Тигъэзет къызэрэхиутыгъэу, «Адыгэ Республикэм иреспубликэ бюджет 2015-рэ илъэсым гъэцэкIагъэ зэрэхъугъэм ехьылIагъ» зыфиIорэ едэIунхэр мы мафэхэм зэхащагъ.
Депутатхэр, министрэхэм я Кабинет хэтхэр, къулыкъу ыкIи ведомствэ зэфэшъхьафхэм ялIыкIохэр, студентхэр зыхэлэжьэгъэ Iофтхьабзэр зэращагъ АР-м финансхэмкIэ и Министерствэ ипащэу Долэ Долэтбыйрэ Адыгеим и Къэралыгъо Совет — Хасэм бюджет-финанс ыкIи хэбзэIахь политикэмкIэ икомитет итхьаматэу Мырзэ Джанбэчрэ.
2015-рэ илъэсым бюджетыр, ащ къыдыхэлъытагъэу, УФ-м и Президент къыдигъэкIыгъэ жъоныгъокIэ унашъохэр, социальнэ пшъэрылъхэр гъэцэкIагъэхэ зэрэхъугъэм къатегущыIагъ министрэу Долэ Долэтбый. Къиныгъохэр щыIагъэх нахь мышIэми, къатефэрэр зэрэзэшIуахыгъэр, социальнэ программэхэр шIокI имыIэу зэрагъэцэкIагъэхэр, ащкIэ Iофэу ашIагъэм федеральнэ гупчэм осэшIу къызэрэфишIыгъэр ащ къыхигъэщыгъ. Зэфэхьысыжьхэм адакIоу, бюджетым игъэпсынкIэ мы илъэсым анахьэу анаIэ зытырагъэтыщт лъэныкъохэм, гумэкIыгъоу ыкIи щыкIагъэу щыIэхэм къащыуцугъ.
Мэхьанэшхо зиIэхэм ащыщэу министрэм зигугъу къышIыгъэр республикэм игъогухэм ягъэкIэжьын, ягъэцэкIэжьын епхыгъэ Iофыгъохэм язэшIохын ары. БлэкIыгъэ илъэсым республикэм и Гъогу фонд сомэ миллион 950,4-рэ хъущтыгъ, ащ щыщэу агъэфедагъэр сомэ миллион 891,9-рэ. Республикэ ыкIи межмуниципальнэ мэхьанэ зиIэ автомобиль гъогухэм язытет нахьышIу шIыгъэным сомэ миллион 682,2-рэ, чIыпIэ мэхьанэ зиIэ гъогухэм гъэцIэкIэжьынхэр яшIылIэгъэнхэм пае муниципальнэ бюджетхэм субсидиеу сомэ миллиони 152,7-рэ, гъогу хъызмэтым игъэIорышIэн ыкIи мыщ епхыгъэ нэмыкI Iофтхьабзэхэм ягъэцэкIэн сомэ миллион 56,9-рэ апэIуагъэхьагъ.
Джащ фэдэу республикэм игъогу хъызмэт хэхъоныгъэхэр ышIынхэм фэшI федеральнэ бюджетым сомэ миллион 204,9-рэ къытIупщыгъ. Зэнэкъокъу Iофтхьабзэхэм язэхэщэн охътабэ зэрихьыгъэм къыхэкIыкIэ мы мылъкум щыщэу агъэфедэн алъэкIыгъэр сомэ миллион 83-рэ ныIэп. Адрэ къэнэгъэ сомэ миллиони 121,9-р мэлылъфэгъу мазэм республикэм къыфызэкIэкIожьыгъ.
Республикэм игъогу фонд къыхэхыгъэ мылъкумкIэ 2015-рэ илъэсым Адыгеим игъогухэр, лъэмыджхэр агъэцэкIэжьыгъэх, аужырэ шапхъэхэм адиштэу зэтырагъэпсыхьагъэх, непи мы IофшIэныр лъагъэкIуатэ.
ТХЬАРКЪОХЪО Адам.