Продукциер нахь дэгъоу IуегъэкIы

Урысыем бэшIагъэ зыщызэхащэрэр «Урысыем итовари 100 анахь дэгъухэр» зыфиIорэ зэнэкъокъур. Продукцием идэгъугъэ хэгъэхъогъэнымкIэ, къашIырэм ыцIэ дахэкIэ гъэIугъэнымкIэ, къызэрэ-кIэупчIэхэрэмрэ зэрэIукIырэмрэ ахэгъэ-хъогъэнымкIэ мыр амалышIоу зэрэщы-тыр къыдалъытэзэ, Адыгеим ит предпри-ятиехэу товар зэфэшъхьафхэр къыдэзы-гъэкIхэрэр ыкIи фэIо-фашIэхэр афэзыгъэ-цакIэхэрэр а зэнэкъокъум чанэу хэлажьэх.

IMG_0085

Мы зэнэкъокъум ичIыпIэ зэ­хэщакIоу щытых Адыгэ Республикэм и Правительствэрэ федеральнэ бюджет учреждениеу стандартизациемкIэ ыкIи метрологиемкIэ Гупчэу Адыгеим щыIэмрэ. 2016-рэ илъэсым телъытэгъэ а зэнэкъокъур бэмышIэу рагъэжьагъ. ГъэрекIо рекIокIыгъэм Адыгеим ит предприятиехэр зэрэхэлэжьагъэхэр ыкIи мы илъэсым щыIэщтым изыфэгъэхьазырын зэрэрагъэ­жьагъэр къедгъэIуатэ тшIоигъоу зыцIэ къетIогъэ Гупчэм ипащэу Матыжъ Аслъан джырэблагъэ зыIудгъэкIагъ.

ГъэрекIо рекIокIыгъэ зэнэ­къокъум къыгъэлъэгъуагъэм тызыкIэупчIэм Аслъан къызэри­IуагъэмкIэ, Адыгеим ит предприятие заулэмэ зэнэкъо­къум текIоныгъэр къыщыдахыгъ. ГущыIэм пае, лауреатыцIэр къафаусыгъ пшъэдэкIыжь гъэнэфагъэ зиIэ обществэу «Южгазстрой» зыфиIорэм ипродукциеу полиэтиленым хэшIыкIыгъэ рыкIуапIэу ПЭ-80-рэ зыфиIорэм ыкIи хъызмэтшIапIэу «МПК» Мыекъопэ пивэшI заводым» къыдигъэкIырэ пивэ лъэпкъи­тIум. Джащ фэдэу зэнэкъокъум идипломантыцIэ къащафагъэ­шъошагъ хъызмэтшIапIэу «Мамрыкъом» къыдигъэкIырэ дагъэу апэрэ сортым хахьэрэм, шъхьэзэкъо предпринимателэу Э.Г. Никогосян къыдигъэкIырэ паркет лъэпкъэу «Старый мастер» зыцIэм, мебелышI фабрикэу «Ивна» къы­ди­гъэкIырэ мебелэу «Афина» зыфиIорэм. ЗэкIэ ахэм япродукциехэм ифэшъошэ тамыгъэ атырагъэуцон алъэкIыщт ыкIи, дэгъум цIыфхэр нахь лъыIабэ­хэу хабзэшъ, продукцием иIу­гъэ­кIынкIэ хэпшIыкIэу ишIуагъэ къэкIощт.

IMG_0051

УпчIэ. Аслъан, Программэу «Урысыем итовари 100 анахь дэгъухэр» зыфиIорэм тегъэпсы­кIыгъэ зэнэкъокъур зызэхащэрэр бэкIае шIагъэ. 2016-рэ илъэсым телъытагъэм сыда къепIолIэн плъэкIыщтыр?

Джэуап. Адыгэ Республикэм и Правительствэрэ федеральнэ бюджет учреждениеу cтандар­ти­зациемкIэ, метроли­гиемкIэ ыкIи уплъэкIунымкIэ къэралы­гъо региональнэ Гупчэу Адыгэ Республикэм щыIэмрэ МОО-у «Академия проблем и качества» зыфиIорэр, техническэ гъэIорышIэнымкIэ ыкIи метрологиемкIэ Федеральнэ агентствэр ягъусэхэу 2016-рэ илъэсым я 19-у зэхащэ «Урысыем итовари 100 анахь дэгъу­хэр» зыфиIорэ Программэм тегъэпсыкIыгъэ зэнэкъокъур. Ащ чэзыуитIу иI: региональнэ чэзыур 2016-рэ илъэсым имэзае и 8-м къыщыублагъэу мэкъуогъум и 6-м нэс — Адыгеим ыкIи федеральнэ чэзыур 2016-рэ илъэсым имэкъуогъу и 6-м къыщыублагъэу ты­гъэгъазэм и 26-м нэс Москва ащырекIокIыщтых.

