Къэралыгъо Думэм идепутатхэм яхэдзынкIэ «Единэ Россием» ипэшIорыгъэшъ мэкъэтын хэлажьэхэрэм мэлылъфэгъум и 23-м Мыекъуапэ язэдэгущыIэгъу щыкIуагъ. Кандидатхэмрэ ахэм адезыгъаштэхэрэмрэ анахьэу зытегущыIагъэхэр гъэсэныгъэм, псауныгъэм икъэухъумэн ыкIи социальнэ политикэм япхыгъэ Iофыгъохэр ары.
ЗэIукIэгъухэр чэзыуитIоу кIуагъэх, нэбгырэ тфырытф чэзыу пэпчъ хэлэжьагъ. Адыгеим щыпсэурэ бзылъфыгъэхэм ягъэIорышIапIэ итхьаматэу Светлана Дорошенкэр, республикэм псауныгъэм икъэухъумэнкIэ иминистрэу Мэрэтыкъо Рустем, Адыгэ Республикэм цIыфым ифитыныгъэхэмкIэ и Уполномоченнэу Анатолий Осокиныр, Адыгэ Республикэм физическэ культурэмкIэ ыкIи спортымкIэ и Комитет итхьаматэу Хьасанэкъо Мурат, къэралыгъо телерадиокомпаниеу «Адыгеим» ипащэ игуадзэу Щыщэ Людмилэ апэрэ чэзыум хэлэжьагъэх.
ЯтIонэрэм ежь ашъхьэ фэгъэхьыгъэу ыкIи япрограммэ ехьылIагъэу къыщыгущыIагъэх къалэу Мыекъуапэ инароднэ депутатхэм я Совет идепутатхэу — «Гвардие ныбжьыкIэм» ишъолъыр къутамэ итхьаматэу Бэрзэдж Асыетрэ Мыекъопэ гурыт еджапIэу N 3-м идиректорэу Хьатэгъу Нелэрэ, Мыекъопэ къэлэ сымэджэщым иврач шъхьаIэ игуадзэу Елена Любченкэр, парламентым и Палатэу ыхэкIэ щыIэм идепутатэу Натхъо Разыет, кIэлэцIыкIу IыгъыпIэу N 1-м ипащэу Светлана Папинар.
— Эфир занкIэмкIэ социальнэ сетэу «Одно-классники» зыфиIорэм яеплъыкIэхэр къыщаIуагъэх. Апэрэу республикэм ащ фэдэ форматыр щыдгъэфедагъ. Нэужым тыратхагъэхэр видеохостингэу «Youtube» зыфиIорэмкIэ къыхаутыгъэх, джащ фэдэу шъолъыр къутамэм исайт ыкIи социальнэ сетьхэм яофициальнэ аккаунтхэм къарыхьагъэх. Арэущтэу зыкIэтшIыгъэр «Единэ Россием» ыцIэкIэ кандидатхэу пэшIорыгъэшъ мэкъэтыным хэлажьэхэрэм амал зэриIэкIэ цIыфхэр нахьыбэу нэIуасэ афэхъунхэм пае, — къыIуагъ партием ишъолъыр гъэцэкIэкIо комитет ипащэу АфэшIэгъо Рэмэзан.