«Терек-2» Грозный — «Зэкъошныгъ» Мыекъуапэ — 0:0. ЖъоныгъуакIэм и 10-м Грознэм щызэдешIагъэх.
«Зэкъошныгъэм» мэлылъфэгъу мазэм и 11-м къыщыублагъэу зэIукIэгъуи 5 иIагъ — тIур къыхьыгъ, 3-р зэфэдэу аухыгъ. Анахь лъэшхэм ащыщэу «Краснодар-2-м» 1:1-у Краснодар зэрэщыдешIагъэр къыдэплъытэмэ, тикомандэ ущытхъун фае. Тренер шъхьаIэу Чэгъэдыу Бибэрт «Зэкъошныгъэм» зэхъокIыныгъэхэр фешIых. Н. Къэжьарэм, Хь. Мэщыкъом, А. Делэкъом, А. Датхъужъым, нэмыкIхэм къэлапчъэм Iэгуаор дадзагъ. УхъумакIохэу И. Поликутиныр, М. Мыкъор, къэлэпчъэIутэу Б. Шэуджэныр, фэшъхьафхэри шIукIэ къахэщых.
Гъэхъагъэ «Зэкъошныгъэм» ешIыми, ауж къинэрэ командэхэм къахэкIыжьын ылъэкIырэп. Пчъагъэр 1:1-у е 0:0-у уешIэзэ, уапэ итхэм уакIэхьажьыныр къин.
2015 — 2016-рэ илъэс зэнэкъокъум футбол клубэу «Зэкъошныгъэм» ешIэгъуи 3 къыщыфэнагъ. ЖъоныгъуакIэм и 17-м Пятигорскэ, и 24-м Владикавказ якомандэхэр Мыекъуапэ щешIэщтых.
Блыпэм зэрешIагъэхэр
«Алания» — «Мэщыкъу» — 2:2, «Афыпс» — «Черноморец» — 0:1, «Краснодар-2» — «Спартак» — 0:0, «Астрахань» — «МИТОС» — 2:2, «Биолог» — «Динамо» — 3:1, СКА — «Ангушт» — 3:0.
«Спартак» Налщык апэ ит, ащ мыгъэ кIэхьан е ыпэ ишъын зылъэкIыщт командэ купэу «Къыблэм» хэтэп.
Футболыр зикIасэхэр, жъоныгъуакIэм и 17-м республикэ стадионым шъукъеблагъэх.