Региональнэ лъэгапIэм текIо­ныгъэр къыщыдэзыхыгъэхэр Адыгэ Республикэм анахь дэ­гъухэу зэрэщалъытагъэхэм имы­закъоу, Урысыем ипредприятиехэм ахэтхэу Адыгеир федеральнэ лъэгапIэм къыща­гъэлъэгъонэу амал яIэщт.

IMG_0041

Федеральнэ лъэгапIэм текIо­ныгъэр къыщыдэзыхыгъэхэм зэнэкъокъум илауреатхэу ыкIи идипломантхэу зэрэщытхэр къэзыушыхьатырэ дипломхэр къафагъэшъошэщтых, илъэс къэс къыдагъэкIырэ ка­талогэу «Урысыем итовари 100 анахь дэгъу­хэр» зыфиIорэм дагъэхьащтых, Программэм исайт рагъэхьа­щтых. Ащ нэмыкIэу продукцием идэгъугъэ ехьылIэгъэ Декларацием кIатхэхэзэ, «Урысыем итовари 100 анахь дэгъухэр» зыфиIорэ тамыгъэр япродукцие тырагъэуцонэу фитыныгъэ яIэ хъущт.

Продукцием идэгъугъэкIэ ыкIи ищынэгъончъагъэкIэ хэ­хъо­ныгъэшIухэр зэрашIыгъэхэм ыкIи яIофышIэхэр гъэшIогъэнхэм фэшI агъэнэфагъэх шIухьаф­тынхэу «Лидер качества», «Гор­дость Отечества», «Вкус качества» зыфиIохэрэр.

КъэIуагъэмэ хъущт зэнэкъо­къум хэлэжьэнхэу предприятие 46-рэ къызэредгъэблэгъа­гъэр ыкIи мы лъэхъаным ехъу­лIэу ащ хэлэжьэнхэу предприятии 4 макъэ къызэрэтагъэIу­гъэр.

УпчIэ. Тащыгъэгъуазэба зэнэкъокъум ыгъэнэфэрэ гухэлъ ыкIи пшъэрылъ шъхьаIэ­хэм.

Джэуап. Ахэм ащыщых:

— урысые экономикэм иреальнэ сектор зэнэкъокъу амалэу иIэхэм ахэгъэхъогъэным IэпыIэгъу фэхъугъэныр;

— хэгъэгум щылэжьэрэ то­варкъыдэгъэкIакIохэм экономикэ зэнэкъокъукIэ амалэу яIэ­хэм ахэгъэхъогъэныр, экономикэм иIофыгъо шъхьаIэхэм язэ­шIохын IэпыIэгъу егъэгъоты­гъэ­ныр;

— продукцием идэгъугъэкIэ, ищынэгъочъагъэкIэ ыкIи Iоф­шIэныр щынэгъончъэу щыты­нымкIэ предприятиехэм менеджментым исистемэ дэгъоу ащы­гъэпсыгъэныр;

— продукцие ыкIи фэIо-фэшIэ дэгъухэр Урысыем ибэдзэр­шIыпIэ нахь дэгъоу щылъыгъэ­кIотэгъэнхэр, шъолъырым къы­щахьыжьырэм хэ­хъоныгъэ егъэ­шIыгъэныр.

IMG_0037

Зы Iофыгъо шъхьаIэ хэзгъэ­унэфыкIы сшIоигъу. Зэнэкъокъур зэхащэу заублагъэм къыщегъэ­жьагъэу щытхъуцIэу «Лидер качества» зыфиIорэр зэгъогогъо тиреспубликэ къыдихыгъ. Ар 2011-рэ илъэсым рекIокIыгъэ зэнэкъокъум Iахьзэхэлъ обществэу Мыекъопэ машинэшI заводым къыщыфагъэшъошэ­гъагъ. КъэIуагъэмэ хъущт Темыр Кавказым ит рес­публи­кэхэмкIэ апэрэу ащ фэдэ щыт­хъуцIэ Адыгеим къыдихын зэри­лъэкIыгъэр.

— Тхьауегъэпсэу, Аслъан, тиупчIэхэм зэхэугуфыкIыгъэ джэуапхэр къызэряптыжьы­гъэмкIэ, Iофыгъошхоу шъузыпылъыр дэгъоу къыжъудэхъунэу, товаркъыдэгъэкIакIохэр ащ чанэу къыхэлэжьэнхэу ыкIи гъэхъэгъэшIухэр къагъэлъэгъон­хэу шъуфэтэIо.

— Тхьауегъэпсэу.

СЭХЪУТЭ Нурбый.