаем зыщыуухъумэным пае ащ ренэу улъыплъэн фае.
Гъонэжьыкъо Сэтэнай.