Синыдэлъфыбзэ дэими дэгъуми
Дунаир рысшIэу чIылъэм сытет,
Сыдырэ уахъти — гъэбэжъуи огъуи
СэркIэ ощхбыбым ренэу ар фэд.
МэщбэшIэ Исхьакъ
ЗэлъашIэрэ тхэкIо цIэрыIоу, Урысые Федерацием, СССР-м, Адыгэ Республикэм литературэмкIэ я Къэралыгъо тынхэм ялауреатэу, М. А. Шолоховым ыцIэкIэ щыт Урысые литературнэ премиер къызыфагъэшъошагъэу, Адыгэ, Къэбэртэе-Бэлъкъар, Къэрэщэе-Щэрджэс республикэхэм янароднэ тхакIоу МэщбэшIэ Исхьакъ мыгъэ, 2016-рэ илъэсым ижъоныгъокIэ мазэ, къызыхъугъэр илъэс 85-рэ мэхъу. Ащ фэгъэхьыгъэ мэфэкI Джамбэчые гурыт еджапIэм щызэхэтщагъ. ТхакIом игъэхъагъэхэми, идунэететыкIи такъыпкъырыкIэу зэхахьэм цIэ фэтшIыгъ «Дунаим тет шIушIэныр игъогогъоу» тIуи. Ащ хэлэжьагъэх я 6 — 11-рэ классхэм ащеджэхэрэр. МэфэкIыр зэращагъ я 11-рэ классым ис еджакIохэу УелIыкъо Саидэрэ Шъэожъ Алыйрэ.
Ичылэ, ипсыхъо, адыгэхэм, ныдэлъфыбзэм, адыгэ цыем афэгъэхьыгъэ усэхэу ытхы-
гъэхэм езбырэу къяджагъэх, къатегущыIагъэх. Зезыщэхэрэм класс пэпчъ гущыIэ аратызэ, Исхьакъ иусэхэм къяджагъэх. Анахь дэгъоу усэ къеджагъэхэр къыхагъэщыгъэх. Ахэр я 6-рэ классымкIэ Нэгъой Адалбый, Бахъукъо Айдэмыр, Бысыдж Айдэмыр, ТIэшъу Дарин, Хьатэмэ Индар. Я 7-рэ классымкIэ ДыдыкI Свет, ТIэшъу Дарин, я 8-рэ классымкIэ ПчыхьэкIэ Эл, Чэужъ Анжел. Я 9-рэ классым иеджакIоу Цэй Джэнэт МэщбэшIэ Исхьакъ иусэу «Синыдэлъфыбз» зыфиIорэмкIэ еджапIэми район зэнэкъокъуми апэрэ чIыпIэр къыщыфагъэшъошагъ. Я 6-рэ классым ис еджакIохэу Пчэнэшэ Залинэрэ Джымыкъо Динарэрэ МэщбашIэм иусэу «Дахэ си Дунай» зыфиIорэр орэдышъом илъэу къызэдаIуагъ. Сэнаущыгъэ зыхэлъ еджакIохэм тхакIом итхыгъэхэм атехыгъэ сурэтхэр, итхылъ кIышъохэр мэфэкIым ехъулIэу сурэт къашIыгъэх. Ахэр зыхэт къэгъэлъэгъон зэхэтщэгъагъ. А зэнэкъокъум анахь чанэу хэлэжьагъэх ПчыхьэкIэ Эльвирэ, ШхончыбэшIэ Иляс, ДыдыкI Светэ, Чэмбэхъу Фаина, ТIэшъу Дамир.
Хэтрэ тхакIуи игъэхъагъэхэм яшыхьатыр итхылъхэр ары. А лъэныкъом имэхьани кIэдгъэтхъэу тхылъ къэгъэлъэгъон зэхэтщагъ. УмыгъэшIэгъон, урымыгушхон плъэкIырэп МэщбэшIэ Исхьакъ илэжьыгъэ бэгъуагъэ, исэнаущыгъэкIэ, иIофшIакIэкIэ илъэпкъ гъэшIэрэ тынэу фишIыгъэр. Агу къадеIэу тхакIом фэлъэIуагъэх гъэшIэ кIыхьэ иIэнэу, икъэлэмыпэ тхылъыкIэхэр джыри къычIэкIынхэу.
МэфэкI зэхахьэм нахь чанэу зыкъыщызыгъэлъэгъуагъэхэр жюрим къызыхегъэунэфыкIыхэм ыуж, чэфрэ гушIуагъорэ къызхэщырэ къашъохэмкIэ аухыгъ.
Мы усэр тхакIом фэдгъэшъошагъ:
Гъогу зафэу лъэпкъым итарихъы
УищыIэныгъэ гъогу о епхыгъ.
УиIофшIэгъэ дахэхэм къапкъырыкIэу
О умакъэ ныбжьыкIэгум къекIугъ.
Уи «Мыжъошъхьали» щыIэныгъ,
«Илъэс фыртынэхэр» гум лъыIэсыгъ.
«ШIу шIи псым хадз» зыфиIорэм
КъыщычIэкIыжьы шъыпкъэу уигущыIэ.
Уитхылъхэм ахэт образхэр
ЩыIэныгъэм щыщ шъыпкъэх.
«Бзыикъо заор» тарихъ нэкIубгъоу
Лъэпкъым нэпэеплъэу о къептыгъ.
УишIушIагъэ, Исхьакъ, мыухыжь.
ТитхэкIо нахьыжъхэм о уащыщ,
Уитхыгъэхэр дунаим щызэлъашIэх,
Ахэт образхэр тищысэтехыпIэх.
Къэралыгъо премиехэм урялауреат,
Ущытхъузехь, ународнэ тхакIу,
Пшызэ шъолъырым дышъэ медаль
Къыпфигъэшъуашэу, уцIыф гъэшIуагъ.
Гимным тедэIумэ, тынэгу укIэт,
Уигеройхэм тапIу, талэжьы.
Уикъэлэмыпэ, Исхьакъ, мыуцэкоу
Джыри уилъэпкъ бэрэ фэлажь!
Шэуджэн Джантыгъ.
Джамбэчые гурыт еджапIэу N 7-м адыгабзэмрэ
литературэмрэкIэ икIэлэегъадж.
Сурэтхэм арытхэр: Iофтхьабзэр А. Шъэожъымрэ
С. УелIыкъомрэ зэращэ; анахь чанхэр жюрим къыхегъэщых.