Республикэм ичIыгулэжьхэм гъэтхасэхэм япхъын чанэу зэшIуахы. Адыгэ Республикэм мэкъу-мэщымкIэ и Министерствэ къызэритырэмкIэ, апхъынэу щытыгъэ гектар мини 119,2-м щыщэу мэлылъфэгъум и 26-м ехъулIэу чылапхъэхэр гектар мин 68,5-мэ арагъэкIугъ.
Ащ щыщэу зэнтхъым гектар миным ехъу рагъэубытыгъ. Натрыфым ихэлъхьан ыкIэм фэкIо, гектар мин 25,8-рэ апхъыгъах. ГъэрекIо елъытыгъэмэ, пчъагъэм зэхапшIэу хэхъуагъ.
Тыгъэгъазэм ипхъыни республикэм ихъызмэтшIапIэхэм чанэу зэшIуахы. Гектар мин 34,7-м ехъур чIыгум халъхьэгъах. Джащ фэдэу хьарыхъу джэнчым гектари 146-рэ рагъэубытыгъэр, ар Шэуджэн районыр ары непэрэ мафэм ехъулIэу зыпхъыгъэр. Пынджым ихэлъхьани рагъэжьагъ, Тэхъутэмыкъое районым гектар 450-рэ щапхъынэу игъо ифагъэх.
Джащ фэдэу силос ашIынэу натрыф гектар 688-рэ ащапхъыгъ Джэджэ (гектар 93-рэ) ыкIи Красногвардейскэ районхэм (гектар 595-рэ). Ащ нэмыкIэу былымIус хъунэу гектар 1374-рэ республикэм щапхъыгъ.
IэкIыбым къыращыщтыгъэ продукциер тэтыехэмкIэ зэблэхъугъэн зэрэфаер тихъызмэтшIапIэхэм зэхашIа-гъэу, хэтэрыкIхэм, пхъэшъхьэ-мышъхьэхэм якъэгъэкIын нахь зыратыгъ. Мыгъэ чIыгулэжьхэм картоф гектар 86-рэ, хэтэрыкI гектар 61,4-рэ ашIагъ. Ащ нэмыкIэу, аужырэ шапхъэхэм адиштэу чъыгхэтэ гектари 136,9-рэ агъэтIысыгъ.
ПIатIыкъо Анет.