«АГУ-Адыиф» Мыекъуапэ — «Ставрополье» Ставрополь — 31:30 (16:13, 15:17).
ЖъоныгъуакIэм и 13-м Мыекъуапэ щызэIукIагъэх.
Зезыщагъэхэр: А. Башмак — Усть-Кинель, М. Ефре-
мов — Челябинск.
«Адыиф»: къэлэпчъэIутхэр: Кожубекова, Ваганова, Баскакова; ешIакIохэр, къэлапчъэм Iэгуаор зэрэдадза-
гъэм ипчъагъ: Серадская — 4, Головко — 4, Грбавче-
вич — 4, Никитина — 10, Исаченко — 1, Смоленце-
ва — 5, Неупокоева, Лихач, Куцевалова, ШъэоцIыкIу
— 2, Портягина — 1.
Я 9 — 11-рэ чIыпIэхэр къыдэзыхыщт командэхэр ары тикъа-
лэ щызэIукIагъэхэр. ЕшIэгъур кIэухым фэкIонымкIэ такъикъи 5 фэдиз къэнагъэу Iэгоуи 5-кIэ «Адыифыр» «Ставропольем» ыпэ итыгъ. ХьакIэхэр псынкIэу апэкIэ илъыхэзэ нахь шъуамбгъоу зэрешIэщтхэм пылъыгъэх. Тигандболисткэхэм рэхьатныгъэ бащэ къызыхагъэфагъ. Такъикъищым къыкIоцI гъогогъуи 3 тикъэлапчъэ Iэгуаор къыдадзагъ. Опыт дэгъу зиIэ тиешIакIохэм ухъумэн Iофыгъохэр нахьышIоу агъэцакIэу зэрэфежьагъэхэм тигъэгушIо-
щтыгъ. Арэу щытыгъэми, гумэкIыгъо хэлъэу пчъагъэм хэхъощтыгъ: 29:27, 30:29, 31:30. Аужырэ нэгъэупIэпIэгъухэм «Адыифым» итренер шъхьаIэу Анатолий Скоробогатовыр зыгъэпсэфыгъо уахътэм къыкIэлъэIугъ. Ащ шIуагъэ къыхьыгъэу тэлъытэ — тренерхэм хэкIыпIэхэр къагъотынхэм фэшI ащ фэдэ амалхэр агъэфедэхэу къыхэкIы.
«Адыифым» чIы зэщизым Iэгуаор щычIинагъ. «Ставропольер» псынкIэу ыпэкIэ къилъы шIоигъу. ТиешIакIохэм ухъумэн Iофыгъохэр гупчэм нахьышIоу щагъэцэкIэным фэбанэх. Аужырэ нэгъэупIэпIэгъухэм рэхьатныгъэ къытатырэп…
ТекIоныгъэр къехьылъэкIы
«Адыиф» — «Уфа-Алиса» Уфа — 30:29 (16:12, 14:17).
ЖъоныгъуакIэм и 15-м Мыекъуапэ щызэIукIагъэх.
Зезыщагъэхэр: А. Башмак — Усть-Кинель, М. Ефремов — Челябинск.
«АГУ-Адыиф»: къэлэпчъэIутыр: Кожубекова; ешIакIохэр: Серадская — 1, Головко — 1, Грбавчевич — 1, Никитина — 6, Исаченко — 6, Смоленцева — 3, Неупокоева — 4, Лихач — 2, Куцевалова — 2, Васильева — 1, ШъэоцIыкIу — 2, Портягина — 1, Чешенко.
Очко 12 иIэу «Алисэр» Мыекъуапэ къэкIуагъ. Командэм итренерхэм, ешIакIохэм къызэрэтаIуагъэу, я 9-рэ чIыпIэр къыдахын ямурад. Мыекъуапэ щыкIогъэ зэIукIэгъур «Адыифым» къыхьыщтэу тигъэгугъэщтыгъ. Ольга Исаченкэр, Наталья Никитинар яIэпэIэсэныгъэкIэ нахь къахэщыщтыгъэх. Къэлапчъэм Iэгуаор дадзэ зыхъукIэ, хэкIыпIэ гъэшIэгъонхэр къагъотыщтыгъэх.
Гандболыр къэзыгъэдахэрэр ошIэ-дэмышIэу, псынкIэу къэлапчъэм Iэгуаор дадзэ зыхъукIэ ары. Инесса Неупокоевам IапшъэкIэ Iэгуаор лъэшэу ыдзыщтыгъ, Юлия Куцеваловар банэзэ апхырэкIы, хъагъэм Iэгуаор ридзэнымкIэ кIуачIэр дэгъоу егъэфедэ. ШъэоцIыкIу Миланэ пшъэшъэ лъхъанчэу зэрэщытыр къегуаоу тлъытэрэп. ПсынкIэу зэрэгупшысэрэм ишIуагъэкIэ хъагъэм Iэгуаор редзэ, ухъумакIохэр ыгъэплъэхъунхэ елъэкIы. Кристина Лихач шъобжыр ыгъэхъужьыгъ. Къэлапчъэм благъэу екIугъэу ухъумакIохэм шапхъэхэр аукъохи, къызэтырагъэуцуагъ. Метрибл хъурэ тазыр дзыгъор Кристина дэгъоу ыгъэцэкIагъ. Ащ лъыпытэу К. Лихач джабгъу лъэныкъомкIэ ащыIэкIэкIи, хъагъэм Iэгуаор дахэу ридзагъ.
Пчъагъэр 29:29-рэ хъугъэу аужырэ такъикъыр кIощтыгъэ. ТиешIакIохэм зэгурыIоныгъэу къызхагъэфагъэм ишIуагъэкIэ пчъагъэм хагъахъуи, текIоныгъэр къыдахыгъ.
Пресс-зэIукIэр
«Алисэм» итренерхэм, ешIакIохэм текIоныгъэр къызэрэдамыхыгъэр гухэкI ащыхъугъ, судьяхэр зыщагъэмысэгъэ чIыпIэхэри къыхагъэщыхэ ашIоигъуагъ.
«Адыифым» итренер шъхьаIэу Анатолий Скоробогатовым, тиешIакIохэу Ольга Исаченкэм, Кристина Лихач, Милица Грбавчевич, Светлана Кожубековам, Наталья Никитинам, Юлия Куцеваловам гущыIэгъу тафэхъугъ. ТекIоныгъэр къызэрэдахыгъэм фэшI мэгушIох, ау зэIукIэгъум яIэпэIэсэныгъэ икъоу къыщагъэлъэгъон зэрамылъэкIырэр ягукъау. ПэшIорыгъэшъ ешIэгъухэр мыгъэ бэрэ «Адыифым» шIуахьыгъэх, текIоныгъэм фэбэнэнхэм фэмыхьазыр спортсменкэхэр ахэтых.
КIэух ешIэгъухэу Ставрополь щыкIощтхэм «Адыифыр», «Алисэр», «Ставропольер» ахэлэжьэщтых.
Сурэтым итхэр: Елена Портягинар, Инесса Неупокоевар, Виктория Смоленцевар, Кристина Лихач.