Сакъыныгъэр агъэлъэшын фае

ГъогурыкIоныр щынэгъончъэным, кIэлэцIыкIухэр зыхэфэхэрэ хъугъэ-шIагъэхэр къэмыгъэхъугъэнхэм, ахэм ащыухъумэгъэнхэм афэшI мэлылъфэгъум и 21-м Адыгэ Республикэм ичIыпIэхэм пэшIоры­гъэшъ Iофтхьабзэу «КIэлэцIыкIу тIысыпI» зыфи­Iорэр ащыкIуагъ.

Iофтхьабзэм АР-м и Къэра­лыгъо автоинспекцие икъулы­къушIэ нэбгырэ 59-рэ хэлэжьагъ, ахэр куп 14 хъущтыгъэх.

ПэшIорыгъэшъ Iофтхьабзэм пшъэрылъ шъхьаIэу иIагъэр кIэлэцIыкIухэр щынэгъончъэу зэ­ращэнхэмкIэ гъогурыкIоным ишапхъэхэр водительхэм амыукъонхэр ыкIи кIэлэцIыкIухэу гъогухэм атекIуадэхэрэм, шъобж­хэр зытещагъэ хъухэрэм япчъагъэ нахь макIэ шIыгъэныр ары.

АР-м и Къэралыгъо автоинспекцие икъулыкъушIэхэр кIэ­лэцIыкIу IыгъыпIэхэм адэжь ­во­дительхэр къащагъэуцухэзэ, кIэ­лэцIыкIур машинэм исэу зе­пщэнымкIэ хэушъхьафыкIыгъэ тIысыпIэхэр шIокI имыIэу агъэ­федэхэмэ ауплъэкIугъэх. Ахэм­кIэ хэукъоныгъэ 34-рэ къыха­гъэщыгъ, водительхэм административнэ пшъэдэкIыжь атыралъхьагъ.

Республикэм и Къэралыгъо автоинспекцие джыри зэ цIыф­хэм агу къегъэкIыжьы кIэлэ­цIыкIухэр щынэгъончъэу ма­шинэхэмкIэ зэращэнхэм фэшI хэушъхьафыкIыгъэ тIысыпIэхэр ахэм арымытхэу е бгыры­пхымкIэ имыпхагъэу водителыр къызагъэуцукIэ тазырэу сомэ мини 3 зэрэрагъэты­щтыр.

ЦIыфэу рулым Iусым ежь имызакъоу, ащ къыдисымкIи пшъэдэкIыжь ехьы. Арышъ, са­къыныгъэу хэлъыр нахь ыгъэ­лъэшын фае. Гъогур щынэгъон­чъэу щытыныр водительхэм яп­шъэрылъ.