Адыгэ Республикэр мамырныгъэрэ рэхьатныгъэрэ зэрылъ шъолъыр. Ащ лъэпкъыбэ дахэу щызэдэпсэу.
Республикэм исхэм янахьыбэр урысыбзэм рэгущыIэх ыкIи зэрепхых. Ау адыгэхэу нэмыкI къэралхэм ащыпсэугъэхэу, хэкужъым къэзыгъэзэжьыгъэхэм янахьыбэм бзэу аIулъыр арапыбзэр ары. Ащ епхыгъэу, арапыбзэр республикэм щызэгъэшIэгъэныр игъоу зылъэгъухэрэри щыIэх. А мурадым ахэр кIэхъопсых. Джары ахэм апае бзэмкIэ (арапыбзэмкIэ) клуб зэхэщэгъэныр Лъэпкъ тхылъеджапIэм IэкIыб къэрал литературэмкIэ иотдел иIофышIэхэм игъоу зыкIалъэгъугъэр.
Мы отделым ипащэу Юля Харичкинам дэгъоу ешIэ бзэ лые зэрэщымыIэр, бзабэ пшIэным шIуагъэ зэриIэр. Юле Адыгэ къэралыгъо университетым IэкIыб къэралыгъуабзэхэмкIэ ифакультет къыухыгъ, инджылызыбзэр, нэмыцыбзэр зэришIэхэрэр, ахэм яшIуагъэ къызэрэкIорэр къеIуатэ.
БзэмкIэ клубым иIофшIэн фэгъэзэгъэщтыр арапыбзэр дэгъоу зышIэу Кинда Осман ары. Ащ ителефон: 8(962) 767-30-86. Егъэджэн сыхьатхэр апкIэ хэмылъэу гъэпсыгъэх, ау купхэр зэIугъэкIэгъэнхэ фае.
Арапыбзэр зэзыгъашIэ зышIоигъо пстэуми (ныбжьым емылъытыгъэу), Лъэпкъ тхылъеджапIэм къыщяжэх.
(Тикорр.).