КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым тыгъуасэ къэгъэлъэгъон гъэшIэгъон къыщызэIуахыгъ. СурэтышIэу Александр Шиловым иIофшIагъэхэм ар яхьылIагъ.
Музеим идиректорэу Кушъу Нэфсэт ипэублэ гущыIэ къыщыхигъэщыгъэ гупшысэхэм уагъэгъуазэ. А. Шиловым исурэтхэр апэрэу тиреспубликэ къыщагъэлъагъох. Адыгеим и ЛIышъхьэу ТхьакIущынэ Аслъан А. Шиловым итворчествэ анахьэу къыщыхигъэщыгъэр сурэтышIыр зэрэныбжьыкIэм дакIоу, тыкъэзыуцухьэрэ дунаим дэхагъэу хэлъыр сурэтхэмкIэ къыгъэлъэгъон зэрилъэкIырэр ары. Патриот шъыпкъ, ихэгъэгу шIу зэрилъэгъурэр искусствэм ыбзэкIэ IупкIэу къызэIуехы.
— Сэнаущыгъэу хэлъым осэ ин фэтэшIы, — къыIуагъ ТхьакIущынэ Аслъан. — Опсэу. Лъэшэу тигуапэ тиреспубликэ укъызэрэкIуагъэр.
— Лъэшэу сышъуфэраз, Адыгеим дахэу шъукъыщыспэгъокIыгъ, — къыIуагъ Александр Шиловым. — ЧIыпIэ гъэшIэгъон шъущэпсэу. Шъолъырэу слъэгъугъэхэм Адыгеир анахь дах.
Урысыем щыпсэурэ лъэпкъхэм я Ассоциацие и Совет итхьаматэ игуадзэу Николай Бухониным цIыфхэм ягушъхьэ кIуачIэ зыкъегъэIэтыгъэным искусствэм иIофышIэхэр зыпылъхэм иеплъыкIэхэр къыриIолIагъэх. Мамыр псэукIэм игъэпытэн Адыгеим зэрэщылъагъэкIуатэрэм, тиреспубликэ Европэм ит къэралыгъо зэтегъэпсыхьагъэхэм афагъадэзэ къэгущыIагъэхэм ащыщхэм зэгъэпшэнхэр ашIыгъэх.
СурэтышI цIэрыIохэу Бырсыр Абдулахь, Эдуард Овчаренкэр, Еутых Асе, нэмыкIхэри А. Шиловым итворчествэ къытегущыIагъэх.
ТхьакIущынэ Аслъанрэ Александр Шиловымрэ лентэ плъыжьыр зэпаупкIи, къэгъэлъэгъоныр къызэIуахыгъ. Сурэтхэр лъэгъупхъэх. Пейзажыр ары А. Шиловыр нахь зыфэщагъэр. Сурэт пэпчъ теплъэ хэхыгъэ иI. Шъохэр дэгъоу ыгъэфедэхэзэ, мэзхэр, псыхъохэр, нэпкъхэр дахэу къегъэлъагъох.
МэшIокугъогухэр хэушъхьафыкIыгъэх. Сурэтхэм уяплъызэ, къалэм, псэупIэ цIыкIухэм ячIыпIэ гъэшIэгъонхэр нэгум къыкIэуцох. Адыгеим ичIыгухэм сурэтхэр ябгъапшэхэ пшIоигъоу уахътэ къыокIу. «Кавказ» зыфиIорэ сурэтыр дэхэ къодыеп. Пчыхьэм тыгъэр зэрэтIысыжьырэм, огур шэплъы зэрэхъурэм, нэмыкIхэм узыIэпащэ.
Пцел чъыгхэм гъэмафэм, бжыхьэм, гъатхэм, кIымафэм теплъэу яIэр сурэтхэмкIэ А. Шиловым къыреIотыкIы.
Чэчэным, Ингушетием, нэмыкIхэм сурэтхэр ащалъэгъугъэх.
ЖъоныгъуакIэм и 22-м къэгъэлъэгъоныр Мыекъуапэ щызэфашIыжьыщт.
Сахьидэкъо Нурбый.