Бзылъфыгъэ шIагъоу, ишъыпкъэу Адыгей гупсэм фэлэжьэгъэ Устэкъо Муслъимэт Зэчэрые ыпхъум идунай ыхъожьыгъ.
Устэкъо Зэчэрыерэ Асыетрэ яунагъо сабыи 4 къихъухьагъ. Анахьыжъэу Муслъимэт 1927-рэ илъэсым ищылэ мазэ къэхъугъ. Шищ — Барыч, Хьасантал, Мыхъутар ащ иIагъ. Устэкъо Зэчэрые 1942-рэ илъэсым зэуапIэм Iухьи, Харьков дэжь щыкIогъэ заохэм ащыщ горэм хэкIодагъ, зыдэхъугъэр амышIэу кIодыгъэ. Илъэс 14 нахь ымыныбжьэу Муслъимэт общественнэ-политикэ Iофхэм чанэу ахэлажьэу ригъэжьагъ. Афыпсыпэ дэт колхозым, етIанэ Сединым ыцIэкIэ щыт заводым ащылэжьагъ. Нэужым комсомол Iофхэм Тэхъутэмыкъое районым щапылъыгъ, партием ирайком пропагандэмрэ агитациемрэкIэ иотдел ипэщагъ. Шэуджэн районым икоммунистхэм партием ирайком идеологиемкIэ исекретарэу Муслъимэт хадзыгъагъ. Нэужым КПСС-м и ЦК къепхыгъэгъэ Апшъэрэ партийнэ еджапIэм чIэхьагъ. Ар къы-зеух нэуж КПСС-м и Адыгэ хэку комитет партийнэ учетымкIэ ыкIи кадрэхэмкIэ исектор ипащэу агъэнэфагъ.
Устэкъохэм яунагъо ис кIэлэцIыкIухэр зэгурыIохэу, зэдэIужьхэу къэтэджыгъэх. Адыгеим щыцIэрыIо унагъохэм ар зэу ащыщ. Муслъимэт ышхэм гъэсэныгъэ зэра-гъэгъотынымкIэ IэпыIэгъу афэхъугъ.
Барыч фотожурналист хъугъэ, Хьасантал — Урысыем щызэлъашIэрэ шIэныгъэлэжь, физикэмкIэ еджапIэхэм ащагъэфедэрэ тхылъхэмрэ методическэ IэпыIэгъухэмрэ зэхигъэуцуагъэх, Мыхъутар — Адыгеим инароднэ артист.
Муслъимэт пхъу дэгъу ыпIугъ, гухэкI хъурэр Любэ пасэу идунай зэрихъожьыгъэр ары.
Устэкъо Муслъимэт унагъом пкъэоу иIэгъэ янэ сыдигъуи фэгумэкIыщтыгъ.
Iоф зыдишIэгъэ, ящыIэныгъэ гъогу къыхахынымкIэ IэпыIэгъу зэригъэгъотыгъэ пстэуми шIукIэ игугъу ащ ашIы. Ахэм ящыIэныгъэ лъэужышIу къыхигъэнагъ, хэти IэпыIэгъу ригъэгъотыным сыдигъуи фэхьазырыгъ.
Ныбджэгъу куп.