Лъэпкъыр бзэм къыхегъэщы

Адыгэ республикэ гимназием тыгъуасэ зэхахьэу щыкIуагъэр лъэпкъ шIэжьым, ныдэлъфыбзэм изэгъэшIэн, кIэлэеджакIохэр щыIэныгъэм фэгъэсэгъэнхэм афэгъэхьыгъагъ.

АдыгабзэмкIэ ыкIи литературэмкIэ кIэлэегъаджэу Мыгу Анжелэ зэхахьэр зэрищагъ.

Республикэ гимназием идиректорэу КIыкI Нурыет игупшы­сэхэм къащыхигъэщыгъ адыгабзэм имазэ дэгъоу зэрэзэхаща­гъэр. Адыгеим и Лъэпкъ музей, КIэрэщэ Тембот ыцIэ зыхьырэ музеим, нэмыкI­хэм кIэлэ­еджакIохэр ащыIагъэх. Адыгаб­зэкIэ усэхэм къяджа­гъэх, теат­рализованнэ едзыгъохэр музейхэм къащашIыгъэх, орэдхэр аща­гъэжъынчыгъэх.

КIэлэеджакIохэм сочинениехэр атхыгъэх, дэпкъ гъэзетхэр къы­дагъэкIыгъэх, сурэтхэр ашIы­гъэх. КIыкI Нурыет зэрилъытэ­рэмкIэ, щыIэныгъэм илъэныкъо зэфэшъхьафхэр къыдалъытэхэзэ, адыгабзэм фэгъэсэгъэнхэм зэрэпылъхэм зыкъегъэшъыпкъэжьы.

Сочинениехэр зытхыгъэхэр

Я 4-рэ классым щеджэрэ Хьэпэе Рэдэд сочинениехэм ят­хын фэгъэхьыгъэ зэнэкъокъум апэрэ чIыпIэр къыщыдихыгъ. Мыгу Миланэ, Гъубжьэкъо Аминэт, Мамый Эльзэ яклассхэм апэрэ чIыпIэхэр къащахьыгъэх.

Бзэм изэгъэшIэн, бзэмрэ лите­ра­турэмрэ язэпхыныгъэхэм кIэ­лэеджакIохэр афагъасэх. Зэнэ­къо­къум имэхьанэ зыкъегъэIэ­тыгъэным фэшI сочинениехэр атхыхэ зыхъукIэ, нэбгырэ пэпчъ хэушъхьафыкIыгъэу зэрегупшысэ­рэр, ыгу илъыр тхьапэм ригъэ­кIун зэрилъэкIырэр кIэлэегъа­джэхэм Iофыгъо инэу алъытэ.

Театрализованнэ едзыгъохэр

Ахэр пшысэхэм, пIуныгъэм афэгъэхьыгъэх. КIыкI Алый, Хъу­тIыжъ Данэ, Аджырэ Самирэ, Былымыхьэ Тамилэ, Сихъу Заур, Кушъу Данэ, Бгъуашэ Юсыф, Хьаджымэ Самирэ, Трэхъо Сюзаннэ, нэмыкIхэм шIухьафтынхэр афашIыгъэх.

Дэпкъ гъэзетхэр

Болэкъо Гунэс, Хьаткъо Расул, Долэ Дамир, КъумпIыл Ба­тыр, Хъот Миланэ, Хьэпэе Рэдэд, нэмыкIхэм щытхъу тхылъхэр афагъэшъошагъэх. Дэпкъ гъэ­зетхэм якъыдэгъэкIын агу еты­гъэу пылъыгъэх. Усэхэр атхыгъэх, сурэтхэмкIэ агъэкIэрэкIагъэх. «Сэ сиадыгабз» зыфиIорэ дэпкъ гъэзетхэр гупшысэу ахэлъымкIэ гъэ­шIэгъоных.

Адыгэ пшысэхэр тиныдэлъфыб­зэкIэ тхыгъэхэу хэкум къызы­щыдагъэкIыгъэхэр илъэс 80 зэрэ­хъугъэм ехьылIэгъэ едзыгъохэр зэхахьэм къыщашIыгъэх. Баджэр, тыгъужъыр, бзыур, тхьакIумкIы­хьэр, нэмыкIхэри зы унэм зэдисынхэм фэшI хэкIыпIэ къызэ­рагъотыгъэм уегъэгушIо. КIэлэцIы­кIухэм едзыгъом имэхьанэ къагу­рэIо, адыгабзэкIэ IупкIэу зэдэ­гущыIэх.

