Тигъэзет къызэрэхиутыгъагъэу, Адыгэ Республикэм культурэмкIэ и Министерствэ шъолъыр зэнэкъокъу зэхищи, лъэпкъ драматургием ипроизведение анахь дэгъур къыхахыгъ. Зэфэхьысыжьхэр жюрим зешIыхэм, кIэлэцIыкIухэмрэ ныбжьы-кIэхэмрэ афэгъэхьыгъэ пьесэу «Сыфаеп къэсщэнэу! Сы-фае-еп!!!» зыфиIорэм апэрэ чIыпIэр фагъэшъошагъ.
Къэралыгъо филармонием щыкIогъэ зэхахьэм жюрим итхьаматэу, филологие шIэныгъэхэмкIэ докторэу Мамый Руслъан, Адыгэ Республикэм культурэмкIэ и Министерствэ иотдел ипащэу Шэуджэн Бэлэ, театроведэу Шъхьаплъэкъо Къэсэй, филармонием идиректор шъхьаIэу ЛIышэ Рустем, Лъэпкъ театрэу Цэй Ибрахьимэ ыцIэ зыхьырэм ихудожественнэ пащэу Шъхьэлэхъо Светланэ, Урысыем итеатрэхэм яIофышIэхэм я Союз икъутамэу Адыгеим щыIэм ипащэу Зыхьэ Заурбый, нэмыкIхэри пьесэ анахь дэгъур зытхыгъэ драматургэу, Урысыем изаслуженнэ артистэу, Адыгеим инароднэ артистэу Пэрэныкъо Чатибэ фэгушIуагъэх. Жюрим итхьаматэу Р. Мамыим зэнэкъокъум хэлэжьагъэмэ яIофшIагъэ осэ ин фишIыгъ, Ч. Пэрэныкъом шIухьафтынэу сомэ мини 100-р ратыжьыгъ.
Шъхьэихыгъэ зэдэгущыIэгъухэр
— Чатиб, тигъэзетеджэмэ ацIэкIэ тэри тыпфэгушIо.
— Тхьауегъэпсэу.
— Лъэпкъ драматургием хэхъоныгъэ ышIынымкIэ зэнэкъокъоу зэхащагъэм мэхьанэу ептырэм къытегущыIэба.
— Шэпхъэ хэхыгъэ иIэу зэнэкъокъур кIуагъэ. Тафэраз зэхэщакIохэм, гупшысэ гъэшIэгъонхэр тагъэшIыгъэх.
— Пьесэ макIэп жюрим къырахьылIагъэр.
— КIэлэцIыкIухэм афэгъэхьыгъэ пшысэхэр, ныбжьыкIэмэ яхьылIэгъэ драмэхэр зытхыгъэхэм ащыщых Мэхъош Руслъан, Хьакъуй Аслъан, Дэрбэ Тимур, Нэгъой Зурет, Хъурмэ Хъусен, нэмыкIхэри. Нэбгырэ пэпчъ игупшысэхэр къызэIуихынхэм фэшI темэу къыIэтыгъэр уахътэм къыпкъырэкIы.
— «Сыфаеп къэсщэнэу! Сы-фа-еп!!!» зыфиIорэр птхыным сыда уфэзыщагъэр?
— Драматургиер кIочIэ лъэш. «О, си Тхь, къысфэгъэгъу!» ыIоу стхыгъэр Лъэпкъ театрэм къыщагъэлъагъо. Синыбджэгъухэм, театрэм пыщагъэхэм бэрэ къысаIоу къыхэкIыгъ комедием ишапхъэ ит пьесэ стхынэу. Анахьэу сызыгъэгушхуагъэр сурэтышI-модельер цIэрыIоу СтIашъу Юр ары. Мафэ къэс пIоми хъунэу къысэушъыищтыгъ езгъэжьэгъэ пьесэр сыухыным фэшI.
— Птхыныр зеогъажьэм гупшысэу пшIыгъагъэмрэ темэр къызэрэзэIупхы-гъэмрэ зэтефэха?
