Тэхъутэмыкъое районым ипоселкэу Яблоновскэм щыпсэурэ Ирина Ильченкэм ирэзэныгъэ къызыщыриIотыкIырэ тхыгъэ Адыгеим и Къэралыгъо автоинспекцие къыфэкIуагъ.
2016-рэ илъэсым гъэтхапэм и 30-м Иринэ ышыпхъу хъушъэн ихьагъэу Краснодар сымэджэщым ращэжьагъ, ау игъом нигъэсын зэримылъэкIыщтыр водителым къыгурыIуагъ ыкIи Къэралыгъо автоинспекцием иIофышIэхэм зафигъэзагъ.
А мафэм Тэхъутэмыкъое районым Iоф щашIэщтыгъ полицием истаршэ лейтенантэу Алий Бекбулатовымрэ полицием илейтенантэу Лаикъо Руслъанрэ. Ахэр псынкIэу япащэхэм къафытеохи, краим игупчэ медицинэ учреждение бзылъфыгъэр ащагъ.
Сымэджэщым зычIащагъэр такъикъ заулэ хъугъэу пшъэшъэжъые цIыкIоу Самирэ дунаим къытехъуагъ. Полицейскэхэр псынкIэу зэрэзекIуагъэхэм ишIуагъэкIэ сабыйми ными ящыIэныгъэкIэ щынагъор ашъхьарыкIыгъ.
«IэпыIэгъу къызэрэтфэхъугъэхэмкIэ лъэшэу тызэрафэразэр тикъулыкъушIэхэм ятэIо ыкIи ащ фэдэ цIыфхэр хэгъэгу кIоцI IофхэмкIэ къулыкъухэм зэрахэтхэм тырэгушхо» — еIо тхыгъэм иавтор.