Адыгэ Республикэм и Камернэ музыкальнэ театрэу Хьанэхъу Адамэ ыцIэкIэ щытым ТекIоныгъэм ия 71-рэ илъэс фэгъэхьыгъэ пчыхьэзэхахьэ щыкIуагъ. Хэгъэгу зэошхом итарихъ, щыIэныгъэм къыпкъырыкIырэ къиныгъохэм яхьылIэгъэ къэгъэлъэгъоныр гум къегущыIыкIы.
Галина Лодяновам ытхыгъэм техыгъэу Алена Власовам ыгъэуцугъэ музыкальнэ едзыгъохэр артистхэм дэгъоу къашIыгъэх. Орэдхэмрэ къашъохэмрэ зэрэзэгъусэхэм ишIуагъэкIэ шIэжьым нахь куоу зыфэогъазэ. Адыгэ Республикэм изаслуженнэ артистхэу Надежда Максимовам, Елена Лепиховам, Виктор Марковым, Ирина Кириченкэм уядэIузэ, тарихъым инэкIубгъохэр нэгум къыкIэуцох…
Пшъашъэхэр кIэлъэIухэзэ дзэм къулыкъушIэ макIох. Зым ипсэлъыхъо заом ыгъэкIотагъ, ежэ. ЯтIонэрэм ышнахьыжъ къыфитхыгъэ письмэу къыIукIагъэм фашистхэм зэрапэуцужьыгъэр къыщеIуатэ. Охътэ хьылъэм ным, нэнэжъ-тэтэжъхэм, кIэлэцIыкIухэм агу ихъыкIырэр хэта къыозыIощтыр?
А. Власовам, И. Кириченкэм, В. Марковым къыхадзэрэ орэдхэм заом щыфэхыгъэхэм, лIыгъэ зэрахьэзэ тичIыгу къэзыухъумэхэрэм уадэгущыIэ пшIоигъо уашIэу нэгъэупIэпIэгъухэр къыхэкIых.
Къэгъэлъэгъоным кIуачIэ къезытырэмэ ащыщ зыгъэпсэфыгъо уахътэр дзэкIолIхэм зэрагъакIорэр, бзылъфыгъэхэм ягупшысэхэр къаIуатэ ашIоигъоу уахътэ къызэрякIурэр.
КъэшъуакIом игупшыс
Грузием изаслуженнэ артистэу, Адыгеим инароднэ артистэу Исуп Аслъан ыгъэуцугъэ къашъохэм псэ къапызыгъэкIэрэ артистхэм орэдыIохэри ахэтых. ШIулъэгъур къизыIотыкIырэ «Вальсым» ныбжьыкIэхэр зэфищагъэх. Пщынаом пщынэр егъэбзэрабзэ, «Вальсым» имызакъоу, адыгэ къэшъо дахэу «ЗэфакIор», «Лезгинкэр» дзэкIолIхэм къашIых. Тимылъэпкъэгъу пшъашъэхэм заом гуузэу къафихьыгъэр зыщагъэгъупшэ ашIоигъоу къашъом хелъасэх…
Заом заор иIоф. ЦIыфым мурадэу иIэм емылъытыгъэу гумэкIыгъоу къыфыкъокIырэр макIэп. ОшIэ-дэмышIэу пыим ищэ-гынхэр тидзэкIолIхэм къатырапхъанкIэх, лъыр зыкIэчъырэ хъулъфыгъэ пкъышIухэр кIочIаджэ мэхъух. Пшъашъэм нэгушIоу къеплъыщтыгъэ дзэкIолIыр учъыIыгъэу чIыгум тефагъ…
Гум ихъыкIырэр
Блыпэшъэо Зуриет, Елизавета Савинцевам, Николай Арещенкэм, Исуп Мурат, Елена Яжкуновам, фэшъхьаф артистхэм заом икъиныгъохэр къыраIотыкIынхэм фэшI хэкIыпIэхэр къагъотых. ЗэлъашIэрэ орэдэу «Катюшэр» къыхэзыдзэрэм дежъыух. Пщынэр «къэзыгъэгущыIэрэр» нэгушIоу къэлъагъо, ау рэхьатныгъэ зэримыIэр къыхэбгъэщы пшIоигъу…
Зэпшъэшъэгъухэр яIахьылхэм акIэупчIэх. ДзэкIолI шъуашэу ащыгъым къегъэдахэх, заом имашIо пэIухьагъэхэшъ, къызэкIакIо яIэп. ЯчIыгу къызэраухъумэрэм фэшI зышъхьасыжьыхэрэп.
