ЖъоныгъуакIэм и 13-м Мыекъопэ къэралыгъо гуманитар-техническэ колледжым истудентхэр хьыкум приставхэм я Федеральнэ къулыкъу и ГъэIорышIапIэу Адыгэ Республикэм щыIэм ихьэкIагъэх. Мы къулыкъум иIофшIэн зэрэзэхищэрэм ныбжьыкIэхэм зыщагъэгъозагъ. Гъэсэныгъэм иучреждениерэ ГъэIорышIапIэмрэ зэзэгъыныгъэу зэдашIыгъэм диштэу мы Iофтхьабзэр зэхащагъ.
«ХэбзэухъумэкIо IофшIэныр» зыфиIорэ сэнэхьатыр зэзыгъэгъотырэ студентхэм ГъэIорышIапIэр къарагъэплъыхьагъ, къулыкъум иIофшIэн зэригъэпсырэр, пшъэрылъэу зыфигъэуцужьхэрэр къафаIотагъэх.
Джащ фэдэу къулыкъушIэхэм яшъуашэ, агъэфедэрэ хэушъхьафыкIыгъэ Iашэхэр арагъэлъэгъугъэх. Спортзалым чIэхьагъэх, ГъэIорышIапIэм икъулыкъушIэхэм физическэ ухьазырыныгъэу, бэнэкIэ зэфэшъхьафхэмкIэ IэпэIэсэныгъэу аIэкIэлъыр кIэлэ ныбжьыкIэхэм арагъэлъэгъугъ.
Нэужым ГъэIорышIапIэр зычIэт къулыкъушIэ унэр студентхэм къаплъыхьагъ, щэрыонымкIэ зызщагъасэрэм екIолIагъэх. Iашэм узэрэдэзекIощтыр, мыщ дэжьым щынэгъончъэным ишапхъэхэр бгъэцэкIэнхэ зэрэфаер ныбжьыкIэхэм къафаIотагъ. Зэзэгъыныгъэу зэдашIыгъэм диштэу мыщ фэдэ Iофтхьаб-зэхэр тапэкIи зэхащэхэзэ ашIыщт.
ЧIыфэр рагъэпщыныгъ
Адыгеим ис предпринимателым иIофшIэнкIэ ыгъэфедэгъэ электроэнергием ыпкIэ зэримытырэм къыхэкIыкIэ, пхъэшъхьэ-мышъхьэхэр зыщиIыгъ гъэтылъыпIэм арест тыралъхьан фаеу хъугъэ. Мы хъулъфыгъэм гъэстыныпхъэ-энергетическэ компанием сомэ мини 140-рэ фэдиз ритыжьын фэягъ, ар зэрытхэгъэ тхьапэр хьыкум приставхэм я Федеральнэ къулыкъу и ГъэIорышIапIэу Адыгеим щыIэм Кощхьэблэ районымкIэ иотдел къыIэкIэхьагъ.
Хьыкум пристав-гъэцэкIакIом Iофыр къызызэIуехым, чIыфэр зытелъыр зыщыпсэурэм, ащ мылъкоу IэкIэлъым ягъэунэфын ыуж ихьагъ. Предпринимателым тетхэгъэ унэм янэ-ятэхэр исыгъэх. Ахэм къызэраIуагъэмкIэ, якIалэ Мыекъопэ районым Iоф щешIэ, мы уахътэм зыщыпсэурэ чIыпIэр тэрэзэу ашIэрэп.
Хьыкум приставхэм Iофышхоу ашIагъэм ишIуагъэкIэ, Мыекъопэ районым ит пхъэшъхьэ-мышъхьэхэр зыщаIыгъ гъэтIылъыпIэр предпринимателым тетхагъэу къыхагъэщыгъ. ПсынкIэ дэдэу а мылъкум арест тыралъхьагъ.
ИIофшIэн къызэтемыуцоным пае предпринимателыр хьыкум приставхэм яотделэу Кощхьэблэ районым щыIэм къекIолIагъ ыкIи чIыфэу телъыр зэкIэ къыпщыныжьыгъ.
Хьыкум приставхэм я Федеральнэ къулыкъу
и ГъэIорышIапIэу
Адыгеим щыIэм
ипресс-къулыкъу.