КIэуххэр зэфахьысыжьыгъэх

Мэлылъфэгъум и 20-м сыхьатыр 17.00-м къыщыублагъэу 19.00-м нэс республикэм ишъолъыр профилактическэ Iофтхьабзэу «ЛъэсрыкIу» зыфиIо­рэр щыкIуагъ. ЛъэсрыкIохэр зыхафэхэрэ гъогутран­спорт хъугъэшIагъэхэр нахь макIэ шIыгъэнхэм ар фэIорышIагъ.

АР-м хэгъэгу кIоцI Iоф­хэм-кIэ и Министерствэ и Общественнэ совет хэтхэр Iоф­тхьа­бзэм хэлэжьагъэх. Ащ изэ­хэщэнкIэ ГИБДД-м икъу­лы­къу­шIэ 59-рэ, наряд куп 17 агъэ­нэфагъ.

Сыхьати 4-м къыкIоцI гъогу­рыкIоным ишапхъэхэр уцогъу 56-рэ аукъуагъэх, ащ щыщэу лъэс­рыкIом гъогу рамытыгъэу — 7, ежь лъэсрыкIохэм шапхъэр амыгъэцэкIагъэу — 29-рэ.

ЦIыфым щынэгъончъэу гъогур зыщызэпичыщт чIыпIэу лъэсрыкIо зэпырыкIыпIэр щытын фае. Водителыр ащ къы­зысыкIэ, скоростыр ыгъэмэ­кIэ­нэу е, ищыкIагъэмэ, къэуцупэнышъ цIыфыр блигъэкIынэу щыт. Машинэ зезыфэхэрэр анахь зыщысакъынхэ фаер кIэлэцIыкIу гъогунапцэм Iут зыхъукIэ ары. Охътэ шIункIым ыкIи урамыр дэгъоу къызыщымынэфыхэрэм нэфынэр къэзытырэ пкъыгъохэр бгъэфедэнхэу щыт.

ЛъэсрыкIохэми щынэгъо зе­кIуакIэхэр къахэфэх, шъхьахы­нагъэм къыхэкIэу «зебрэм» нэмысхэу гъогур зэпачы.

Къэралыгъо автоинспекцием джыри шъугу къегъэкIыжьы гъо­гурыкIоным хэлэжьэрэ пстэу­ми лъэсрыкIо зэпырыкIыпIэхэм сакъыныгъэ къызщыхагъэфэнэу.