«Динамо-МГТУ» Мыекъуа-пэ — «Магнитка» Магни-тогорск — 78:62 (15:16, 19:15, 21:15, 23:16). Мэлылъфэгъум и 22-м Мыекъуапэ щызэIукIагъэх. Зезыщагъэхэр: А. Федоров — Санкт-Петербург, А. Кольцов — Тула, П. Усков — Воронеж. «Динамо-МГТУ»: Гапошин — 3, Абызов — 9, Хмара — 14, Еремин — 22, Широков — 5, Кубраков — 19, Чураев — 4, Милютин — 2.
Дышъэ медальхэм афэбэнэрэ командэхэр Магнитогорскэ зыщызэIокIэхэм, Адыгеим иешIакIохэм текIоныгъэр къыдахыгъ, пчъагъэр 67:50. ЯтIонэрэ зэIукIэгъур Мыекъуапэ щыкIуагъ. Апэрэ такъикъхэм гумэкIыгъо нэмыкI къытфахьыгъэп. Пчъагъэр 0:6, 2:11, 6:11. Валентин Кубраковыр ешIапIэм къызехьэм, бысымхэм ухъумэн Iофыгъохэр нахьышIоу агъэцакIэхэу аублагъ. Хъагъэм Iэгуаор изыдзэхэрэм ащыщыгъэх Максим Абызовыр, Николай Ереминыр, Илья Хмарэ. В. Кубраковыр хъурджанэм пэчыжьэми е пэблагъэми Iэгуаор хъагъэм зэрэридзэрэм тигъэгушхощтыгъ.
«Магниткэм» дэгъоу щешIэщтыгъэх Е. Тикановыр, А. Кохельниковыр, нэмыкIхэри. ТекIоныгъэр хьакIэхэм ахьы ашIоигъуагъ, ау «Динамо-МГТУ-м» иухъумакIохэм ашIокIынхэ алъэкIыщтыгъэп. Аужырэ такъикъи 10-м гумэкIыгъо тиIэжьыгъэп, тиспортсменхэм яфэшъуашэу текIоныгъэр къыдахыгъ.
Пресс-зэIукIэр
«Магниткэм» итренер шъхьаIэу Сергей Конотоповыр Адыгеим икомандэ къыфэгушIуагъ, гъэхъагъэхэр ышIынхэу фэлъэIуагъ. «Динамо-МГТУ-м» итренер шъхьаIэу Андрей Синельниковым баскетболыр зыгу рихьыхэу Iэгу къафытеощтыгъэхэм «тхьашъуегъэпсэу» къариIожьыгъ. Адыгэ Республикэр илъэс 25-рэ зэрэхъурэм «Динамо-МГТУ-м» текIоныгъэр зэрэфигъэхьырэр къыхигъэщыгъ. Ти ЛIышъхьэу ТхьакIущынэ Аслъан Правительствэм, спортсменхэм зэрафэразэр къыIуагъ.
АфэгушIуагъэх
Адыгэ Республикэм физкультурэмкIэ ыкIи спортымкIэ и Комитет итхьаматэу, дунаим самбэмкIэ гъогогъу 11 ичемпионэу Хьасанэкъо Муратрэ Мыекъопэ къэралыгъо технологическэ университетым иректорэу Къуижъ Саидэрэ хагъэунэфыкIырэ чIыпIэхэр къыдэзыхыгъэ командэхэм афэгушIуагъэх, медальхэр, щытхъу тхылъхэр, шIухьафтынхэр аратыжьыгъэх.
Дунэе категорие зиIэ судьяу Владимир Ревенкэмрэ Урысыем баскетболымкIэ исуперлигэ щыкIорэ зэнэкъокъум изэхэщакIомэ ащыщэу Мария Смоляковамрэ зэхахьэм къыщыгущыIагъэх, зэIукIэгъум нэбгырабэ зэреплъыгъэр къыхагъэщыгъ, «Динамо-МГТУ-р» ыпэкIэ лъыкIотэнэу фаIуагъ.
ТиешIакIохэу Валентин Кубраковым, Артем Гапошиным, Максим Абызовым, Николай Ереминым, нэмыкIхэм гущыIэгъу тафэхъугъ. Зэнэкъокъум дышъэ медальхэр къызэрэщахьыгъэм тиспортсменхэр ыгъэгушхуагъэх.
СССР-м спортымкIэ имастерэу Сергей Золотцевым Москва къикIыгъэхэ Владимир Ревенкэмрэ Мария Смоляковамрэ инэIуасэх. ЗэдэгущыIэгъоу зэдыряIагъэм тигуапэу тыхэлэжьагъ.
ЕшIэгъур Мыекъуапэ дэгъоу щыкIуагъэу хьакIэхэм алъытагъ. «Динамо-МГТУ-м», тренер шъхьаIэу Андрей Синельниковым къащытхъугъэх. Баскетболым тиреспубликэ мэхьанэу щыратырэм хэхъоныгъэ фэхъу зэрашIоигъом тыщагъэгъозагъ.
Зэфэхьысыжьхэр
Суперлигэм ия 3-рэ куп апэрэ чIыпIэр къыщыдэзыхыгъэхэ тиспортсменхэм тафэгушIо. 2016 — 2017-рэ илъэс ешIэгъум «Динамо-МГТУ-р» суперлигэм ия 2-рэ куп щешIэнэу фитыныгъэ иIэ хъугъэ. Урысыем баскетболымкIэ ифедерацие зэфэхьысыжьхэр ышIыщтых. Унашъоу ыштэрэм елъытыгъэу 2016 — 2017-рэ илъэс ешIэгъур зэхащэщт.
Сурэтхэр зэхахьэм къыщытетхыгъэх.