Урысые Народнэ фронтыр кIэщакIо фэхъуи, Мыекъуапэ ия II-рэ зэIухыгъэ спартакиадэр къалэм испорткомитет зэхищагъ. Республикэ стадионым кIэух зэнэкъокъухэр шэмбэтым щыкIуагъэх. Iоф зышIэхэрэр жъоныгъуакIэм и 12 — 14-м спорт псэуалъэхэм ащызэIукIагъэх.
Спартакиадэм Парламентым, Правительствэм, Мыекъуапэ иадминистрацие якъулыкъушIэхэр, IофшIапIэхэм ялэжьэкIо пэрытхэр, журналистхэр, нэмыкIхэри хэлэжьагъэх. Анахьэу тызыгъэгушIуагъэхэм ащыщ Къэралыгъо телерадиокомпаниеу «Адыгеим» ижурналистхэм яухьазырыныгъэ стадионым, спорт псэуалъэхэм ащыкIогъэ зэIукIэгъухэм къащагъэлъагъозэ текIоныгъэм зэрэфэбэнагъэхэр.
Адыгэ къэралыгъо университетым физкультурэмкIэ и Институт теннис щешIагъэх. Стадионым атлетикэ псынкIэмкIэ, кIапсэр зэпэкъудыигъэнымкIэ, гимнастикэмкIэ щызэнэкъокъугъэх.
— Апэрэ чIыпIэр къызэрэдэтымыхыщтыр тшIэщтыгъэ, — къытаIуагъ журналистхэу Бзаго Рустам, ГъукIэлI Сусанэ, Борэкъо Фатимэ. — Ащ пае къэтымыгъанэу спорт зэIукIэгъухэм тахэлэжьагъ. Нахьыбэрэ зыдгъэхьазырмэ, тигъэхъагъэхэм ахэдгъэхъощт.
Псауныгъэр гъэпытэгъэным, зыгъэпсэфыгъо уахътэр гъэшIэгъонэу гъэкIогъэным спартакиадэм уафещэ. Журналистхэр тапэкIи чанэу зэнэкъокъухэм ахэлэжьэщтхэу, апэрэ чIыпIэхэр къыдахыщтхэу тэгугъэ.
Сурэтхэм арытхэр: телерадиокомпанием илIыкIохэу спартакиадэм хэлэжьагъэхэр; атлетикэ псынкIэмкIэ зэнэкъокъух.
