Советскэ Союзым и ЛIыхъужъэу Андырхъое Хъусенэ фэгъэхьыгъэу панкратионымкIэ шIэжь зэнэкъокъухэр Мыекъуапэ щыкIуагъэх. Къыблэ шъолъырым, Темыр Кавказым, Урысыем икъалэхэм къарыкIыгъэхэр алырэгъум щызэIукIагъэх.
Урысыем ишIэжь турнир икъызэIухын ехьылIэгъэ зэхахьэм къыщыгущыIагъэх Адыгэ Республикэм и Парламент идепутатэу ХьэкIэлI Рустам, Адыгеим панкратионымкIэ ифедерацие ипащэу Къэлэшъэо Аскар, Чэчэным и ЛIыкIоу, спорт клубэу «Ахмадым» хэтэу Хьамид Хамзатхановыр, Краснодар щыпсэурэ судьяу, зэхэщакIохэм ащыщэу Владимир Кащеевыр. Украинэм щызаозэ лIыхъужъныгъэ зезыхьэгъэ Андырхъое Хъусенэ егъашIи зэрэтщымыгъупшэщтыр, ныбжьыкIэхэм щысэ зэрафэхъурэр зэкIэми хагъэунэфыкIыгъ.
Нэбгыри 150-м нахьыбэ медальхэм афэбэнагъ. Аныбжьхэм ялъытыгъэу спортсменхэр купищэу гощыгъагъэх. Илъэс 16 — 17-м итхэр, 18 — 19 зыныбжьхэр, илъэс 20-м къехъугъэхэр зэнэкъокъугъэх. Адыгэ Республикэм щыщхэу ШэхэлI Бислъан, кг 57-рэ, Уджыхъу Анзор, кг 62-рэ, ХъорэлI Ислъам, кг 66-рэ, Цэй Рэмэзан, кг 71-рэ, Юрий Вереницыным, кг 77-рэ, Алик Делонян, кг 92-рэ, дышъэ медальхэр нахьыжъхэм якуп къыщахьыгъэх. Ингушетием къикIыгъэ Муса Плиеевым, кг 84-рэ, мы купым текIоныгъэр къыщыфагъэшъошагъ.
Илъэс 18 — 19 зыныбжьхэу Тазэ Бислъан, кг 57-рэ, Алхъо Астемир, кг 71-рэ, 16 — 17 зыныбжьхэм ахэтыгъэ ЕлъэшIыIэ Инал, кг 63-рэ, апэрэ чIыпIэхэр къахьыгъэх.
Зэнэкъокъум дунаим, Урысыем ячемпионхэр, хэгъэгум ихэшыпыкIыгъэ командэхэм ахэтхэр хэлэжьагъэх. ХагъэунэфыкIырэ чIыпIэхэр къыдэзыхыгъэхэм шIухьафтынхэр афашIыгъэх.