Дунаим щызэлъашIэрэ зэхахьэм ухэлэжьэныр шIукIэ зыфэплъэгъужьэу уахътэ къыокIу. ТекIоныгъэм ия 71-рэ илъэс фэгъэхьыгъэу «МыкIодыжьыщт полк» зыфиIорэр гум щыщ хъугъэ шIэжь зэхахь. Хэгъэгу зэошхом хэкIодагъэхэм, фашистхэм апэуцужьи лIыхъужъныгъэ зезыхьагъэхэм, тичIыгу къэзыухъумагъэхэм ар афэгъэхьыгъ.
ЖъоныгъуакIэм и 9-м Мыекъуапэ иурам шъхьаIэу Краснооктябрьскэм къырыкIуагъэхэр, къэлэ паркым къыдахьэхи, дзэкIолI пщэрыхьапIэм къынэсыгъэх.
Нэбгырэ мин пчъагъэ зыхэлэжьэгъэ зэхахьэм щытлъэгъугъэр, хъугъэ-шIэгъэ къэбарэу щызэхэтхыгъэр гукIэ зэфэтхьысыжьынэу игъо тифагъэп. Илъэси 5 — 7 зыныбжьхэм къащыублагъэу 90-м къехъугъэхэм уядэIузэ ухэщэтыкIы…
ЛIыхъужъхэм, яIахьылхэм ясурэтхэр зыIыгъхэу «МыкIодыжьыщт полкым» изэхахьэ хэлэжьагъэхэм ащыщ Адыгэ Республикэм и ЛIышъхьэу ТхьакIущынэ Аслъан. ЗэIукIэгъум ащ къызэрэщиIуагъэу, Хэгъэгу зэошхом лIыхъужъныгъэ щызезыхьагъэхэр зэрэтщымыгъупшэхэрэр Iофтхьабзэм гукIэ хэолъагъо. Республикэм и Парламент и Тхьаматэу Владимир Нарожнэр, Адыгеим и Апшъэрэ хьыкум и Тхьаматэу Трэхъо Аслъан, отставкэм щыIэ генералэу Александр Дорофеевыр, Хэгъэгу зэошхом хэлэжьагъэу зыныбжь илъэс 90-м къехъугъэ Николай Кусля, республикэм иветеранхэм я Совет итхьаматэу Къуаджэ Аслъан, нэмыкIхэри «ДзэкIолым ипщэрыхьапIэ» къыщыгущыIагъэх. Фашизмэм пэшIуекIогъэ зэолIхэм гущыIэ фабэхэр къафаIуагъэх.
Сурэтхэм къаIуатэ
Медицинэм къулыкъур щызыхьыгъэ полковникэу ЦIыкIушъо Аслъан, Мыекъуапэ иадминистрацие ипащэу Александр Наролиным, Мыекъуапэ инароднэ депутатхэм я Совет и Тхьаматэу Джармэкъо Азмэт, Адыгэ Республикэм инароднэ артисткэу Нэхэе Тэмарэ, Мыекъуапэ инароднэ депутатхэм я Совет идепутат ныбжьыкIэу Бэрзэдж Асыет, къулыкъушIэу Иван Мовчан, Урысыем ижурналистхэм я Союз хэтэу МэщлIэкъо Саид, Адыгэ Республикэм культурэмкIэ иминистрэу Къулэ Мыхьамэт ыкъохэр ыкIи иунэкъощхэр игъусэх, тинэIуасэхэу нэбгыришъэ пчъагъ нэплъэгъум къифагъэр. Офицерэу Виктор Марковым быракъ плъыжьыр ыгъэбыбатэзэ къалэм иурамхэм ащытлъэгъугъ.
Блэгъожъ Казбек илъэси 7 ныIэп ыныбжьыр, янэ игъус. Сурэтэу аIыгъым къытегущыIэнхэм фэхьазырых. Ащ фэдэ кIэлэцIыкIоу тызыIукIагъэр бэ.
Гандбол командэу «Адыифым» иешIакIоу Оксана Ефимовам итэтэжъэу Николай исурэт пчэгум щызэрихьэзэ гущыIэгъу тызэфэхъугъ. Мамыр псэукIэм имэхьанэ ныбжьыкIэхэм зэрагъэлъапIэрэм Оксанэ иеплъыкIэхэр къыриIолIагъэх, ныбжьыкIэхэр ежь-ежьырэу зэхахьэм зэрэхэлажьэхэрэм егъэгушхо.
ДзэкIолI пIастэр
ПщэрыхьапIэм дзэкIолI пIастэр IэшIоу щагъэхьазырыгъ. Хэгъэгу зэошхом иветеранхэм ацIэкIэ Николай Кусля зэхэщакIохэм «тхьашъуегъэпсэу» къариIожьыгъ. Ти ЛIышъхьэу ТхьакIущынэ Аслъанрэ Николай Куслерэ Iанэм зэдыпэсыхэу лIыхъужъхэм, ныбжьыкIэхэм ягъэсэн, нэмыкIхэм атегущыIагъэх.
Концертэу паркым щыкIуагъэм едэIунхэу ветеранхэм, «МыкIодыжьыщт полкым» изэхахьэ хэлажьэхэрэм амалышIухэр яIагъэх.
Адыгеим щыщхэу Хэгъэгу зэошхом икъиныгъохэр зыпэкIэкIыгъэхэм, заом ыкIыб щыIэхэу фронтым IэпыIэгъу фэхъущтыгъэхэм, нэмыкIхэм яхьылIэгъэ тхылъхэр къыщагъэлъэгъуагъэх. ЦIыфхэр литературэ зэфэшъхьафхэм акIэупчIагъэх.
Лъапсэр агъэпытэ
«МыкIодыжьыщт полкым» лъэпсэшIу ышIыгъ. КъэкIощт илъэсым зэхахьэм хэлэжьэщтхэм япчъагъэ нахьыбэ зэрэхъущтым тицыхьэ телъ. Адыгэ Республикэм искусствэхэмкIэ икIэлэцIыкIу еджапIэу К. Лъэцэрыкъом ыцIэ зыхьырэм ипащэу Андзэрэкъо Марзыет тызэрэщигъэгъозагъэу, ятэжъ исурэт ыгъэхьазырыгъ. Ащ изакъоп зэхахьэм къыщигъэлъагъо шIоигъор, Адыгеим икомпозиторхэм, усакIохэм ящыIэныгъэ къырыкIуагъэм нахь куоу кIэупчIэщт, сурэтхэр зэрагъэгъотыщтых.
ТекIоныгъэм ия 71-рэ илъэс зэрэхэдгъэунэфыкIыгъэр тарихъым хэхьагъ. ТигукъэкIыжьхэм яхьылIэгъэ тхыгъэхэр, цIыфхэм яеплъыкIэхэр къыхэтыутыщтых.
ЕмтIылъ Нурбый.
Сурэтхэр зэхахьэм къыщытетхыгъэх.