Дунэе турнирэу «ТекIоныгъ» зыфиIорэр я 16-у Санкт-Петербург щыкIуагъ. Федеральнэ шъолъырхэр, къэлэ ЛIыхъужъхэр, дзэм и Щытхъу зыхьырэ къалэхэм ябэнакIохэр зэхахьэм хэлэжьагъэх.
Шъолъырхэм якомандэ пэпчъ нэбгыри 10 хэтыгъ. Хэгъэгум щыкIогъэ пэшIорыгъэшъ зэIукIэгъухэм текIоныгъэр къащыдэзыхыгъэ бэнакIохэр арых кIэух зэIукIэгъухэм яухьазырыныгъэ къащызыгъэлъэгъуагъэхэр.
Къыблэ шъолъырым ихэшыпыкIыгъэ командэ Адыгэ Республикэм щыщ кIэли 3 хагъэхьагъ. Ахэр: НакI Айдэмыр, кг 46-рэ, Джармэкъо Долэт, кг 56-рэ, Георгий Парфеновыр, кг 66-рэ.
Федеральнэ шъолъырхэм язэIукIэгъухэм Къыблэм илIыкIохэм щытхъур къыщахьыгъ. ПэшIорыгъэшъ зэнэкъокъухэм ауж апэрэ чIыпIэм икъыдэхын щызэIукIагъэх Гупчэмрэ Къыблэмрэ яспортсменхэр. БэнэпIэ алырэгъум щырэхьатыгъэп. Нахь лъэшыр язэрэмыгъашIэу кIалэхэм ясэнаущыгъэрэ якъулайныгъэрэ ауплъэкIугъ. Къыблэм щыщ батырхэм 6:4-у текIоныгъэр къыдахыгъ.
Суперфиналым Москва ыкIи Къыблэм яхэшыпыкIыгъэ командэхэр щызэнэкъокъугъэх. Москва шIухьафтын шъхьаIэр фагъэшъошагъ.
— Зэнэкъокъур гъэшIэгъонэу зэхащэгъагъ, — къеIуатэ Адыгэ Республикэм самбэмкIэ икIэлэцIыкIу-ныбжьыкIэ спорт еджапIэ итренерэу, тикIалэхэм ягъусэу Санкт-Петербург щыIэгъэ Хьакурынэ Дамир. — Хэгъэгу зэошхом илъэхъан Ленинград къэзыухъумэгъэ дзэкIолIхэм ясаугъэтхэм къэгъагъэхэр акIэрытлъхьагъэх, лIыхъужъхэм шъхьащэ афэтшIыгъ, зы такъикъэ тафэшъыгъуагъ. «МыкIодыжьыщт полкым» тыхэтэу къалэм иурамхэм такъырыкIуагъ. Санкт-Петербург, Ленинград хэкум яIэшъхьэтетхэр, дзэм икъулыкъушIэхэр, ветеранхэр, цIыф къызэрыкIохэр бэ хъухэу мэфэкI зэхахьэм хэлэжьагъэх. ЗэхэщакIомэ яшIуагъэкIэ, гум къинэжьыщт хъугъэ-шIагъэу тлъэгъугъэр макIэп.
НакI Айдэмыр Тэхъутэмыкъое районым зыщегъасэ, тренерыр Джармэкъо Рустам, Адыгэ къэралыгъо университетым и Мыекъопэ къэралыгъо гуманитар-техническэ колледж, пащэр КIэрэщэ Андзаур, щеджэх Джармэкъо Долэтрэ Георгий Парфеновымрэ.
ТибэнакIохэм, тренер-кIэлэегъаджэхэм тагъэгушIуагъ, ямедальхэм ахагъэхъонэу афэтэIо.
Сурэтым итхэр: Къыблэ шъолъырым икомандэ хэтхэр.