Яхэгъэгу шIу арагъэлъэгъу

Хьаджыкъо дэт кIэлэцIыкIу IыгъыпIэу N 97-р игъэхъагъэхэмкIэ къахэщы. Гъэсэныгъэм иучреждение иIофшIэн анахьэу зыфэгъэзагъэр къыткIэхъухьэрэ лIэужхэм яхэгъэгу шIу алъэгъуныр ары.

ЭстафетаКIэлэцIыкIу IыгъыпIэм ипа­щэу Марина Баглаевам къызэриIорэмкIэ, нахьыжъхэр ящысэтехыпIэхэу ныбжьыкIэхэр агъасэх. БэмышIэу кIэлэцIыкIу IыгъыпIэм зэнэкъокъу гъэ­шIэгъон щыкIуагъ. Советскэ Союзым и ЛIыхъу­жъэу Ацумыжъ Айдэмыр къызыхъугъэр илъэси 104-рэ зэрэхъурэм ар фэгъэ­хьыгъагъ. Спортсмен цIы­кIухэм анэмыкIэу кIэлэ­пIу­хэри ащ хэлэжьагъэх. АшIогъэшIэгъонэу, чэф ма­къэ ахэIукIызэ зэнэ­къо­къугъэх. АтекIуагъэхэр ыкIи хагъэунэфыкIырэ чIы­пIэ къыдэзыхыгъэхэр зэ­хэ­щакIохэм агъэшIуа­гъэх.

— ТичIыгогъоу, лIыгъэ­шхо зэрихьэзэ заом хэ­кIодэгъэ Ацумыжъ Айдэмыр ыцIэ тщыгъупшэрэп, — къыхигъэщыгъ Марина Баглаевам. — ШэхэкIэи­шхо ар къыщыхъугъ. Хьа­джыкъо гурыт еджапIэм ипащэу Iоф ышIэзэ, фронтым дащыгъагъ. ЛIыхъужъ­ныгъэу зэрихьагъэр къыт­кIэхъухьэрэ ныбжьыкIэхэм афэтэIуатэ. Хэгъэгу зэошхом итарихъ, псэемы­блэжьэу мамыр щыIакIэм фэбэнагъэхэр ятэгъашIэх. ХьакIэу къедгъэблагъэхэрэми ар къаIуатэ. Непэ ти­кIэлэцIыкIу IыгъыпIэ ЛIы­хъужъым ипхъорэлъфэу Ацумыжъ Валентинэ щы­Iагъ. ТекIоныгъэм и Мафэу къэблагъэрэмкIэ зэ­кIэми къафэгушIуагъ ыкIи Ацумыжъ Айдэмыр исурэт зытешIыхьэгъэ дэп­къым кIэлэцIыкIухэр игъу­сэхэу къэгъагъэхэр кIэ­ралъхьагъэх.

Ныбэ Анзор.