Зихэхъогъухэм я Дунэе джэгунхэр ятIонэрэу Шъачэ щызэхащагъэх. Америкэм, Азием, Европэм яхэгъэгу 95-мэ якIэлэцIыкIу 600 фэдиз зэIукIэгъухэм ахэлэжьагъ. Партиеу «Единэ Россиер», Урысые Федерацием и Правительствэ зэIукIэгъухэм кIэщакIо афэхъугъэх.
Адыгэ Республикэм щыпсэухэу Сирием къикIыжьыгъэ тилъэпкъэгъухэм Джэгунхэм яIэпэIэсэныгъэ къыщагъэлъэгъуагъ. Отгман Нарт, ЛIыбзыу Джанти, Ибрахьим Алан, Кинан Муки республикэ гимназиемрэ Мыекъуапэ ия 2-рэ гурыт еджапIэрэ ащеджэх. Адыгеим иIэшъхьэтетхэм яунашъокIэ кIэлэцIыкIухэм зэнэкъокъухэм зафагъэхьазырыгъ, ащ яIахьышIу хашIыхьагъ кIэлэегъаджэхэм.
Тигъэзет къызэрэхиутыгъэу, республикэм и Лъэпкъ театрэ ирежиссерэу Хьакъуй Аслъан, Адыгеим икIэлэцIыкIу-ныбжьыкIэ спорт еджапIэу N 2-м ипащэу Хъот Юныс кIэлэеджакIохэм пэщэныгъэ адызэрахьагъ, пэшIорыгъэшъэу Джэгунхэм афагъэхьазырыгъэх.
— «УрысыбзэкIэ зэдэгущыIэгъухэр», «Зэкъошныгъэм имашIу» зыфиIохэрэ зэIукIэгъухэр, нэмыкIхэри кIэлэеджакIохэм ашIогъэшIэгъоныгъэх, — къытиIуагъ Хъот Юныс. — Ащ дакIоу, яхэгъэгухэм, шъолъырхэм ацIэхэр лъагэу аIэты ашIоигъоу зэнэкъокъущтыгъэх. Адыгеим икIыгъэ кIалэхэм тиреспубликэ ехьылIэгъэ къэбархэр IупкIэу къаIотагъэх, щытхъур къытфахьыгъ.
Сирием къикIыжьыгъэ тилъэпкъэгъухэм Адыгэ Республикэм рэхьатныгъэ зэрэщагъотыгъэр, ныбджэгъубэ яIэ зэрэхъугъэр, хабзэм икъулыкъушIэхэр къафэгумэкIыхэзэ ящыIэныгъэ нахьышIу зэрэхъурэр тикIэлэеджакIохэм зэхахьэхэм къащаIотагъэх. Инджылызыбзэр, арапыбзэр, урысыбзэр, адыгабзэр тикIэлэцIыкIухэм ашIэ. ЛIыбзыу Джанти лъэпкъ искусствэм фэщагъ, шыкIэпщынэмкIэ адыгэ орэдхэр егъэжъынчых.
ШахматхэмкIэ, теннисымкIэ тикомандэ нахь къахэщыгъ.
ЗэIукIэгъухэм уапIу
Олимпиадэ джэгунхэм гъогогъуищэ дышъэ медальхэр къащыдэзыхыгъэ Ирина Роднинам, спортым щыцIэрыIохэу Александр Карелиным, Николай Валуевым, фэшъхьафхэм кIэлэеджакIохэр аIукIагъэх. Зэкъошныгъэм игъэпытэн, пIуныгъэм яхьылIэгъэ хъугъэ-шIагъэхэм спортсменхэр къатегущыIагъэх, упчIэхэм джэуапхэр къаратыжьыгъэх.
Адыгеим илIыкIо еджакIохэм Дунэе джэгунхэр агу рихьыгъэх, пIуныгъэ мэхьэнэ ин иIэу алъытэ. Кинан Муки хагъэунэфыкIырэ чIыпIэхэр къыдэзыхыгъэхэм ащыщ, Урысыем и Къэралыгъо Думэ идепутатэу, зэхэщэкIо купым тхьамэтагъор щызезыхьагъэу Отари Аршбэ къызэриIуагъэу, Дунэе джэгунхэр 2017-рэ илъэсым ящэнэрэу Шъачэ щыкIощтых.
Тиреспубликэ икъэралыгъо быракъ кIэлэеджакIохэм джэгунхэм ащагъэбыбэтагъ. Адыгеим культурэмкIэ, искусствэмкIэ, спортымкIэ игъэхъагъэхэм IэкIыб хэгъэгухэм къарыкIыгъэхэр ащагъэгъозагъэх. Адыгеим лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр къытиIуагъ Дунэе джэгунхэм тиреспубликэ щыщ кIалэхэр нахь чанэу ахэлэжьэнхэм зэрэпылъхэр. Командэу Шъачэ къикIыжьыгъэмрэ 2017-рэ илъэсым зэIукIэгъухэм ахэлэжьэщтхэмрэ зэгъэпшэнхэр ашIыщтых. Зэфэхьысыжьхэм къапкъырыкIырэ гупшысэхэр мамыр псэукIэм игъэпытэн, ныбжьыкIэхэм пIуныгъэ дэгъу ятыгъэным афэгъэхьыгъэх. Тиреспубликэ дунаим шIукIэ щашIэнымкIэ ащ фэдэ зэIукIэгъухэм мэхьэнэ ин ятэты.
Сурэтыр зэIукIэгъухэм яегъэжьэгъум тетхыгъ.