Спорт гимнастикэмкIэ Дунаим и Кубок къыдэхыгъэным фэгъэхьыгъэ зэнэкъокъу Болгарием икъалэу Варнэ щыкIуагъ. Мыекъуапэ икIэлэцIыкIу-ныбжьыкIэ спорт еджапIэу N 2-м щапIугъэ Дмитрий Ланкиныр зэIукIэгъухэм ахэлажьи, джэрз медалыр къыдихыгъ.
Урысыем ихэшыпыкIыгъэ командэ хэтэу Д. Ланкиным Олимпиадэ джэгунхэм зафегъэхьазыры. «Параллельнэ брусьехэр» зыфиIорэ зэIукIэгъухэм ящэнэрэ чIыпIэр тиспортсмен къащыдихыгъ.
— Илъэс 19 Дмитрий Ланкиным ыныбжьыр, — къеIуатэ Мыекъуапэ икIэлэцIыкIу-ныбжьыкIэ спорт еджапIэу N 2-м иIофышIэу, Д. Ланкиным иапэрэ тренерэу Вячеслав Костных. — Рио-де-Жанейро мыгъэ щыкIощт Олимпиадэ джэгунхэм Дмитрий ахэфэщтми тшIэрэп. Тренерхэр нэбгыри 6-мэ ахэдэнхэшъ, къыхахыщтыр зы е тIу ныIэп. Арэу щытми, тигугъэхэм къакIичырэп.
Д. Ланкиным икъулайныгъэ хегъахъо, Москва рагъэблэгъагъэу дунэе зэIукIэгъухэм зафегъэхьазыры.
Сурэтым итыр: Дмитрий Ланкиныр зэнэкъокъум хэлажьэ.