ЗэIукIэгъухэр

УблэпIэ классхэм ащыкIогъэ егъэджэн сыхьатхэм бзэм итарихърэ лъэпкъым къыкIугъэ гъогумрэ зэрэзэпхыгъэхэр къащаIо­тагъ. КIэлэегъаджэхэу С. Шъуа­джэр, Л. Азэщыкъыр, М. Мацэр, Н. Сихъур, З. Бэчырыр, Р. ГуашIэр, З. Шъхьэфыжьыр, фэшъхьафхэри зэхэщэн Iофыгъо­хэм чанэу ахэлэжьагъэх.

КIэлэеджакIохэу Болэкъо Гунэс, Беданэкъо Заринэ, Гъыщ Самир, АрыкI Налбек, фэшъ­хьафхэри зэхахьэм усэхэм къыщеджагъэх. Нэхэе Руслъан, Къуе­къо Налбый, нэмыкIхэм атхы­гъэхэм тигуапэу тядэIугъ. Адыгэу ущыIэным фэшI бзэр, шэн-хабзэхэр зэбгъэшIэнхэ зэрэфаем усэхэр афэгъэхьыгъагъэх.

КIэдэкIой Суандэ, ЩэшIэ Светланэ, Тхьагъэпсэу Самирэ, Жэнэ Мыхьамэт, нэмыкIхэу щытхъу тхылъхэр зыфагъэшъошагъэхэр нэгушIохэу пчэгум къызэрихьа­гъэхэр сыдым ымыуаса?!

Урыс пшъашъэу Полина Каперскаяр адыгабзэкIэ усэм къе­джагъ, ифэшъуашэу шIухьафтын фашIыгъ.

Общественнэ движениеу «Адыгэ Хасэм» итхьаматэу ЛIымыщэкъо Рэмэзан, Хэсашъхьэм хэтхэу Бо­лэкъо Аслъанрэ ЦIыкIушъо Аслъанрэ адыгабзэм имазэ фэ­гъэхьыгъэ Iофтхьабзэм гимназием иIахьышIу зэрэхишIыхьагъэм осэ ин фашIыгъ. Директорэу КIыкI Нурыет, кIэлэегъаджэхэу Мыгу Анжелэ, Мац Марыет, лъэпкъ Iэпэщысэхэр зышIырэ Игорь Пе­ревертовым щытхъу тхылъхэр ара­тыжьыгъэх, шIоу щыIэр къадэхъу­нэу афаIуагъ. КIэлэеджакIохэу Болэкъо Гунэс, ХъутIыжъ Аидэ, Полина Каперскаям, АрыкI Налбек, Гъыщ Са­мирэ, Дзыбэ Рауль, КIэдэкIой Мурадин щытхъу тхылъхэр, нэпэ­еплъ шIухьафтынхэр араты­жьы­гъэх.

КIэрэщэ Тембот ыцIэ зыхьы­рэ музеим ипащэу З. Юналыер гим­назием икIэлэегъаджэхэм, еджа­кIохэм афэгушIуагъ, шIухьафтын­хэр афишIыгъэх.

Зэфэхьысыжь кIэкI

Адыгабзэр кIэлэеджакIохэм дэ­гъоу зэрагъэшIэным фэшI сыда анахьэу Iоф зыдэтшIэн фаер? Егъэджэн сыхьатхэр нахьыбэ афа­мышIыхэ хъущтэп. Ар Iофыгъо шъхьаIэу зэрэщытыр кIэлэегъа­джэхэм къытаIуагъ. Тхьамафэм къыкIоцI зы сыхьат бзэм пэIубгъэ­хьаныр макIэ. Адыгабзэм фэгъэ­хьыгъэ зэIукIэгъухэр кIэлэеджа­кIохэм ящыкIагъэх. ОрэдыIо цIэ­рыIохэр, театрэм иартистхэр, тхакIохэр кIэлэеджакIохэм адэжь нахьыбэрэ кIонхэ фае. Литературэу ящыкIагъэм, фэшъхьаф Iофыгъохэм хэушъхьафыкIыгъэу уатегущыIэныр нахьышIу.

Гимназием щыкIогъэ зэха­хьэр адыгэ джэгукIэ аухыгъ.

Сурэтхэр зэхахьэм къыщы­тетхы­гъэх.