Ар тищыкIагъ
Виктор Марковым орэд макIэп къэгъэлъэгъоным къыщиIуагъэр. Анахьэу къахэдгъэщырэр лIыгъэм ишапхъэ итхэу тидзэкIолIхэр зэрэзэуагъэхэм, хэгъэгум икъэухъумэн зэкIэми апшъэ зэрашIыщтыгъэм фэгъэхьыгъэр ары. Алена Власовам, Елена Лепиховам, Ирина Кириченкэм яорэдхэм уядэIугъэу, Надежда Максимовам гум итхыпхъэхэу къыIохэрэм зэфэогъазэ. Режиссерым шIукIэ фэтлъэгъурэр ащ фэдэ зэгъэпшэнхэр сценэм дэгъоу къызэрэщигъэлъэгъуагъэхэр ары. ЦIыфым къыIо шIоигъор инэплъэгъукIэ, лъэбэкъу заулэу ыдзырэмкIэ къыуегъашIэх.
Артистэу Виктор Марковыр бэшIагъэу тинэIуас, роль гъэшIэгъонхэр къешIых. ШIэжь орэдэу къэгъэлъэгъоным икIэух къыщиIуагъэм цIыфхэр зэфещэх, зым зыр еплъызэ гукIэ зэдегъэгущыIэх. КъэшъуакIор, къэбархэр къэзыIуатэрэр, орэдыIор зы гъогум тырещэх. Артистым дзэкIолI шъуашэр щыгъышъ, исэнаущыгъэ иорэдкIэ нахь IэшIэхэу къыбгурэIо. Джэрпэджэжьым зэфищагъэхэр пчэгум итых, яIорэ яшIэрэ зэтефэх. Iэгутеошхохэм ауж В. Марковым орэдыр ятIонэрэу къыIуагъ.
ЗэкIэми апэ итэу заом имашIо пэIухьэрэм, хьылъэу уIагъэу зэуапIэм къинагъэр мыщынэу пыим ынэгу кIэплъэн зэрилъэкIырэм уагъэгушхо. Заом ыкIыб щыIэхэу чэщи мафи лажьэхэрэм щыIэныгъэр къыраIотыкIы. Зэгъусэхэу ТекIоныгъэм и Мафэ къагъэблагъэ…
ЕплъыкIэхэр
Адыгэ Республикэм культурэмкIэ иминистрэ игуадзэу ШъэуапцIэкъо Аминэт, республикэм и Лъэпкъ тхылъеджапIэ идиректорэу Къыкъ Беллэ, Камернэ музыкальнэ театрэу А. Хьанэхъум ыцIэкIэ щытым ихудожественнэ пащэу Сулейман Юныс, нэмыкIхэу къэгъэлъэгъоным ыуж гущыIэгъу тызыфэхъугъэхэм яеплъыкIэхэр щыIэныгъэм дештэх. Илъэс 71-рэ хъугъэ ТекIоныгъэр тидзэкIолIхэм къызыдахыгъэр. ЛIэужхэр джэрпэджэжьым зэрепхых. Сыд фэдэ уахътэ тыхэтыми, хэгъэгур къэтыухъумэн, тапэкIэ тыплъэн фае. ИчIыгу зыгъэлъапIэрэр щыIэныгъэм илъагъо пытэу теуцо.
Сурэтыр къэгъэлъэгъоным къыщытетхыгъ.