Зыныбжь илъэс 18 мыхъугъэ ныбжьыкIэхэр пкIэ хэмылъэу музейхэм ачIэхьанхэм фэгъэхьыгъэу «Урысые народнэ фронтым» ишъолъыр къутамэу Адыгэ Республикэм щыIэм Адыгеим ихэбзэ гъэцэкIакIохэм къахалъхьагъ. Общественникхэм зэрагъэунэфыгъэмкIэ, кIэлэцIыкIухэр мазэм зэ ыпкIэ хэмылъэу музеим чIэхьанхэу фитыныгъэ зэряIэр зымышIэрэ ны-тыхэри, кIэлэегъаджэхэри къахэкIых.
«УФ-м культурэмкIэ ихэбзэгъэуцугъэ лъапсэхэр» зыфиIорэм а шапхъэр къыделъытэ. Мыщ къызэриIорэмкIэ, зыныбжь илъэс 18-м емыхъугъэ кIэлэцIыкIухэр ыкIи сэнэхьат зыщызэрагъэгъотырэ еджапIэхэм ащеджэхэрэр мазэм зэ ыпкIэ хэмылъэу музейхэм ачIэхьанхэ алъэкIыщт. Ащ фэгъэхьыгъэ шапхъэхэр музейхэм апылъагъэх.
«Урысые народнэ фронтым» ишъолъыр къутамэу Адыгэ Республикэм щыIэм илIыкIохэм республикэм ит музейхэр къакIухьагъэх. ЗэрагъэунэфыгъэмкIэ, музейхэм ащыщыбэм хэушъхьафыкIыгъэ мафэхэм ыпкIэ хэмылъэу кIэлэцIыкIухэр ачIэхьанхэ, защаплъыхьан алъэкIыщт. Илъэсым къыкIоцI, сыд фэдэ уахътэ къэкIуагъэхэми, япчъэхэр къафызэIузыхыхэрэм ащыщых Мыекъопэ районым ит краеведческэ музееу зэшъхьэгъусэхэу Жерноклевхэм ацIэ зыхьырэр, Андырхъое Хъусен ыцIэ зыхьырэ музееу Шэуджэн районымкIэ къуаджэу Хьакурынэхьаблэ дэтыр, нэмыкIхэри. КъокIыпIэм щыпсэурэ лъэпкъхэм яискусствэкIэ Къэралыгъо Музеим и Темыр Кавказ къутамэ ыпкIэ хэмылъэу чIэхьанхэ зылъэкIыщтхэр сабыибэ зэрыс унагъохэм ащыщхэмрэ зыныбжь илъэс 16 мыхъугъэхэмрэ. ЫпэкIэ зигугъу къэтшIыгъэ къэбарыр музеим исайт ит.
Общественникхэр ны-тыхэмрэ кIэлэегъаджэхэмрэ гущыIэгъу зафэхъухэм къызэрэнэфагъэмкIэ, фитыныгъэу яIэр зэкIэми агъэфедэрэп. Мыекъуапэ щыпсэухэрэм зяупчIыхэм, ыпкIэ хэмылъэу музеим кIуагъэ ахэм къахэкIыгъэп.
— Адыгэ Республикэм анахь цIыкIоу щыпсэухэрэр, колледжхэм, техникумхэм, университетхэм ащеджэхэрэр зэкIэ ыпкIэ хэмылъэу музеим чIэхьанхэу фитыныгъэу яIэр зэрифэшъуашэу агъэфедэн фае. Ащ ишIуагъэкIэ яшIэныгъэхэм, ядунэееплъыкIэ ахагъэхъон алъэкIыщт, федеральнэ къэралыгъо гъэсэныгъэ шапхъэм гурыт еджапIэхэм Iоф ашIэнымкIи ишIуагъэ къэкIощт, — къыхигъэщыгъ «Народнэ фронтым» иштаб иэкспертэу Наталья Ткаченкэм.
АР-м гъэсэныгъэмрэ шIэныгъэмрэкIэ ыкIи культурэмкIэ иминистерствэхэр зэгъусэхэу «Музеи — школам» зыфиIорэ проектыр зэхагъэуцон гухэлъ зэряIэр «Фронтовикхэм» къаIуагъ. Республикэм щыпсэурэ ныбжьыкIэхэу зыныбжь илъэс 18-м емыхъугъэхэр музейхэм ыпкIэ хэмылъэу ачIэхьанхэм ар фэгъэхьыгъэщт.
Зыгъэхьазырыгъэр
Гъонэжьыкъо Сэтэнай.