— Нурбый, ар упчIэ дэгъу. СиIофшIагъэ икIэрыкIэу гукIэ зыфэсэгъэзэжьы. Къэзымыщэгъэ ныбжьыкIэу, дэмыкIогъэ пшъашъэу тиреспубликэ исыр макIэп. Яшэн-гъэпсыкIэхэр къыбгурыIонхэр IэшIэхэп. Пьесэм кIэухэу фэсшIыгъэр тIэкIу зэблэсхъужьын фаеу хъугъэ. Театрэм ихудожественнэ пащэу Шъхьэлэхъо Светланэ, театроведэу Шъхьаплъэкъо Къэсэй, СтIашъу Юрэ, фэшъхьафхэм сяупчIыжьэу къыхэкIыгъ.
— Комедиер жанрэ къин. ЦIыфыр бгъэщхыщт къодыеп, акъыл хихыным фэпщэн фае…
— Мамый Ерэджыбэ ипьесэхэу «Псэлъыхъохэр», «Дэхэбаринэ ихьакIэщ», нэмыкIхэри классикэм хэхьагъэх. Ащ сенэкъокъунэу сыфежьагъэп. Щысэ тепхыщтыр Iоф шъхьафэу сэлъытэ. УзыкIэмыхьащтым сыдэущтэу уенэкъокъущта?
— Театрэм щагъэуцущтми умышIэу пьесэр отхы. УиIофшIагъэ уасэ къы-фамышIызэ гум ихъыкIы-рэр хэта запIорэр?
— Цыхьэ зыфэсшIырэ ныбджэгъухэр сыдигъокIи къыскъотых. Апэ къахэзгъэщырэр СтIашъу Юр. Театрэм гукIэ Iоф щызышIэрэмэ уагъэгъозэщт.
— Чатиб, ор-орэу къэпIо-тэщтэу сыгугъагъ, ау зы упчIэ тылъыIэсыгъэгоп. Илъэс 70-м уитэу «О, си Тхь, къысфэгъэгъу!» зыфиIорэр птхыгъэ. Илъэс 80 ухъугъэу…
Пэрэныкъо Чатибэ шъабэу мэщхы. Сурэтэу тапашъхьэ илъхэм икIэрыкIэу яплъы, хэщэтыкIы.
— Илъэс 80-м ситэу ятIонэрэ пьесэр стхыгъэ. Ныбжьым зэкIэри елъытыгъэп. ЩыIэныгъэм изэхъокIыныгъэхэм уагъэгупшысэ.
— Сэ зэрэсшIэрэмкIэ, театрэм роль 200-м нахьыбэ къыщыпшIыгъ, пьесэ 20-м нахьыбэ адыгабзэкIэ зэбдзэкIыжьыгъ. Уитворчествэ къэзыгъэбаирэмэ ахэри ащыщхэба?
— ГъашIэр хъугъэ-шIагъэхэм яIотакIу. СиIофшIэгъухэм, сиIахьылхэм гукIэ зафэзгъазэу, сымакъэ зэхамыхэу нэплъэгъу закъокIэ садэгущыIэу бэрэ къыхэкIы. Театрэр сищыIэныгъ, сиеджапI.
— Адыгэ Республикэм ия 25-рэ илъэс тыпэгъокIы. ТекIоныгъэм ия 71-рэ илъэс хэдгъэунэфыкIыгъ. Уятэ Хэгъэгу зэошхом хэкIодагъ. Къиныгъохэр къызэунэкIыхэзэ къэбар гушIуагъохэр зэхэпхынхэр орыкIэ сыда?
— ЩыIэныгъэр зэрэгъэпсыгъэм елъытыгъэр бэ. «Къиным зыкъемыгъэуф» сиIахьылхэм къысаIоу зэп къызэрэхэкIыгъэр.
— Заом икIэлэцIыкIухэм, уят, уятэшхэм уакъыте-гущыIэ зэрэпшIоигъор сэшIэшъ, бэ тетымыгъа-шIэу тызэIугъакI.
— Дэгъу, Тхьэм шIукIэ тызэIуегъакI.
Сурэтым итхэр: ЛIышэ Рустем, Шэуджэн Бэл, Мамый Руслъан, Шъхьаплъэкъо Къэсэй, Шъхьэлэхъо Светлан, Пэрэныкъо Чатиб.