IэпыIэгъу зищыкIэгъэ цIыфхэм уишIуагъэ ябгъэкIыным уфеджэным изакъоп, ар угукIэ къыхэпхыгъэ сэнэхьатэу щытын фае. Ащ фэдэу гуфэбэныгъэ фызиIэу зиIофшIэн зыгъэцакIэу тлъэгъурэр бэп. Тэхъутэмыкъое район сымэджэщым Батмэн Джульеттэ зыщылажьэрэр бэшIагъэп, ау чанэу, ыгу етыгъэу иIофшIэн зэрэзэхищэрэм ишIуагъэкIэ ыцIэ дахэкIэ къуаджэм щызэлъашIагъ.
— Краснодар дэт Кубанскэ къэралыгъо медицинэ университетыр 2009-рэ илъэсым къэсыухыгъ, — къеIуатэ Батмэн Джульеттэ. — Терапевтэу интернатурэм сыщеджагъ, нэужым эндокринологэуи ординатурэр къыдэсыухыжьыгъ. Сикъуаджэ къэзгъэзэжьын гухэлъ сиIэу апшъэрэ еджапIэм сычIэхьэгъагъ. Сэнэхьатыр зыщызэзгъэгъотыгъэ илъэсым специалист ныбжьыкIэхэм афэгъэхьыгъэ программэу ахъщэ тын къыдэзылъытэрэр тишъолъыр щагъэцэкIэнэу щырагъэжьэгъагъ. Ащ сэри сыхэфэнэу хъугъэ.
Джульеттэ иIофшIэн зэрифэшъуашэу зэрэзэхищэрэм ишыхьат къыфэрэзэ цIыфхэм шъхьэкIэфэныгъэу къыпагъохырэр. Ар сымаджэхэм IэпыIэгъу зэрафэхъурэм дакIоу гущыIэ дахэхэмкIэ къеуалIэхэрэм апэгъокIы.
— Узым зыгу ыгъэцIыкIугъэ цIыфым гуфэбэныгъэ пэбгъохымэ, гумэкIыгъоу иIэр нахь псынкIэу щигъэзыещт, — еIо Джульеттэ. — Ар къызгурэIо ыкIи къысэолIэрэ пстэуми нэгушIоу сапэгъокIы. Ежьхэми сафэраз, афасшIэрэр зэхашIыкIы, ясIорэр зэрифэшъуашэу агъэцакIэ.
Коллективэу узыхэтым угурыIоным мэхьанэшхо иI. Ар Джульеттэ дэгъоу зэхешIыкIы. Сымэджэщым иIофышIэхэм пшъэрылъэу яIэр зы — IэпыIэгъу зищыкIагъэу къяолIэгъэ цIыфым яшIуагъэ рагъэкIыныр, ар агъэхъужьыныр ары. Зэгъусэхэу зэдеIэжьхэзэ, ар чанэу агъэцакIэ.
— СымышIэрэ горэмкIэ сиIофшIэгъухэм сякIуалIэу къыхэкIы, — игущыIэ лъегъэкIуатэ специалист ныбжьыкIэм. — Сыдигъуи упчIэу афэзгъэзагъэр джэуапынчъэу къагъэнагъэп. ЗэгурыIоныгъэ тазыфагу илъэу тиIофшIэн тэгъэцакIэ. Апэрэ мафэу сыкъызIухьагъэм къыщегъэжьагъэу ащыщ сыхъугъ. СиIофшIэнкIэ сищыкIэгъэщт Iэмэ-псымэхэр сагъэгъотыгъэх, амалэу яIэмкIэ IэпыIэгъу къысфэхъугъэх.
ЦIыфым ицIыкIугъом къыщегъэжьагъэу ыгукIэ пэблэгъэ сэнэхьатыр къыхихэу зэраIорэр Джульеттэ къеушыхьаты. Сабый цIыкIоу нысхъапэхэм арыджэгущтыгъэ врач хъун гухэлъ иIэ зэхъум.
— Сянэжъ врач сыхъу шIоигъуагъ. Ащ ренэу мы сэнэхьатым фэгъэхьыгъэ къэбархэр къысфиIуатэщтыгъэх. Сэри цIыфхэм сишIуагъэ язгъэкIыным сыкъыфигъэущыгъ. НэмыкI сэнэхьат зэзгъэгъотыными сегупшысагъэп. СицIыкIугъом сшIыгъэ гухэлъыр щыIэныгъэм щыпхырысщыным сыпылъыгъ ыкIи ар къыздэхъугъ, — еIо тигущыIэгъу.
Къоджэдэсхэм зэлъашIэрэ специалист ныбжьыкIэм иIофшIэн ыгу етыгъэу зэригъэцакIэрэм дакIоу унэгъо зэгурыIожь ышIагъ, ишъхьэгъусэрэ ежьыррэ шъэожъые цIыкIу зэдапIу. Сэнэхьатэу къыхихыгъэм гухахъо хигъотэнэу, ыпэкIи игъэхъагъэхэм ахигъэхъонэу фэтэIо.
Гъонэжьыкъо Сэтэнай.
Сурэтым итыр: Батмэн Джульетт.