Зэхэгъэгогъухэм я Дунэе джэгунхэр ятIонэрэу Шъачэ щызэхащагъэх. КIэлэцIыкIухэм язэкъошныгъэ гъэпытэгъэным, дунэе спорт ыкIи гуманитар зэпхыныгъэхэр щыIэныгъэм диштэу зэхэщэгъэнхэм, физкультурэмрэ спортымрэ яхьылIэгъэ Iофыгъохэр цIыфхэм нахьышIоу алъыгъэIэсыгъэнхэм, IэкIыб хэгъэгухэм урысыбзэр зэрэщагъэфедэрэм хэхъоныгъэхэр фэшIыгъэнхэм зэхахьэр афэгъэхьыгъ.
Адыгеим щыпсэурэ тилъэпкъэгъухэу Сирием къикIыжьыгъэхэр зэIукIэгъухэм ахэлажьэх. Адыгэ республикэ гимназием иеджакIохэу Отгман Нартрэ Муки Кинанрэ, Мыекъуапэ игурыт еджапIэу N 2-м икIэлэеджакIохэу ЛIыбзыу Джантирэ Ибрахьимэ Аланрэ Шъачэ кIуагъэх. Урысыемрэ Адыгеимрэ язаслуженнэ тренерэу Хъот Юныс купым ипащ.
Адыгеим илIыкIохэр гъогу техьанхэм ыпэкIэ пэшIорыгъэшъэу зэнэкъокъум зыфагъэхьазырыгъ. Тиреспубликэ искусствэхэмкIэ изаслуженнэ IофышIэшхоу, Лъэпкъ театрэу Цэй Ибрахьимэ ыцIэ зыхьырэм иартистэу, режиссерэу Хьакъуй Аслъан кIэлэеджакIохэм ярепертуар дэлэжьагъ. Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, отделым ипащэу Пэрэныкъо Фатимэ тихэгъэгогъу кIэлэеджакIохэм аIукIагъэх, зэхэщэн IофыгъохэмкIэ IэпыIэгъу афэхъугъэх.
Урысыем спортымкIэ и Министерствэ, гъэсэныгъэмрэ шIэныгъэмрэкIэ и Министерствэ, партиеу «Единэ Россиер», нэмыкIхэри Дунэе джэгунхэр регъэкIокIыгъэнхэм кIэщакIо фэхъугъэх.
Лъэпкъ шIэжьым зыкъырагъэIэты
ТелефонкIэ къатыгъ. Тиреспубликэ икIэлэцIыкIу-ныбжьыкIэ спорт еджапIэу N 2-м ипащэу Хъот Юныс къызэрэтиIуагъэу, Дунэе джэгунхэм хэгъэгу 46-рэ ахэлажьэ. Адыгеим икъэгъэлъэгъон фэгъэхьыгъэ едзыгъор тикIэлэеджакIохэм дэгъоу къашIыгъ. Хъот Юныс къызэгущыIэм, Урысыем и Президентэу Владимир Путиныр Сириер мамырэу псэуным фэшI дунэе Iофыгъоу зэрихьэхэрэм ямэхьанэ къыхигъэщыгъ. ТиеджакIохэр заом къыхэкIыжьхи Хэкужъым къызагъэзэжьым рэхьат яIэ зэрэхъугъэм зэхэщакIохэм мэхьэнэ ин ратыгъ. Тикъашъохэр, шэн-хабзэхэм якъэгъэлъэгъон, фэшъхьафхэри агу рихьыгъэх.
Шахмат, теннис цIыкIу ешIагъэх, нэмыкI зэнэкъокъухэм ахэлэжьагъэх. Космосым, кином, лъэпкъ зэпхыныгъэхэм афэгъэхьыгъэ едзыгъохэм яшIэныгъэ къащагъэлъэгъуагъ, урысыбзэкIэ джэуапхэр къатыжьыгъэх.
ЯчIыгу къэзыгъэзэжьыгъэ кIэлэеджакIохэр щыIэныгъэм хэгъозэнхэм фэшI культурэм, искусствэм, спортым нахь ахэщэгъэнхэм пылъыщтых. Шъачэ къыщалъэгъугъэр, къыщызэхахыгъэр шIукIэ къятэжьыщт.
Сурэтым итхэр: Адыгеим икIыгъэ купым хэтхэр.