БлэкIыгъэ 2015-рэ илъэсым Хэгъэгу зэошхом ТекIоныгъэр къызщыдахыгъэр илъэс 70-рэ зэрэхъурэр зыхагъэунэфыкIыр ары «ЕгъашIи щыIэщт полкхэр» аIуи зэджэгъэхэ Iофтхьабзэр Урысыем апэу зыщызэхащэгъагъэр.
Къалэхэм зэкIэми ар ащыкIуагъ пIоми хэукъоныгъэ хъущтэп. Заом хэлэжьэгъэ дзэкIолIэу щымыIэжьхэм ясурэтхэр е ахэм афэгъэхьыгъэу зытетхэгъэ транспорантхэр яIахьылхэм аIыгъхэу гупчэ урамхэм арыкIуагъэх. Адыгеири мы Iофтхьабзэм хэлэжьагъ. Нэбгырэ мин 15 фэдиз Мыекъуапэ иплощадэу Лениным ыцIэ зыхьырэм щызэрэугъойи, урамхэу Краснооктябрьскэмрэ Гагаринымрэ атетхэу урамэу Пушкиным ыцIэ зыхьырэм нэс ехыхи, къэлэ паркым щызэIукIэжьыгъагъэх.
Джыри мыгъэ, жъоныгъуакIэм и 9-м, «ЕгъашIи щыIэщт полкхэр» зыфиIорэ Iофтхьабзэр Урысыем ичIыпIэ зэфэшъхьафхэм ащызэхащэщтых. Мыекъуапи ащ хэлэжьэнэу зыфегъэхьазыры. Лъэпкъэу зыщыщым, динэу ылэжьырэм, политическэ еплъыкIэу иIэм ямылъытыгъэу, шIоигъоныгъэ зиIэ пстэури ащ хэлэжьэнэу къырагъэблагъэ. Шапхъэу ыгъэцэкIэн фаехэри къагъэнэфагъэх. Ахэм къызэрэдалъытэрэмкIэ, Хэгъэгу зэошхом хэлэжьэгъэ уиIахьылэу щымыIэжьым исурэт е ащ ыцIэ, ылъэкъуацIэ, ятэ ыцIэ, званиеу иIагъэр, къызщыхъугъэр зытетхэгъэхэ транспорант пIыгъын фае. Ар зэрэпшIыщтми шэпхъэ гъэнэфагъэхэр иIэх.
Транспорантым миллиметрэ 290-рэ ишъомбгъогъэн, миллиметрэ 435-рэ икIыхьэгъэн, пхъэу ар зыпылъыщтым икIыхьагъи миллиметрэ 500-м шIомыкIэу пшIынхэ фае. Сурэтым миллиметрэ 245-рэ илъэгэгъэщт, миллиметрэ 335-рэ ишъомбгъогъэщт. Сурэт уимыIэмэ, «ЕгъашIэм щыIэщт полкым» итамыгъэ плакатэу шIыгъэу пIыгъыми хъущт. Ар мы Интернет нэкIубгъомкIэ зэбгъэгъотын плъэкIыщт: emblema bes-smertnogo polka.pdf.
Шапхъэхэр нахь игъэкIотыгъэу телефонэу 52-27-21-мкIэ е мы адресымкIэ: Мыекъуапэ, урамэу Краснооктябрьскэр, 21-рэ, каб. N 225-рэ зэбгъэшIэнхэ плъэкIыщт, мы Интернет нэкIубгъом уихьэми къипхыщт: maikop kultura@mail.ru